Rabiye qadir xanim perzentlirini millitidin üstün qoyalmidi

• Muxbirimiz eqidening bu heqtiki toluq melumati
• Download story audio

Rabiye qadir xanimning oghli ablikim abduréhim, alim abduréhim, qahar abduréhim we qizi roshen'gül abduréhim. Xitay da'iriliri yéqinda rabiye xanimning bu oghullirini qolgha alghan. Qizi roshen'gülni nezerbend astida alghan. (A'ile resimi)

Uyghurlarning milliy rehbiri rabiye qadirning perzentlirining, xitay hökümiti teripidin qolgha élinishi we nezerbendke uchrishi, yalghuz rabiye xanimning naraziliqini qozghapla qalmastin, belki pütkül Uyghur jama'etchilikining shuningdek amérika dölet mejlisining we xelq'ara teshkilatlarningmu küchlük naraziliqini qozghidi.

Bu munasiwet bilen d u q gha qarashliq teshkilatlar hemde chet'ellerdiki nurghun döletler xitay hökümitining mezkur qilmishini eyiblidi. Amérika, kanada, gérmaniye, en'gliye, shiwitsiye, norwigiye, gollandiye we türkiye qatarliq döletlerde xitay hökümitige qarshi keyni - keynidin namayish ötküzdi.

Xitay elchixaniliri, konsulxaniliri aldida ötküzülgen daghdughiliq namayishlarda, namayishchilar xitay hökümitidin rabiye xanimning perzentlirini derhal qoyup bérishni telep qilish bilen teng, Uyghur siyasiy mehbuslarningmu derhal qoyup bérilishni telep qildi.

Bir qisim kishiler, rabiye qadir, perzentliri üchün bolsimu, Uyghurlarning siyasiy hoquqi üchün xizmet qilishtin waz kéchishi kérek idi déyishken bolsimu, emma rabiye qadir milliti üchün axirqi nepisigiche bu yolda küresh qilishni dawamlashturidighanliqini bildürdi.

"Ay yultuzluq kök bayraqning bedili" we "dar aldigha yasinip méngish"

Bulardin sirt, Uyghur pa'aliyetchiliri yene, tor betliride " ay yultuzluq kök bayraqning bedili", "dar aldigha yasinip méngish" dégen témilarda maqalilerni élan qilip, rabiye qadir xanimning qehriman, tiz pükmes obrazini medhiyilidi hemde Uyghurlarning öz rehbirini hergiz yalghuz qaldurmaydighanliqini, mezkur Uyghur anisiningmu, öz millitining siyasiy teqdiri üchün özining aniliq méhri ‏- shepqitidinmu waz kéchishke teyyar ikenlikini teriplidi.

"Ay yultuzluq kök bayraqning bedili" namliq maqalide mundaq déyilgen: rabiye qadir xanim bu qétim özining aniliq méhri - shepqitidinmu waz kechti, maldin we jandinmu üstün turghan siyasiy irade, bu qétim yene aniliq ‏- shepqetkimu bash egmidi.

Maqalide yene "rabiye qadir, Uyghur siyasiy iradisining simwoli bolghan ay - yultuzluq kök bayraqning bedilini tölidi, chünki bu muqeddes bayraq qanchilighan Uyghur oghlanlirining pak qanliri bilen, qanchilighan Uyghur anilirining qayghuluq köz yashliri bilen paklanmighan, shunga bu qétim qolimizni köksimizge emes, belki bu muqeddes bayraqqa qoyup, rabiye qadirgha salam bérimiz", déyilgen.

Maqalining axirida mundaq déyilgen: rabiye qadir özining Uyghurlarning meniwiy anisi ikenlikini qayta ispatlapla qalmay, shuning bilen birge, Uyghurlarning siyasiy yolbashchisi ikenlikinimu yene bir qétim namayen qildi. Eger her birimiz xuddi rabiye qadirdek Uyghur siyasiy iradisining muqeddes simwoli bolghan ay - yultuzluq kök bayraqning bedilini töleshke her waqit teyyar turalisaq, shu chaghdila siyasiy teghdirimizni choqum özimiz belgiliyeleymiz.

Rabiye qadir xanimning "wetinimni söyimen, millitimni söyimen, bu yoldiki ölümni ölüm emes toy dep bilimen" dégen sözliri " dar aldigha yasinip méngish" dégen maqalide tilgha élin'ghan bolup, rabiye qadir xanimning ölüm aldida téz pükmes iradisi alahide teriplen'gen.

"Ay yultuzluq kök bayraqning bedili " dégen maqalining aptori, tonulghan Uyghur sha'iri exmetjan osman ependi we "dar aldigha yasinip méngish" namliq maqalining aptori shöhret hoshur ependiler muxbirimiz eqidening ziyaritini qobul qilip, rabiye qadir xanim heqqide toxtaldi.