Rabiye qadir xanim xitay da'irilirining türlük tosqunluqlargha qarimay öz pa'aliyitini dawamlashturmaqta

2007-12-17
Élxet
Pikir
Share
Print

Rabiye1-150.jpg
Muhajirettiki Uyghur milliy herikitining rehbiri rabiye qadir xanim. Source: You Tube

Muhajirettiki Uyghur milliy herikitining rehbiri rabiye qadir xanim yéqinda jenwede yawropa parlaméntning tashqi ishlargha mes'ul xadimliri bilen körüshüp, ulargha Uyghurlar nöwette duch kéliwatqan mesililerni chüshendürgen. Bu jeryanda xitay da'iriliri rabiye xanimning jenwediki pa'aliyetlirining ongushluq élip bérilishigha tosqunluq qilish üchün, türlük buzghunchiliqlarni meydan'gha keltürgen.

B d t ning herqaysi komitétlirigha Uyghurlar mesilisi anglitildi

Uyghur milliy herikitining yétekchisi, Uyghurlarning meniwi anisi rabiye qadir xanim, xitay türmisidin qoyup bérilip amérika tupriqigha qedem basqan kündin étibaren, Uyghur xelqining kishilik hoquqi we démokratiyisini qolgha keltürüsh yolida izchil türde pa'aliyet élip barmaqta.

Xitay da'iriliri, rabiye qadir xanimni amérikida dawalinishqa ruxset qilip, amérika hökümet xadimlirigha tapshurup bérishtin burun uning héchqandaq siyasiy heriketke qatnashmasliqini, eger u junggogha qarshi siyasiy pa'aliyetler bilen shughullansa, uning xitay hökümiti igidarchiliqidiki shinjang Uyghur aptonom rayonidiki barliq mal - mülkining musadire qilin'ghandin sirt, perzentlirining xéyim ‏- xeterge duch kélidighanliqini éytip, uninggha tehditler salghan idi.

Biraq, rabiye qadir xanim xitayning tehditlirige pisent qilmastin " méning shexsiy menpe'etim, xelqimning menpe'etidin üstün turalmaydu" dégen keskin ipadisi bilen 3 yilgha yetmigen waqit ichide dunyaning herqaysi jayliridiki oxshash bolmighan döletlerni az dégende 20 qétimgha yéqin ziyaret qilip, Uyghurlar duch kéliwatqan siyasiy weziyet, bolupmu xitay hökümitining ma'aripni xitaychilashturush siyasiti, xitay köchmenlirini yötkesh, ishsiz emgek küchlirini ishqa orunlashturush dégen siyasetning esli mahiyiti, siyasiy mehbuslargha ölüm jazasi bérish, eydizning téz sür'ette tarqilishi qatarliq ehwallarni delil ispat we pakitliq matériyallar arqiliq, munasiwetlik kishilik hoquq teshkilatlirigha bildürmekte.

Xitay, rabiye qadir xanimning jenwediki pa'aliyetlirining aldini élishqa köp tirishqan

Birleshken döletler teshkilati emgek komitétining xadimliri yéqinda shiwétsariyining jenwe shehiride, xitayning Uyghur qizlarni erzan emgek küchi süpitide xitay ölkilirige keng - kölemlik yötkesh siyasiti üstide rabiye qadir xanim bilen söhbetleshti. Xitay da'iriliri buningdin qattiq bi'aram bolup, türlük buzghunchiliq heriketliri élip barghan.

Gerche xitay da'iriliri her xil tosqunluqlar arqiliq rabiye qadir xanimning jenwediki pa'aliyetlirining aldini élishqa köp tirishqan bolsimu, emma rabiye qadir xanim Uyghurlarning bolupmu Uyghur ayallirining weziyitini toluq anglatqan.

Rabiye qadir xanimning bu xil pa'aliyetliri, elwette xitay da'irilirining küchlük naraziliqini meydan'gha keltürüsh bilen birge, uning perzentlirining türmilerge tashlinishigha nezerbend astigha élinishigha we nurghun mal - mülkining musadire qilinishigha yol achti. Lékin, Uyghurlarning meniwi anisi sheripige érishken mezkur ana, pighanliq hesritini qelbige püküp yenila Uyghurlarning erkinliki üchün dawamliq izdenmekte.

Dunya Uyghur qurultiyining bash katipi dolqun eysa ependi bu heqte öz hislirini otturigha qoydi. (Eqide)

Pikirler (0)
Share
Toluq bet