Rabiye qadir xanim gérmaniyide

• Ixtiyari muxbirimiz ekremning bu heqtiki melumati
• Download story audio

8 – Ayning 11 – küni, gérmaniye Uyghurliri ataqliq insan heqliri pa'aliyetchisi, Uyghur milliy herikitining rehbiri rabiye qadir xanim we meshhur yazghuchi sidiq haji rozi ependini myunxén ayrodromida daghdughiliq kütüwalghan idi. 8 – Ayning 13 – küni yekshenbe, yawropa sherqiy türkistan birliki teshkilatining orunlashturishi bilen, myunxéndiki Uyghurlar ularning sheripige bagh seylisi uyushturup, rabiye qadir xanim hem sidiq haji rozi ependilerge salam berdi we ulardin hal soridi.

Bu qétimqi pa'aliyetke gérmaniyining herqaysi yurtliridin bolup, yüzdin artuq kishi a'ile – tawabi'atliri bilen kélip qatnashti. D u q re'isi erkin aliptékin ependimu alahide kélip, rabiye qadir xanim hem sidiq haji rozi ependiler bilen didarlashti.

Pa'aliyet sorunida, aldi bilen d u q re'isi erkin aliptékin ependi nutuq sözlep, "Uyghurlarning meniwi anisi, sherqiy türkistan milliy herikitining rehbiri, xelq'ara insan heqliri kürishining bayraqdari" dep shereplendürülgen rabiye qadir xanimdin semimi hal sorash bilen birge, uning sherqiy türkistan milliy mujadiliside tutqan orni we qolgha keltürgen netijilirige yene bir qétim yuqiri baha berdi.

D u q ning her qachan rabiye qadir xanim bilen bir septe turup, mürini mürige tirep küresh qilidighanliqini qayta eskertti.

Rabiye qadir xanim öz nutqida, sherqiy türkistan xelqining nöwette duch kéliwatqan paji'elik teqdiri, xitayning insan qélipidin chiqqan siyasiy, iqtisadiy, medeniy qirghinchiliqliri we assimilyatsiye siyasiti, shundaqla téximu dehshetlik dawam qiliwatqan dölet térrori heqqide melumatlar bergendin sirt, muhajirettiki Uyghurlarning insan heqliri kürishi musapiside qolgha keltüriwatqan utuqliri we Uyghur teshkilatlirining nöwettiki wezipisi, Uyghur milliy mujadilisining siyasiy yönilishi heqqidimu pikirler bayan qildi.

Bu pa'aliyetke yawropa sherqiy türkistan birliki teshkilatining re'isi dolqun eysa ependi we sherqiy türkistan informatsiye merkizining re'isi abdujélil qariqash qatarliq teshkilat mes`ullirimu qatnashti. Besh sa'et dawam qilghan bu pa'aliyet qaynam tashqinliq bir keypiyat ichide ötti.

Pa'aliyettin kéyin, d u q rehberliri bilen rabiye qadir xanim, sidiq haji rozi ependiler arisida Uyghur milliy mujadilisining teqdiri, nöwettiki we kélichektiki siyasiy heriketlerning plan – programmiliri heqqide muhim ichki muzakiriler élip bérildi.

Bu heqtiki toluq melumatlarni, gérmaniyidiki ixtiyari muxbirimiz ekremdin anglang.