Rabiye qadir xanimning qizi rahile xanim teywende qizghin alqishqa érishti

Dunya Uyghur qurultyining re'isi rabiye qadir xanimning qizi rahile xanim, mushu ayning 18 - künidin buyan teywende ziyarette bolmaqta. Rahile xanim, teywendiki" ay tughdi" kishilik hoquq teshkilatining, rabiye qadir xanim heqqide ishlen'gen " muhebbetning 10 sherti "namliq höjjetlik filim we shuningdek 5 - iyul naraziliq namayishining bir yilliqi munasiwiti bilen uyushturulghan pa'aliyetlerge qatnishish üchün alahide teklip bilen teywen'ge barghan.
Muxbirimiz eqide
2010-07-20
Élxet
Pikir
Share
Print
Sürette raile xanim teywenlik sahibxanlar bilen birge
Sürette raile xanim teywenlik sahibxanlar bilen birge
RFA Photo

Teywen hökömiti rabiye qadir xanimning 3 yilghiche teywen'ge kélishini chekligen bolup, metbu'atlargha bu heqte öz qarishini bildürgen rahile xanim mundaq dégen": teywen démokratik bir dölet, uning üstige men teywen xelqining köpinchisining erkinliktin waz kéchishni xalimaydighan, démokratiyini we heqiqetni yaqlaydighan bir xelq ikenlikini kördum, shunga ishinimen, dalay lamagha we anamgha bir küni choqum teywen'ge kélish nésip bolidu".

Ay tughdi kishilik hoquq teshkilati, ma yingju hökümitining, junggo kommunist hakimiyet emeldarlirini ikki qollap kütiwilishi, démokratik ellerning himayisige érishiwatqan rabiye qadir xanim we dalay lamadek kishilerning teywen'ge kélishini cheklishi, teywen xelqini qattiq meyüslendürgenlikini bildürdi.

Ziyaritimizni qobul qilghan, ay tughdi teshkilatining mes'uli meshhur teywen naxshichisi Freddy ependi, rahile xanimni teywen'ge ziyaretke teklip qilish sewebi heqqide toxtilip mundaq dédi.

"Sherqiy türkistanda yüz bergen naraziliq herikitige bir yil toshti, bundaq bir muhim künlerde, méningche, teywendimu bu weqege qarita bir pozitsiye bildürülüshi kérek elwette. Bolupmu teywen bir erkin dölet bolush süpiti bilen weqege nisbeten éniq meydanini pütün dunyagha jakarlishi kérek. Rahileni teywen'ge teklip qilishning birinchi sewebi bu, ikkinchi seweb, biz teywende rabiye xanim toghrisidiki " muhebbetning 10 sherti " namliq höjjetlik filimning DVD plastinkisini 5 - iyul harpisida tarqattuq, bu teywen xelqige sherqiy türkistandiki Uyghur xelqining hazirqi weziyitini chüshendüridighan yaxshi bir puset boldi, hazir teywende junggo kommunistik partiyisining Uyghurlar heqqidiki teshwiqatimu nahayiti keng da'iride teshwiq qilinmaqta, shunga biz Uyghurlarning néme oylawatqanliqini, némini kütüwatqanliqini, eng muhimi heqiqiy ehwalni kishilerge toghra anglitishimiz kérek".

Teywende turup ziyaritimizni qobul qilghan rahile xanim, özining teywen ziyaritige, teywen metbu'atliridin bashqa yene, chet'el metbu'atliriningmu alahide qiziqqanliqi, teywen xelqining rabiye qadir xanimning teywen'ge kélishining ret qilinish mesilisige bolghan qarashliri qatarliq mesililer heqqide toxtaldi.

Rahile xanimning teywendiki ziyaretliri heqqide sorighan so'alimizgha jawab bergen Freddy ependi yene mundaq dédi.

"Nahayiti muweppeqiyetlik boldi, bizning oylighinimizdinmu bekrek netijilik boldi, chünki rahile bilen rabiye qadir xanimning nurghun alahidilikliri nahayiti oxshash, ularning her ikkisining özige bolghan ishenchisi küchlük, mijez - xulqi qizghin, küchlük qayil qilish küchige ige, shunga rahileni körgen muxbirlar, hetta teywen ayrodromidiki saqchilar, bixeterlik xadimliri bolsun hemmisi rahileni nahayiti yaxshi kördi. Hemme adem rahileni körüp xushal boldi, muxbirlarni kütüwilish murasimliri intayin qizghin keypiyatta ötküzülgen bolup, barliq metbu'atlar yeni meyli teywen terepdarliri bolsun, yaki junggo terepdarliri bolsun, kimning qaysi terep ikenlikini ayriwilish nahayiti qéyin'gha toxtidi, démekchi bolghinim, keypiyat bekmu yuqiri idi. Rahile teywende xuddi kishiler nahayiti yaxshi köridighan sen'et cholpinigha aylinip qaldi, rahileni körgenla kishi "séning anangmu sanga oxshash xush - chaqchaqmu? " dep soridi, ishqilip rahile qeyerge barsun u qayil qilarliq sözliri bilen özini teywende tonutti".

" Muhebbetning 10 sherti" filimide, rahilening, anisining siyasiy pa'aliyetliri tüpeyli, sherqiy türkistandiki ikki inisining, hetta pütün a'ilisining, xitayning éghir siyasiy bésimigha duch kelgenliki seweblik, éytqan échinishliq sözliri we köz yéshi qilghan körünüshi teswirlen'gen bolup, filimni körgen tamashabinlar rahiledin " siz, aningiz bilen oxshimighan qarashtimu ? " dep sorighan, ra'ile bu heqte toxtaldi.

Yuqiridiki ulinishtin bu progirammining tepsilatini anglighaysiler.
Toluq bet