Xitay, rabiye qadirning 2 oghlini resmiy qolgha aldi

• Muxbirimiz erkinning bu heqtiki melumati
• Download story audio

Rabiye qadir xanimning oghli ablikim abduréhim (Uyghur amérika birleshmisi teminligen)

Xitay jama'et xewpsizlik da'iriliri Uyghur kishilik hoquq we démokratiye herikitining rehbiri rabiye qadirning perzentliridin alim abduréhim we ablikim abduréhimlarning resmiy qolgha élinip jinayi jawabkarliqqa tartilidighanliqini, rabiye qadirning qizi roshen'gül abduréhimning a'iliside nezerbend astida élin'ghanliqini jakarlidi.

Uyghur aptonom rayoni da'irilirining resmiy metbu'ati bolghan "tengritagh tori" peyshenbe küni élan qilghan xewiride, alim abduréhim, ablikim abduréhim we roshen'gül abduréhimlar saqchilar bilen hemkarlashmighanliqi we saqchilargha qopalliq qilghanliqi üchün qolgha élin'ghanliqini élan qildi. Lékin xewerde alim abduréhim we ablikim abduréhimlarning hazir qeyerde tutup turuluwatqanliqi tilgha élinmidi.

Saqchilar rabiye qadirning balilirini éghir yarlandurghan

Qadir a'ilisining radi'omizgha ashkarilishiche, saqchilar rabiye qadirning 2 oghlini, qizi, kélini, küy'oghli we 4 newrisini charshenbe küni etigen sa'et 7:00 lerde nensen'ge élip barimiz, dep élip mangghan we saqchilar ulanbaygha kelgende minibusni toxtutup alim abduréhim bilen ablikim abduréhimni urghan.

Saqchilar 30- may küni rabiye qadirning qizi roshen'gül bilen oghulliri alim we ablikim abduréhimlarni nen'gü'en saqchi ponkitigha soliwalghan we a'iliside nezerbend astigha élip, ularning ürümchini ziyaret qiliwatqan amérika dölet mejlisi wekiller ömiki bilen körüshüshini chekligen idi. Bu jeryanda Uyghur aptonom rayoni jama'et xewpsizlik nazariti 3 - bashqarmisining bashliqi esqer, rabiye qadirning perzentlirini "eger biz bilen maslashmisanglar yaki ipadenglarni yaxshilimisanglar silerni weyran qiliwétimiz" dep agahlandurghan. Saqchilar ablikim abduréhimning qaysi doxturxanigha élip bérilghanliqini mexpiy tutmaqta.

Sidiqhaji rozining eskertishiche, ular alim, roshen'gül we 4 newrisining iz dérikini hazirghiche alalmighan.

Xitay metbu'atliridiki bednamlar

Bu bir qaqti - soqti qilish qilmishidur. Ular balilarni görüge éliwélip rabiye qadirning shinjanggha kishilik hoquq élip kélish tirishchanliqini tosimaqchi

Tengritagh tori peyshenbe künki xewiride, "rabiye qadir we uning perzentlirining eqide shirkiti, 1994 - yildin 2004 - yilghiche 8 milyon yü'en baj qachurdi. Tapshurushqa tégishlik 21 milyon yü'en pulni, banka we shexslerning 28 milyon yü'en qerzini hazirghiche tapshurmidu " dep eyibligen. Lékin rabiye qadir xitay da'irilirining bu eyibleshlirini ret qildi. U, jama'et xewpsizlik nazariti 2005 yili 5 - ayda shirketning qanuniy höjjetlirini musadire qilip, shirketning sodisini, banka we xéridarlar bilen bolghan pul - mu'amile alaqisini palech halgha chüshürüp qoydi, deydu. Uning eskertishiche, jama'et xewpsizlik nazariti eqide shirkitining 9 milyon yü'en pulini basuruwalghan.

Rabiye qadir perzentlirining qolgha élinish weqesi amérika tashqiy ishlar ministirliqining diqqitini qozghimaqta. Amérika tashqiy ishlar ministirliqi peyshenbe künki muxbirlarni kütüwélish yighinida rabiye qadirning perzentliri qolgha élinish weqesidin xewer tapqanliqini bildürdi.

Amérika hökümitining inkasi

Amérika tashqiy ishlar ministirliqi bayanatchisi, "men bu heqtiki xewerni kördüm we ministirliqimizning sherqiy asiya bölümige buni sürüshtürüshni hawale qildim. Ular weqeni sürüshtürüwatidu. Biz kéyinrek bu heqte ipade bildürimiz " dédi. Buning aldida amérika tashqiy ishlar ministirliqining bir emeldari fransiye axbarat agéntliqigha " rabiye qadirning perrzentlirining nezerbend astigha élin'ghanliqi we ularning téléfon alaqisi kashiligha uchrighanliqidin ensirewatimiz " dep tekitligen. Amérika tashqiy ishlar ministirliqi bayanatchisining eskertishiche, amérika hökümiti shinjang Uyghur aptonom rayoni bilen biwaste alaqe qilishqa tirishmaqta. Lékin xitayning rayondiki jama'et xewpsizlik organliri weqege baha bérishni ret qilmaqta. Bu ishlargha sheherlik j x idarisi yaki j x nazaritining jawab béreleydighanliqini tekitligen nen'gü'en saqchi ponkitining bir xadimi, "ular bu ishlarni bizge uqturmay qilidu " deydu. Lékin jama'et xewpsizlik nazaritining bir xadimi muxbirimizning bu heqtiki su'allirigha jawap bérishni ret qildi.

Sidiqhaji rozi, saqchilarning qalghan perzend we newrilirini hazirghiche a'iliside nezerbend astida tutuwatqanliqini bildürdi. Rabiye qadirning perzentlirini nezerbend qilish we qolgha élish weqesi xelq'ara kishilik hoquq organlirining tenqidige uchrimaqta.

Xelq'ara kechürüm teshkilati béyjing da'irilirini rabiye qadirning perzendlirini "qaqti -soqti qilmaqta " dep eyiblidi. Kechürüm teshkilatining washin'gtondiki mes'ul xadimi t. Kumar béyjing da'irilirining herikitini "bu bir qaqti - soqti qilish qilmishidur. Ular balilarni görüge éliwélip rabiye qadirning shinjanggha kishilik hoquq élip kélish tirishchanliqini tosimaqchi " deydu. Kumarning tekitlishiche, bu weqe xitayning kishilik hoquqqa hörmet qilish niyiti yoqliqidin direk béridiken. (Erkin)