Almatida shepqet hemshirisi rizwan'gül xatirilendi

• Ixtiyari muxbirimiz abdullaning bu heqtiki xewiri
• Download story audio

Aldinqi ret otturidikisi rizwan'gül. Chongaytip körüng

15-Féwral küni, almatadiki qazaqistan xelqliri ansambili zalida, qazaqistan Uyghurliri birleshmisining uyushturushi bilen, shepqet hemshirisi qehriman Uyghur qizi rizwan'gül wapatining 60 yilliqi xatirilendi.

Rizwan'gül1926-yili almata wilayitining chilek yézisida tughulghan bolup, kéyin ata-anisi bilen Uyghur élige kelgen we ürümchidiki ikki yilliq bolghaltirlarni terbiyilesh burusida oqughan. 1944-Yili yazda oqushini tamamlighandin kéyin, ghuljigha qaytip kélip xizmetke qatnashqan.

Milliy inqilab bashlan'ghandin kéyin, 18-yashliq rizwan'gül inqilabqa qatniship, 1945-yili 13-yanwar küni urushta yarilan'ghan jengchilerni qutuldurush jeryanida düshmenning oqi bilen yarilinip qurban bolghan we "shepqet hemshirisi" sheripige érishken.

Yighilishta söz qilghan méhriban wahitiwa, sherqiy türkistan hökümitining kündilik organ géziti "azad sherqiy türkistan" gézitining 1945-yili 20-yanwardiki sanida, qasimjan qembirining "inaq" texellusi bilen yazghan "hemshirem" namliq shé'irini diklimatsiye qildi.

Hemshirem

Inaq

Asarettin qutulushqa atlan'ghan, oq, pilimot, bombilardin saqlan'ghan, wetinini düshmenlerdin saqlighan, da'im méning méhribanim hemshirem.

Hey rizwan'gül qongghuraqtek awazing, qizil gülning ghunchisidek jamaling, tarixida untulmaydu ewlatning, qehrimane küreshchan qiz hemshirem.

Hey közlirim peryad qilip yighlighin, dushmenlerdin dostliringni izghighin, düshmen ölüp dost qalsun dep tiligin, dostlar üchün men yighlaymen hemshirem.

Sebir tilep atang bilen ananggha, tarix üchün yazay sanggha mersiye, tarixingni her waraqlap ötkende, sen kélersen köz aldimgha hemshirem.

("Azad sherqiy türkistan" géziti 1945-yili 20-yanwar sani)