Rejep tayip erdoghan amérikida ziyarette boldi

Türkiye bash ministiri rejep tayip erdoghan amérika ziyaritini bashilighan bolup, u düshenbe küni aqsarayda prézidént obama bilen körüshti.
Muxbirimiz eqide
2009-12-07
Élxet
Pikir
Share
Print
7 - Dékabir küni, türkiye bash ministiri rejep tayip erdoghan amérika ziyaritini bashilighan bolup, sürette, prézidént obama bilen rejep tayip erdoghan söhbetning axirida qizghin qol élishmaqta.
7 - Dékabir küni, türkiye bash ministiri rejep tayip erdoghan amérika ziyaritini bashilighan bolup, sürette, prézidént obama bilen rejep tayip erdoghan söhbetning axirida qizghin qol élishmaqta.
AFP Photo

Aqsaray, türkiye bash ministiri rejep tayip erdoghanning amérika prézidénti barak obama bilen körüshkende afghanistan, pakistan, iran yadro qorallirining tarqilishining aldini élish, ottura sherqning tinchliq weziyiti we kishilik hoquq mesililiri üstide söhbetlishidighanliqi shuningdek türkiyining ermenistan bilen bolghan munasiwitining normal halgha kélishi hemde qibris mesilisi qatarliq mesililerningmu ikki terepning muzakire témisi bolidighanliqini bildürgen idi.

Türkiye metbu'atliri, erdoghanning istanbul hawa yollirida amérikigha qarap uchushtin burun, bu qétimqi amérika ziyaritining ikki dölet arisidiki munasiwetni kücheytish we ikki dölet hemkarliq da'irisini kéngeytishte muhim rol oynaydighanliqini bildürüp, nato teshkilatigha eza döletlerning afghanistanda esker sanini köpeytish mesilisde türkiyining yéqinda afghanistandiki esker sanini 1750 ge yetküzgenlikini, nöwette buning sirtida yene esker sanini köpeytish mesilisi toghrisida téxi oylashmighanliqini bildürdi.

Erdoghan türkiyining afghanistanda milliy armiye we saqchi terbiyisi üchün ajritidighan mebleghni köpeytidighanliqini tekitligen idi.

Bügün aqsarayda ikki dölet rehbiri 1 sa'et 40 minut söhbet élip bérip, yuqirida tekitlen'gen mesililer üstide muzakirleshti. Söhbetning nahayiti dostane élip bérilghanliqini teswirligen muxbirlar, prézidént obamaning, bash ministir erdoghanni "dostum" dep chaqirghanliqini shuningdek türkiyining afghanistan weziyitini yaxshilash we iranning yadro qorallirini kéngeytish mesilisini hel qilishta muhim rol oynaydighanliqini bildürgenlikini otturigha qoydi.

Bash ministir erdoghan, aqsarayda amérika köngül bölüwatqan iran yadro qoralliri mesilisining diplomatik yollar bilen hel qilinishi üchün, barliq wastilerni ishqa salidighanliqini, "térrorchiliqqa ortaq zerbe bérish" nishanini öz ichige alghan barliq hemkarliqlarni küchlendüridighanliqini bildürdi.

Amérika prézidénti barak obama, türkiye bash ministiri rejep tayip erdoghan we uning hemrahlirini, mu'awin prézidént jow baydin, tashqi ishlar ministiri hillariy kilinton, milli bixeterlik kéngishining re'isi jéymés jonés, tashqi ishlar yardemchi ministiri pul gordon we nato mütexesisi élizabit shérwodrandal qatarliqlar bilen birlikte kütiwaldi.
 

Amérikidiki aktip Uyghur siyasiy pa'aliyetchi adwokat nuri türkel ependi, rejep tayip erdoghanning amérika ziyaritining ehmiyiti, bolupmu türkiyining xelq'arada kündin - kün'ge yüksiliwatqan ornining Uyghur dawasi üchün paydiliq ikenlikini otturigha qoydi.

Rejep tayip erdoghan amérika ziyaritini, türkiyining mu'awin bash ministiri eli babajan, türkiye dölet ministiri egemen baghish, tashqi ishlar ministiri ehmet dawutoghlu we qoralliq qisim bash shitabining mu'awin qomandani aslan güner qatarliq kishilerning hemrahliqida élip barghan bolup, aqsaraydiki söhbetlerdin kéyin, erdoghan washin'gtondiki uniwérsitét we tetqiqat merkezliride nutuq sözligen bolup, washin'gtondiki türk siyasiy iqtisadiy we ijtima'i tetqiqat fondining ottura sherq mesillirige mes'ul xadimi ufuq ulughtash ependi, erdoghanning amérika ziyariti hemde türkiyining Uyghur mesilisidiki meydani toghrisida toxtaldi.

Ufuq ependi sözide, türkiye hökümitining ottura sherq we bashqa rayonlarda tinchliq berpa qilish üchün jiddiy yosunda diplomatik charilerni ishqa séliwatqanliqini, amérika bilen bolghan munasiwette bolsa afghanistan, iran mesilliridin bashqa, ikki döletning soda hemkarliqini kücheytish üchün zor tirishchanliq körsitiwatqanliqini bildürdi. Ufuq ependi sözide yene, türkiye hökümitining nöwette kishilik hoquq weziyitini yaxshilashqa alahide köngül bölüp, xitayni öz ichige alghan xelqige zulum séliwatqan döletlerning siyasitini eyiblesh meydanida ching turuwatqanliqini bildürdi.

Türkiye bash ministiri erdoghan amérika ziyaritidin kéyin, mushu ayning 8 ‏- küni méksika prézidénti félipe kaldéronning teklibige bina'en méksikida ziyaret élip baridu. Erdoghan 10yildin buyan méksikini ziyaret qilghan tunji türk rehbiri bolup, u méksika dölet rehberliri bilen körüshkendin bashqa, méksikidiki meshhur uniwérsitét we soda - sana'etchiler birlikide nutuq sözlep, 10 ‏- dékabir küni türkiyige qaytmaqchi.
 
Yuqiridiki awaz ulinishidin, bu heqtiki melumatimizning tepsilatini anglaysiler.

 
Toluq bet