"Dunyaning qehrimanliri" arisida rabiye qadir xanim

2007-09-11
Élxet
Pikir
Share
Print

Rabiye-Bush-Doppa-200.jpg
Prézidént bush 2007 - yili 6 - ayning 4 - küni, chéxning paytexti pragada ötküzülgen xeliq'ara erkinlik we demokratiye yighinida, rabiye qadir xanimning erkinlik üchün töligen bedilini medhiyileydu. UAA Photo

Dunya Uyghur qurultiyining re'isi, Uyghur milliy herikitining rehbiri rabiye qadir xanim bu yil 5 - ayning axirliridin bashlap, gérmaniye, shwétsariye we awistriye metbu'atliri hem t v qanallirida meshhur kishilik hoquq pa'aliyetchisi süpitide keng teshwiq qilinip kelgen. Bolupmu, 6 - ayda "güldürmama" namliq terjimihal esirining neshrdin chiqishi munasiwiti bilen, gérmaniye we qoshna ellerning axbarat wastilirida téximu keng tonushturulghan idi. Rabiye qadir xanim bu bir qanche kündin buyan gérmaniyining her qaysi sheherliridiki kocha élan taxtilirida dunyaning kishilik hoquq qehrimanliri qatarida resimliri bilen yene bir qétim keng kölemde teshwiq qilinishqa bashlidi.

Yette neper meshhur kishilik hoquq pa'aliyetchisi arisida rabiye qadir xanim

Kocha élan taxtilirigha bérilgen resimlik bu teshwiqatning bash témisi "dunyaning qehrimanliri" dégendin ibaret bolup, bu élan'gha rabiye qadir xanim, pablo ependi, wéy jingshing, munira rahman, eren keskin, érina, schwétlana qatarliq dunyadiki yette neper meshhur kishilik hoquq pa'aliyetchisining resimliri bilen birge, ularning qisqiche terjimihali bérilgen.

Rabiye qadir xanimning resimi élanning eng béshigha bashqa resimlerdin bir hesse chong shekilde bérilgen bolup, astigha " rabiye qadir Uyghurlarning kishilik hoquq kürishi bilen shughullinip, 8 yilliq qamaq jazasigha mehkum qilin'ghan" dégen izahat bérilgen. Bu élanlar heqqide d u q ning bash katipi, yawrupa sherqiy türkistan birliki teshkilatining re'isi dolqun eysa ependi öz chüshenchisini otturigha qoyup ötti.

Xelq'ara kechürüm teshkilati rabiye xanimni qollawatqan bir organ

Bu élanlar xelq'ara kechürüm teshkilati teripidin chiqirilghan. Élanning bash qismigha ölüm jazasini emeldin qaldurush, kishilik hoquq depsendichilikige qarshi turushni mezmun qilghan sho'arlar yézilghan. Xelq'ara kechürüm teshkilati 1milyon 800ming ezasi bolghan, dunyadiki hökümetsiz teshkilatlar ichide tesiri eng küchlük, inawiti eng yuqiri, pa'aliyetliri eng janliq teshkilat bolup, uzundin buyan Uyghurlar mesilisige izchil köngül bölüp kelmekte.

Xelq'ara kechürüm teshkilati hazirlighan doklatlar her qaysi döletler hökümetlirining we xelq'aradiki hökümetsiz teshkilatlarning Uyghurlar mesilisini tekshürüp tetqiq qilidighan desturi we birinchi qol matériyali bolup hésablinidu. Mezkur teshkilat rabiye qadir xanimning xitay türmisidin azat qilinishigha zor küch chiqiripla qalmastin, rabiye qadir xanimning nöwette dunyaning her yéride élip bériwatqan siyasiy pa'aliyetlirini orunlashturuwatqan we uni qollawatqan aktip bir organ hésablinidu.

Uyghur milliy herikitige bolghan hésdashliq küchiyidu

Xelq'ara kechürüm teshkilatining rabiye qadir xanim bashchiliqidiki " dunyaning qehrimanliri"ni élan taxtilirida teshwiq qilishidiki meqsidi, bir tereptin dunya jama'itining xelq'ara kechürüm teshkilatining pa'aliyetlirini maddiy we meniwiy tereplerdin qollishini qolgha keltürüsh bolsa, yene bir tereptin xelq'ara kishilik hoquq kürishige hésdashliq qilghuchilarning sanini köpeytish, üchinchi tereptin bolsa, xitaydiki kishilik hoquq depsendichilikige qarshi jama'et küchi hazirlashtin ibaret bolghan.

Xelq'ara kechürüm teshkilati 2008 - yilliq béyjing olimpik musabiqisi munasiwiti bilen xitaydiki kishilik hoquq weziyitini eng qattiq eyiblewatqan bir teshkilat. 2008 - Yilliq béyjing olimpik musabiqisigha bir yil qalghan, pütün dunyaning közi xitaygha tikiliwatqan, xitayning saxta, zeherlik tawarlirigha qarshi nepret pütün yawrupa miqyasida ewj éliwatqan bir chaghda, bu teshwiqatning gérmaniyidiki élan taxtiliridin jay élishi, xitaygha qarshi keypiyatning yenimu bir baldaq örlishige we Uyghur milliy herikitige bolghan hésdashliqning küchiyishige sewebchi bolidiken. (Ekrem )

Pikirler (0)
Share
Toluq bet