Рабийә ханим вә паалийәтчиләр хитайниң алим абдуреһимни қолға алғанлиқиға наразилиқ билдүрди

• Мухбиримиз әқидәниң бу һәқтики толуқ мәлумати
• Download story audio

Рабийә қадир ханимниң пәрзәнтлири. Арқа рәт солдин: абликим абдуреһим, алим абдуреһим. Алди рәт солдин: қаһар абдуреһим, рошәнгүл абдуреһим.

Дуня уйғур қурултийиниң рәиси, уйғурларниң мәнивий аниси рабийә қадир ханимниң пәрзәнтлириниң, үрүмчи шәһәрлик оттура сот мәһкимиси тәрипидин охшаш болмиған иқтисадий җаза билән җазалиниши болупму рабийә қадир ханимниң оғли алим абдуреһимниң 7 йиллиқ қамақ җазаси билән түрмигә ташлиниши, ялғуз уйғур җамаәтчиликиниң наразилиқини қозғапла қалмай, хәлқара кишилик һоқуқ тәшкилатлириниңму наразилиқлирини мәйданға кәлтүрмәктә.

Мәркизи нюйорктики кишилик һоқуқни көзитиш тәшкилатиниң тәтқиқатчиси нкулас беклин, бу қилмишниң, рабийә қадир ханимниң уйғур даваси қиливатқанлиқидин өч елиш икәнликини ениқ оттуриға қоюп, мухбирларға "биз сотниң адил болғанлиқидин йетәрлик дәриҗидә гуманлинимиз, шундақла әйибләнгүчиләр қануний вакаләтчиликкә еришәлмиди, дәп қараймиз" деди.

Дуня уйғур қурултийи тәшкилатиниң рәислик вәзиписини йеңила тапшуруп алған рабийә қадир ханим, бир қанчә күндин бери германийиниң мюнхен шәһиридә 15 дөләттин кәлгән уйғур вәкиллири билән бирликтә, мәзкур тәшкилатниң йеңи рәһбәрлик сестимиси вә хизмәт пиланлирини түзүп чиққандин кейин, германийидин айрилип, 28 ‏- ноябир күни белгийидә явропа парламентиниң муавин рәиси башчилиқидики һөкүмәт әмәлдарлири билән көрүшүп, уларға уйғурларниң вәзийитини аңлатқан. Белгийидин телефун зияритимизни қобул қилған рабийә қадир ханим, хитай сотиниң пәрзәнтлири үстидин чиқарған һөкүмигә қаттиқ наразилиқ билдүрди.

Америка демократийини илгири сүрүш тәшкилати, шәрқий асия бөлүминиң директори Louisa Greve ханим, хитай һөкүмитиниң рабийә қадир ханим вә униң аилиси үстидин сиясий бастурмичилиқ қилмиши йүргүзиватқанлқини билдүрди.

"Мениң бу мәсилигә инкасим шуки, мән толиму биарам болдум, хитай һөкүмитиниң рабийә қадирға вә униң аилисигә бир қанчә айлардин бери селиватқан очуқ - ашкара тәһдити ахири нәтиҗисини көрсәтти, хитай һөкүмити пәқәт номус қилмиди. Рабийә қадирниң пәрзәнтлирини қолға елиштин башланған бу өч елиш һәрикити, ахири алим абдуреһимни узун вақит қамаққа ташлаш билән аяқлашти. Бирақ хитай һөкүмити шуни ениқ әстә тутуши керәкки, олимпик тәк хәлқара дәриҗилик мурасимниң саһипханлиқини өз үстигә алған бир чоң дөләт, дуня өлчимигә уйғун һәрикәтләрни елип бериши керәк, болупму кишилик һоқуқ паалийәтчисини һәқсиз җазалаш һәрикитидин өзини тартиши керәк".

Уйғурларниң мәнивий аниси рабийә қадир ханим сөзидә йәнә, хитай һөкүмитиниң олимпик "мурасиминиң саһипи болуш сүпити билән пәрзәнтлири үстидин чиқарған һөкүмни яхши ойлинип бир тәрәп қилишни тәләп қилди.

Дуня уйғур қурултийиниң муавин рәиси мәмәт тохти, хитай һөкүмитиниң бу һәрикитиниң, рабийә қадир ханимни уйғур давасидин тохтитиш үчүн елип бериватқан тәһдит икәнликини билдүрди.