Рабийә қадир ханим хитай даирилириниң түрлүк тосқунлуқларға қаримай өз паалийитини давамлаштурмақта

2007-12-17
Елхәт
Пикир
Share
Принт

Rabiye1-150.jpg
Муһаҗирәттики уйғур миллий һәрикитиниң рәһбири рабийә қадир ханим. Source: You Tube

Муһаҗирәттики уйғур миллий һәрикитиниң рәһбири рабийә қадир ханим йеқинда җәнвәдә явропа парламентниң ташқи ишларға мәсул хадимлири билән көрүшүп, уларға уйғурлар нөвәттә дуч келиватқан мәсилиләрни чүшәндүргән. Бу җәрянда хитай даирилири рабийә ханимниң җәнвәдики паалийәтлириниң оңушлуқ елип берилишиға тосқунлуқ қилиш үчүн, түрлүк бузғунчилиқларни мәйданға кәлтүргән.

Б д т ниң һәрқайси комитетлириға уйғурлар мәсилиси аңлитилди

Уйғур миллий һәрикитиниң йетәкчиси, уйғурларниң мәниви аниси рабийә қадир ханим, хитай түрмисидин қоюп берилип америка туприқиға қәдәм басқан күндин етибарән, уйғур хәлқиниң кишилик һоқуқи вә демократийисини қолға кәлтүрүш йолида изчил түрдә паалийәт елип бармақта.

Хитай даирилири, рабийә қадир ханимни америкида давалинишқа рухсәт қилип, америка һөкүмәт хадимлириға тапшуруп бериштин бурун униң һечқандақ сиясий һәрикәткә қатнашмаслиқини, әгәр у җуңгоға қарши сиясий паалийәтләр билән шуғулланса, униң хитай һөкүмити игидарчилиқидики шинҗаң уйғур аптоном районидики барлиқ мал - мүлкиниң мусадирә қилинғандин сирт, пәрзәнтлириниң хейим ‏- хәтәргә дуч келидиғанлиқини ейтип, униңға тәһдитләр салған иди.

Бирақ, рабийә қадир ханим хитайниң тәһдитлиригә писәнт қилмастин " мениң шәхсий мәнпәәтим, хәлқимниң мәнпәәтидин үстүн туралмайду" дегән кәскин ипадиси билән 3 йилға йәтмигән вақит ичидә дуняниң һәрқайси җайлиридики охшаш болмиған дөләтләрни аз дегәндә 20 қетимға йеқин зиярәт қилип, уйғурлар дуч келиватқан сиясий вәзийәт, болупму хитай һөкүмитиниң маарипни хитайчилаштуруш сиясити, хитай көчмәнлирини йөткәш, ишсиз әмгәк күчлирини ишқа орунлаштуруш дегән сиясәтниң әсли маһийити, сиясий мәһбусларға өлүм җазаси бериш, әйдизниң тез сүрәттә тарқилиши қатарлиқ әһвалларни дәлил испат вә пакитлиқ материяллар арқилиқ, мунасивәтлик кишилик һоқуқ тәшкилатлириға билдүрмәктә.

Хитай, рабийә қадир ханимниң җәнвәдики паалийәтлириниң алдини елишқа көп тиришқан

Бирләшкән дөләтләр тәшкилати әмгәк комитетиниң хадимлири йеқинда шиветсарийиниң җәнвә шәһиридә, хитайниң уйғур қизларни әрзан әмгәк күчи сүпитидә хитай өлкилиригә кәң - көләмлик йөткәш сиясити үстидә рабийә қадир ханим билән сөһбәтләшти. Хитай даирилири буниңдин қаттиқ биарам болуп, түрлүк бузғунчилиқ һәрикәтлири елип барған.

Гәрчә хитай даирилири һәр хил тосқунлуқлар арқилиқ рабийә қадир ханимниң җәнвәдики паалийәтлириниң алдини елишқа көп тиришқан болсиму, әмма рабийә қадир ханим уйғурларниң болупму уйғур аяллириниң вәзийитини толуқ аңлатқан.

Рабийә қадир ханимниң бу хил паалийәтлири, әлвәттә хитай даирилириниң күчлүк наразилиқини мәйданға кәлтүрүш билән биргә, униң пәрзәнтлириниң түрмиләргә ташлинишиға нәзәрбәнд астиға елинишиға вә нурғун мал - мүлкиниң мусадирә қилинишиға йол ачти. Лекин, уйғурларниң мәниви аниси шәрипигә еришкән мәзкур ана, пиғанлиқ һәсритини қәлбигә пүкүп йәнила уйғурларниң әркинлики үчүн давамлиқ издәнмәктә.

Дуня уйғур қурултийиниң баш катипи долқун әйса әпәнди бу һәқтә өз һислирини оттуриға қойди. (Әқидә)

Пикирләр (0)
Share
Толуқ бәт