Rabiye xanim we amérikidiki Uyghurlardin roza héytliq otluq salam!

Süret, rabiye qadir xanimning erkin asiya radiosi uyghur bölümide muxbirimiz ziyaritini qobul qiliwatqandiki arxip süretliridin biri.

Pütün dunya musulmanlirining ramizan bayrimi qutluq bolsun!

Bügün yeni 9 - séntebir küni, amérika paytexti washin'giton we uning etrapida yashaydighan Uyghurlar bir yerge jem bolup héyt namizini bille oqidi we shundaqla bu ulugh héyt ayem künliride hijrette yashawatqan Uyghurlar bir birige ghéribliq hés qildurmasliq üchün roza héytliq pa'aliyetlerde birge bolup, öz ‏- ara bayramlirini tebrikleshti.

Uyghur milliy herikiti rehbiri rabiye qadir xanim, pütün dunyadiki Uyghurlargha we pütün dunya musulmanlirigha, shuningdek oqutquchi ustazlargha özining yürektin chiqqan tebrikliri bilen bayramliq salamlar yollaydu.

Amérikidiki Uyghurlar bir qeder zichraq olturaqlashqan washin'giton shehiri we uning etrapidiki wirjiniye we meriylen shtatidiki Uyghurlar roza héyt, qurban héytqa oxshash xushalliq bayram künlirini türlük pa'aliyetler uyushturup birlikte ötküzüp kelmekte. 9 - Séntebir küni amérikidiki türk jem'iyiti uyushturghan roza héytliq bayram pa'aliyitide ular yene bir yerge jem bolghan bolup, pa'aliyetke qatnishiwatqan gheyret ependi bu heqte bizge melumat berdi.

Wirjiniye shitatida olturushluq höseyin ependi, amérikidiki Uyghurlarning peqet bügünkidek héyt namizidila emes, ulugh ramizanliq ibadetliride dawamliq weten üchün shéhit bolghan Uyghurlarning rohigha atap du'a tilawet qilip kéliwatqanliqini, shundaqla 5 - iyul weqeside perzentliridin, qérindashliridin ayrilghan Uyghurlargha sebir tileydighanliqini bildürdi.

Muhterem oqurmenler, roza héyt xasiyiti bilen turmushunglargha inaqliq, xatirjemlik, beriket tileymiz. Semimiy salam hem tileklirimiz, meyüs chéhrilerge jilwe, yarilan'ghan köngüllerge illiqliq yetküzgüsi.

Yuqiridiki awaz ulinishidin, bu heqtiki melumatimizning tepsilatini anglaysiler.