Rabiye qadir xanim ray sinashta nobél namzatliri ichidiki küchlük namzat

• Muxbirimiz qanatning bu heqtiki toluq melumati
• Download story audio

2006‏- Yilliq nobél mukapatining sahibini élan qilish küni yéqinlashqansiri, bu shereplik mukapatning bu yil kimge yaki kimlerge nésip bolidighanliqi toghrisida türlük xewerler chiqmaqta hemde nurghun mulahiziler yürgüzülmekte. Bundin sirt yene nurghunlighan xelq'araliq tetqiqat institutliri ray sinashlar élip bérip, kishilerdin 2006- yilliq nobél mukapatigha kimni eng muwapiq namzat dep köridighanliqini éniqlashqa tirishmaqta.

Norwégiyining anatara agéntliqi, merkizi norwigiyidiki xelq'ara tinchliq inistituti we awstraliyidiki sintrbit torbéti teripidin élip bérilghan bir ray sinashta, hindonéziye hökümiti bilen ache milliy herikiti otturisida tinchliq kélishimi imzalinishida muhim rol oynighan, hindonéziye prézidénti yudhoyono, ache milliy herikiti bilen hindonéziye hökümiti otturisida kélishtürgüchi rol oynighan norwigéyining sabiq prézidénti astihari we Uyghur milliy herikitining rehbiri rabiye qadir xanim bu yilqi nobil tinchliq mukapatigha bolush éhtimalliqi eng küchlük namzatlar bolup otturigha chiqqan.

Uyghur milliy herikitining rehbiri rabiye qadir xanim, shwétsiye parlaméntning ezasi analiy enekson xanim teripidin bu yilqi nobél tinchliq mukapatigha namzat körsitilgen. Enekson nobél komitétigha ewetken xétide rabiye qadir xanimni Uyghur xelqining we ayallar hoquqining tewrenmes qoghdighuchisi dep körsetken.

Xitay hökümiti, rabiye qadir xanimning 2006‏- yilliq nobél mukapatigha namzat körstilgenlikige qattiq naraziliq bildürüp, bu heriketni eyibleshke kéchikmidi. Xitay tashqi ishlar ministirliqining bayanatchisi chin gang béyjingda muxbirlargha bergen bayanatida, rabiye xanimning nobél mukapatigha namzat körsitilgenlikini qattiq tenqid qildi. Chin gang , rabiye qadirni sherqiy türkistan térrorchi küchliri bilen alaqisi bar dep eyiblep, uning nobél tinchliq mukapatigha layiq bir namzat emeslikini ilgiri sürdi.

Lékin xelq'ara tetqiqat merkezliri teripidin élip bérilghan ray sinash netijiliri rabiye qadir xanimning bu yilqi nobél mukapatigha ige bolush éhtmalliqi eng küchlük bolghan üchinchi namzat qilip körsetmekte.

Uyghur milliy herikitining rehbiri rabiye qadir xanim, özining xelq'ara tinchliq instétoti we awstraliye torbéti teripidin élip bérilghan ray sinashta, 2006 ‏- yilqi nobél tinchliq mukapatigha érishish éhtimalliqi eng küchlük namzatlar arisida orun alghanliqidin intayin pexirlen'genlikini bildürdi.