Рабийә ханим вә д у қ вәкиллириниң яврупа парламентидики паалийити давамлашмақта

Уйғур миллий һәрикитиниң рәһбири рабийә қадир ханим башчилиқидики дуня уйғур қурултийиниң вәкиллири, пәйшәнбә күни белгийиниң пайтәхти берюселдики яврупа комитетиниң мәсуллири билән учришип, яврупа иттипақи билән яврупа комитетини уйғур мәсилисигә ортақ йосунда көңүл бөлүшкә чақирған.
Мухбиримиз әқидә
2009.09.03
Rabiye-xanim-yawropa-Libo-Roucek-ependi-305.jpg Сүрәттә, рабийә ханим вә д у қ рәһбәрлири йаврупа парламентиниң муваин рәси либор роуҗәк билән биргә.
RFA Photo / Ekrem

Шуниң билән биргә йәнә, хитай һөкүмитиниң 5 ‏- июл үрүмчидә елип барған қораллиқ қирғинчилиқиға қарита қаттиқ позитсийидә болуш, буниңға һәргизму сүкүттә турмаслиқ тәләплирини оттуриға қойған.

Яврупа комитетидики мәсул хадимлар, рабийә қадир ханим оттуриға қойған тәләпләргә алаһидә көңүл бөлүп, у тәкитлигән мәсилиләрни яврупа иттипақиға әза 27 дөләт вәкиллири билән өз ‏ - ара музакирлишип, бу һәқтә ортақ бир пикир бирлики һасил қилидиғанлиқи һәққидә вәдә бәргән.

Уйғур миллий һәрикитиниң рәһбири рабийә қадир ханим, йешиллар партийәсиниң яврупа парламентида турушлуқ гуруппиниң рәиси вә әнгилийәниң яврупа парламентида турушлуқ парламент әзаси билән вә йәнә хәлиқара кәчүрүм тәшкилати, хәлқара кишилик һоқуқни көзитиш тәшкилати, хәлқара чегрисиз мухбирлар тәшкилатлири қатарлиқ тәшкилатларниң мәсуллири билән сөһбәттә болуп, уларниңму уйғур хәлқи дуч кәлгән зулумларни яхши тәкшүрүшини, хитай һөкүмитиниң уйғурлар үстидин йүргүзүватқан бастурмичилиқ сиясити тоғрисида мәхсус доклат тәйярлишини тәләп қилған.
Rabiye-xanim-yawropa-Manuel-Baroso-ependi-305.jpg
Сүрәттә, рабийә ханим йаврупа бирликиниң рәиси мануәл баросо әпәндим билән биргә.
RFA Photo / Ekrem

Уйғур миллий һәрикиитиниң рәһбири рабийә қадир ханим, үч күндин буян яврупа парламентида елип барған паалийәтлиридин чәксиз мәмнун икәнликини, хитай һөкүмити вә аталмиш шинҗаң һөкүмитиниң үрүмчидә елип барған қораллиқ қирғинчилиқиниң җинайи җавабкарлиқиға чоқум тартилдиғанлиқини билдүрди.

Дуня уйғур қурултийиниң муавин рәиси өмәр қанат, хәлқара мәтбуатларниң рабийә қадир ханимни алаһидә зиярәт қилғанлиқини һәмдә дуня уйғур қурултийи вәкиллириниң җүмә күни, яврупа парламентидики һәр қайси дөләт әзалириниң уйғурлар мәсилиси һәққидә бир қарар мақуллиши үчүн паалийәт елип баридиғанлиқини билдүрди.

Рабийә қадир ханимниң, яврупа парламентидики паалийити давамлишиватқан бу пәйтләрдә, хитай даирилири рабийә қадир ханимниң диалог тәлипини рәт қилип, рабийә ханимниң хитай һөкүмити билән сөһбәт елип бериш салаһийитигә игә әмәс икәнликини ейтқан. Хитай ташқи ишлар министирлиқиму 5 - июл үрүмчи вәқәсиниң хитайниң ички иши икәнликини тәкитләп, "буниңға һечқандақ дөләт вә тәшкилатниң арилишиш һоқуқи йоқ" деди.

Дуня уйғур қурултйиниң баш катипи долқун әйса әпәнди, хитай даирилириниң бу позитсийини қаттиқ әйибләп, уйғурларниң вәкилини, кимниң салаһийәтлик икәнликини, хитай һөкүмранлири әмәс, бәлки уйғур хәлқи өзи бәлгиләйдиғанлиқини билдүрди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.