Rabiye qadir xanimning shiwét tilidiki kitabining tarqitilish murasimi ötküzüldi

Sürette, rabiye qadir xanim analiye énakson xanimgha uyghur etliside ishlengen yaghliq teqdim qilmaqta.

Rabiye qadir xanimni parlaméntta uchrishishqa orunlashturghan analiye énakson xanimning bildürüshiche, rabiye qadir xanimning bu qétimqi shwétsiye ziyaritining shwétsiyide saylam axirliship yéngi hökümet teshkillen'gen tunji künige toghra kelgenliki Uyghur mesilisining shwétsiye parlaméntida yéngi ümidlerge érishidighanliqining bishariti iken. U radi'o dolqunliri arqiliq saylam mezgilide özige yardemde bolghan Uyghur qérindashlirigha we Uyghur xelqige chin yürektin rehmet éytidighanliqini bildürdi.

Kechte "narin" neshriyatining orunlashturushi buyiche kitabning tarqitilish murasimi bolup ötti. Murasimgha her sahe kishiliridin bolup 200 din artuq kishi qatnashti. Murasim shiwétche we Uyghurche naxsha - muzikilar , tesirlik nutuqlar we qizghin chawaklar bilen dawamlashti.

RFA Photo / Yalqun

Murasim riyasetchisi Uyghur - shiwét munasiwitining tarixini eske élip mundaq deydu: " Uyghurlar bilen shiwétlarning tarixta nahayiti chungqur dostluq munasiwetliri bolghan. Séwin hédin, gunnar yarringlarning sherqi türkistandiki ziyaretliri, shiwét missyonérlirining qeshqer, yerken, yéngisarlardiki doxturxana we mektepliri, Uyghurlar bilen shiwétlar arisida dostluq köwrükini salghan idi. Aridin nurghun yillar ötken bolsimu, bu dostluq zenjiri téxi üzülüp qalghini yoq."

Murasimning éziz méhmini süpitide teklip qilin'ghan rabiye qadir xanim tarixtiki Uyghurlar bilen shiwétlarning dostluqini eske élish bilen birge, Uyghurlar heqqide melumat berdi we özining qiziqarliq hayat sergüzeshtiliri arqiliq murasim ehlini hayajan'gha saldi.
 
Murasim axirida rabiye qadir xanim kitabini sétiwalghuchilargha imza qoyup berdi.

Kitabni neshr qilishqa mes'ul bolghan narin neshriyatining bashliqi lash ependining bildürüshiche, - 8 öktebirdin bashlap bu kitab 48 kitabxanigha birla waqitta sélinidiken.

Shwétsiye radi'osining nobil mukapati heqqidiki munazire programmiliridin melum bolushiche, rabiye qadir xanim bu yilqi nobil tinchliq mukapati namzatliri ichide 10 ning ichige kirgen bolup, nurghun shiwét radi'o anglighuchilar, rabiye qadir xanimni bu mukapatni élishqa eng muwapiq namzat dep qaraydiken.

Yuqiridiki awaz ulinishidin, bu heqtiki melumatimizning tepsilatini anglaysiler.