Kondiliza rayisning asiyadiki sepiri xitayda axirlishidu


2005-03-16
Share
Amérika tashqi ishlar ministiri kondiliza rayis pakistan prézidénti musherref bilen körüshti. AFP

Charshenbe küni asiya döletliridiki ziyaret sepirining 2 - békiti pakistanni ziyaret qilghan amérika tashqi ishlar ministiri kondiliza rayis, islam'abad hökümitidiki prézidént musherrefni öz ichige yuquri derijilik emeldarlar bilen térorizim, yadro qorallarning kéngiyishini cheklesh shundaqla f - 16 belgilik urush ayrupilanlirini sétish mesililiri boyiche söhbet élip baridu. Rayis pakistan'gha kélishning aldida yéngi déhlini ziyaret qildi. U , yéngi déhlida hindistan tashqi ishlar ministiri natwar sing bilen muxbirlarni kütüwélish yighini ötküzüp, hindistan bilen pakistan otturisidiki sürkilishning yumshawatqanliqini qarshi alghan.

Amérika, hindistan bilen iran otturisidiki hemkarliqtin bi'aram

Rayis, hindistan bilen iran otturisidiki gaz turubisi yatquzush kélishimi amérikini pewqullade bi'aram qilmaqta, dep körsetken. U mundaq deydu: " méningche bizning iran heqqidiki bi'aramliqimizhazirqi waqitta téximu chüshünishlik boldi. Biz hindistan hökümiti bilen bizning hindistan iran otturisidiki gaz turubisi hemkarliqidin bi'aram boliwatqanliqimiz toghrisida alaqilashtuq ," dep tekitlidi. Hindistan bilen iran bu yil 2 - ayda ikki dölet otturisigha sommisi 4.5 Milyard dollarliq gaz turubisi yatquzush kélishimi imzalighan. Amérika, iranning yadro qorallargha érishish yolida tirishiwatqanliqini ilgiri sürmekte.

Hindistan, amérikining pakistan'gha qoral sétip bérishige qarshiken

Hindistan tashqi ishlar ministiri sing, amérikining pakistan'gha F – 16 belgilik urush ayrupilani sétip bérish sodisidin yéngi déhlining bi'aram boliwatqanliqini tilgha alghan. Amérika 1990 - yillarda islam'abadning yadro qorallarni tereqqiy qildürüsh pilanigha qarshi pakistan'gha qoral - yaraq imbargosi qoyghan idi. 11 - Séntebir weqesidin kéyin amérika pakistan'gha qoyghan imbargoni bikar qildi.

Rayis, yéngi déhlida hazirche bu mesile boyiche kélishim imzalashning baldurluq qilidighanliqini ilgiri sürgen . Rayis mundaq deydu: " men pakistan'gha barghanda pakistanning mudapi'e jehettiki endishiliri shundaqla mudapi'e ihtiyajliri boyiche söhbet élip baridighanliqimni éytalaymen." U, bu yerde hazirghiche héchqandaq bir kélishim imzalanmighanliqini eskertti. Rayisning bildürüshiche, ular yéngi déhlida hindistan bilen pakistan'gha f - 16 belgilik urush ayrupilanlirini sétip bérish mesililiri boyiche muzakire élip barghan.

Rayis: yawropa xitaygha qoral sétip bérishde chongqur oylishishi kérek

Béyjing, rayisning hindistan, pakistan, afghanistan, yaponiye, jenubiy koriye shundaqla xitay qatarliq 6 döletke qilidighan ziyaritining axirqi békiti. Rayisning asiya döletliridiki sepiri, teywen boghuzidiki weziyetning jiddileshken dewrige toghra keldi. Rayisning xitayda élip baridighan ziyariti koriye yadro qorallar mesilisi, "döletni parchilashqa qarshi turush qanuni" chiqirilghandin kéyinki teywen weziyiti shundaqla kishilik hoquq qatarliq mesililerge chétilishi mumkin.

Rayis, yéngi déhlida " xitayning herbiy qisimlargha teywen'ge qoral ishlitish hoquqi bérishi, yawropa ittipaqi xitaygha qoral - yaraq sétish mesiliside chongqur oylushishigha tégishlik mesile bolup qaldi, dep körsetken. Amérika hökümiti , xitayning "döletni parchilashqa qarshi turush qanuni" ni teywen boghuzining tinchliqi we bixeterliki üchün paydisi, dep qarimaqta. Amma xitay hökümiti amérikining endishirilini orunsiz, dep tenqidlidi.

Amérika afghanistanda uzun - muddetlik herbiy baza qurushni oylashmaqta

Rayisning ziyaret küntertipi bo'iyiche pakistandiki ziyaritining kéyinki békiti afghanistan. U, peyshenbe küni kabulni ziyaret qilidu. U, kabulda prézidént hamid karzay bilen bixeterlik shundaqla afghanistanni qayta qurush qatarliq mesililer boyiche söhbet élip bérishi mümkin. Amérika herbiy da'irilirining ashkarilishiche, amérika afghanistanda uzun - muddetlik herbiy baza qurushni oylashmaqtiken.

Rayis, islam'abadtiki ziyariti jeryanida pakistan bash ministiri shawket eziz, prézidént perwiz musherref, tashqi ishlar ministiri qasurilar bilen söhbet élip bérishi mümkin. Pakistan amérikining térorchiliqqa qarshi turush urushidiki eng halqiliq dölet. Rayis, yéngi déhlida pakistan bilen hindistan rehberlirining ikki dölet otturisidiki sürkilishni peseytish we yarishish yolidiki tirishchanliqini maxtighan. U, hindistan bilen pakistan otturisidiki " söhbetning dawamlishiwatqanliqi shundaqla ilgirlewatqanliqi kishini righbetlendüridu. Biz qolimizdin kélishiche yardemde bolimiz," dep körsetken. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet