Мән өзәмни хәлқниң дәп ативәткән......

• Мухбиримиз әқидәниң бу һәқтики тәпсили мәлумати
• Download story audio

Мухбиримиз әқидә рабийә қадир ханимни зиярәт қилмақта. 17-январ, реган айродуруми. RFA Köprek resim

Атақлиқ кишилик һоқуқ паалийәтчиси рабийә қадир ханим, 17 - март күни кәч саәт 35 : 10 минут өткәндә, вашингтондики реган хәлқара айродурумиға йетип келип, аилә тавабатлири шуниңдәк уйғур қериндашлириниң қизғин алқиш садалири ичидә күтүвилинди.

Рабийә ханимни күтүвелиш үчүн кәлгүчиләр, әтләс көйнәк, чимән доппиларни кийишкән кийишкән һалда қоллирида гүл вә америка байриқи һәмдә шәрқий түркистанниң ай юлтузлуқ көк байрақлирини тутушуп, тәқәззалиқ ичидә йолучилар чиқидиған ишиккә қарап тәлмүрүшти.

Айропилан қонуштин бурун, биз рабийә қадир ханимниң йолдиши сидиқ һаҗи рози вә униң пәрзәнтлири әқидә, ханзөһрә, қеқинус вә мустафаларни, андин күтүвелиш үчүн айродурумға чиққан уйғурларни зиярәт қилдуқ.

Мана вақит тошти, узундин - узун күтүлгән рабийә ханим америка ташқи ишлар министирлики хадиминиң һәмралиқида йолучилар ишикидин чиқип кәлди.

... Оқушсиз қалған балиларни оқутимән. Йетим болғанларға ата-ана болимән… өз һоқуқиға еришәлмәй бичарә болғанлар үчүн қолумдин келишичә хизмәт қилимән ... Алла маңа қанчилик иқтидар бәрсә, мән шуни өз хәлқим вә өз әвладимға ата қилимән. Мән өзәмгә һәргизму мәнсуп әмәс… мән өзәмни өзәмниң дәп һес қилип баққанму әмәс… мән өзәмни хәлқниң дәп ативәткән….

Көплигән мухбирларниң чирақ нури вә уйғурларниң шуар садаси ичидә чирайидин бираз һодуқуп қалғанлиқи чиқип турған рабийә қадир ханим, икки қолини кәң ечип өзигә етилип кәлгән пәрзәнтлирини бағриға басти. Әтираптики кишиләр өзлирини туталмай көз йеши қилишти.

Мухбирларниң вә кишиләрниң топи арсида қалған рабийә ханимниң чирайидин тәбәссүм җилвиләнди. Мухбирларниң суалиға җавап бәргән рабийә ханим, түрмә ичидә әң хошал болған минутлириниң рафто мукапатиға еришкәнликидин хәвәр тапқан күни болғанлиқини ейтти.

Бир саәткә йеқин давамлашқан дидарлишиштин кейин, рабийә ханим америка уйғур бирләшмисиниң уни күтивилиш үчүн орунлаштурған мәхсус лимозинға һәмрийи сидиқ һаҗи әпәнди вә пәрзәнтлири шуниңдәк бир қисим юртдашлар билән америкиниң вирҗиния шитатидики өзигә елип келинди.

Өзиниң америкиға сақ - саламәт йетип кәлгәнликидин сөйүнгәнликини билдүргән рабийә ханим, өйидики меһманларни йәнә узунрақ олтурушқа дәвәт қилатти. Униңдин айрилғуси йоқлиқини амма униң вақтида арам елишини үмид қилған юртдашлар болса униңға аманлиқ тиләп, кәч саәт 1 әтирапида, бу өйдин айрилишти.

18 - Март күни, чүштин кейин саәт 1 әтрапида, биз йәнә рабийә ханимдин әһвал сораш вә зиярәт қилиш үчүн телефон урдуқ. (Әқидә)