Men özemni xelqning dep atiwetken......


2005.03.18
rabiye-eqide-200.jpg
Muxbirimiz eqide rabiye qadir xanimni ziyaret qilmaqta. 17-Yanwar, régan ayrodurumi. RFA Köprek resim

Ataqliq kishilik hoquq pa'aliyetchisi rabiye qadir xanim, 17 - mart küni kech sa'et 35 : 10 minut ötkende, washin'gtondiki régan xelq'ara ayrodurumigha yétip kélip, a'ile tawabatliri shuningdek Uyghur qérindashlirining qizghin alqish sadaliri ichide kütüwilindi.

Rabiye xanimni kütüwélish üchün kelgüchiler, etles köynek, chimen doppilarni kiyishken kiyishken halda qollirida gül we amérika bayriqi hemde sherqiy türkistanning ay yultuzluq kök bayraqlirini tutushup, teqezzaliq ichide yoluchilar chiqidighan ishikke qarap telmürüshti.

Ayropilan qonushtin burun, biz rabiye qadir xanimning yoldishi sidiq haji rozi we uning perzentliri eqide, xanzöhre, qéqinus we mustafalarni, andin kütüwélish üchün ayrodurumgha chiqqan Uyghurlarni ziyaret qilduq.

Mana waqit toshti, uzundin - uzun kütülgen rabiye xanim amérika tashqi ishlar ministirliki xadimining hemraliqida yoluchilar ishikidin chiqip keldi.

... Oqushsiz qalghan balilarni oqutimen. Yétim bolghanlargha ata-ana bolimen… öz hoquqigha érishelmey bichare bolghanlar üchün qolumdin kélishiche xizmet qilimen ... Alla manga qanchilik iqtidar berse, men shuni öz xelqim we öz ewladimgha ata qilimen. Men özemge hergizmu mensup emes… men özemni özemning dep hés qilip baqqanmu emes… men özemni xelqning dep atiwetken….

Köpligen muxbirlarning chiraq nuri we Uyghurlarning shu'ar sadasi ichide chirayidin biraz hoduqup qalghanliqi chiqip turghan rabiye qadir xanim, ikki qolini keng échip özige étilip kelgen perzentlirini baghrigha basti. Etiraptiki kishiler özlirini tutalmay köz yéshi qilishti.

Muxbirlarning we kishilerning topi arsida qalghan rabiye xanimning chirayidin tebessüm jilwilendi. Muxbirlarning su'aligha jawap bergen rabiye xanim, türme ichide eng xoshal bolghan minutlirining rafto mukapatigha érishkenlikidin xewer tapqan küni bolghanliqini éytti.

Bir sa'etke yéqin dawamlashqan didarlishishtin kéyin, rabiye xanim amérika Uyghur birleshmisining uni kütiwilish üchün orunlashturghan mexsus limozin'gha hemriyi sidiq haji ependi we perzentliri shuningdek bir qisim yurtdashlar bilen amérikining wirjiniya shitatidiki özige élip kélindi.

Özining amérikigha saq - salamet yétip kelgenlikidin söyün'genlikini bildürgen rabiye xanim, öyidiki méhmanlarni yene uzunraq olturushqa dewet qilatti. Uningdin ayrilghusi yoqliqini amma uning waqtida aram élishini ümid qilghan yurtdashlar bolsa uninggha amanliq tilep, kech sa'et 1 etirapida, bu öydin ayrilishti.

18 - Mart küni, chüshtin kéyin sa'et 1 etrapida, biz yene rabiye xanimdin ehwal sorash we ziyaret qilish üchün téléfon urduq. (Eqide)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.