Wiladimér putin rusiyining hawa armiye küchini namayish qildi


2007-08-21
Share

Hawada maharet körsitiwatqan rusiye hawa armiyisi, 2007 - yili 11 - awghusttiki 95 yillighini xatirlesh murasimida. "Russian Knights" demonstrate their skill in Monino, during an air show marking the 95th anniversary of the Russian Air Forces, 11 August 2007. AFP PHOTO / MAXIM MARMUR

21- Awghust seyshenbe küni rusiye, zhukowskiy herbiy bazisida 6 kün dawam étidighan xelq'araliq awi'atsiye we alem qatnishi körgezmisini bashlighan bolup, mezkur körgezme rusiye fédératsiyisi qurulghandin buyanqi eng chong awi'atsiye körgezmisi bolup hésablinidiken.

Bu awi'atsiye körgezmisi moskwagha yéqin jaylashqan mexpi herbiy baza zhokowskyde élip bérilghan bolup, échilish murasimida rusiye prézidénti wiladimér putin sözge chiqti we: "bu körgezme bizning herbiy awi'atsiye téxnikisidiki yétekchi ornimizni quwwetlep turuwatidu" dédi. Putin yene, rusiye ayropilan ishlepchiqarghuchi shirketliri, süpiti yaxshi mehsulatlar bilen , yoluchi we transport ayropilanlirining dunyawi awi'atsiye bazirigha aktip qatnishishi kérek, dep körsetti.

Bu awi'atsiye körgezmiside köp yéngiliqlar bolmighan

Melum bolushiche, bu nöwetlik 6 künlük awi'atsiye körgezmiside, rusiye özining ilghar "suxoy" we" mig" tipliq küreshchi ayropilanlarni we S-400 tipliq bashqurulidighan bombilardin mudapi'elinish sistémilirini körgezme qilghan.

Birleshme agéntliqi 21- awghust rusiyidin bergen xewerde amérikining yawropada turushluq hawa armiyisining générali wilyam t. Hobinsning éytqanlirini neqil keltürüshiche, u, "rusiye hawa armiyisining men burun körüp baqmighan ésil ayrupilanliri bar iken. Suxoy , mig tipliq küreshchi ayrupilanlargha nurghun yéngi téxnikilar ishlitilgenlikini kördüm" deydu.

Emma bezi tehlilchiler rusiyining ayrupilanliridiki bu yéngiliqlardin gumansiraydighanliqini bildürgen.

Herbiy analizchi pawél félénhawérning birleshme agéntliqigha bildürüshiche, on yildin buyan rusiye ötküzüp kéliwatqan awi'atsiye körgezmiside köp yéngiliqlar bolmighan bolup u, "rusiyining 'suxoy ' we' mig' tipliq küreshchi ayropilanlirini "köplep ishlepchirishqa kirishtürülmigen oyunchuq ayropilanlar, " dep atidi.

Hazir türkiyide xizmet qiliwatqan ottura siya siyasiy tetqiqatchisi doktur erkin ekrem rusiye herbiy awi'atsiye téxnikisining amérikining herbiy we awi'atsiye téxnikisigha sélishturghanda xéli arqida ikenlikni körsetti we awi'amatkini misal qilip, rus küreshchi ayropilanlirining peqet örlesh taxtisining yardimidila aw'i'amatkidin hawagha kötirileleydighanliqini emma amérikining küreshchi ayropilanlirining awi'amatkidin biwasite hawagha kötirileleydighanliqini körsetti.

Xitay rusiye qorallirining eng chong xéridari

Bu körgezmige dunya boyiche 70 ge yéqin dölet qatnashqan bolup, körgezme ömiki ichide xitay, latin amérika we ereb elliridin kelgenler eng kop salmaqni igileydiken.

Erkin ekremning bildürüshiche, rusiye bilen amérikining qoral- yaraq téxnika sistémisining oxshimaydighan ikki katégoriye yeni warshawa sistémisi we shimaliy atlantik okyan ehdi teshkilati sistémisi ikenlikini, mushu nuqtidin élip éytqanda xitayning rusiyidin qoral yaraq sétiwélishni xalaydighanliqini otturigha qoydi we xitayning bu körgezmige köp adem ewetishning normal ikenlikni körsetti.

Aldinqi hepte rusiye bilen xitay shangxey hemkarliqi teshkilatning qalqini astida birliship élip barghan"tinchliqi burchi2007 "namliq herbiy manéwir ayaghlashqinigha uzun bolmidi. Shu manéwir ayaghlishish aldida 17-awghust jüme küni, rusiye prézidénti wiladimér putin 15 yildin buyan uchushi toxtitilghan uzaq musapilik bombardimanchi ayropilanlarni qaytidin wezipe öteshke salidighanliqini jakarlighan idi.

Doktur erkin ekrem" : rusiyining bu xil siyasetliri amérikigha anche chong yetküzelmeydu"

Putin, rusiyining uzaq musapilik istratégiyilik bombardimanchi ayropilanlarni qayta ishqa kirishtürülishi üstide muxbirlargha, bashqa döletlerning bu xildiki ayropilanlarni ishlitishtin toxtatmighanliqi rusiyige xeter peyda qiliwatqanliqini bildürgen.

Aldinqi hepte rusiyining uzaq musapilik bombardimanchi ayrupilanliri amérikining tinch okyandiki gu'am herbiy bazisigha yéqinlashqan. Emma amérika herbiy terepning bildürüshiche, rus ayrupilanliri agahlandurush bergidek derijide yéqinlashmighan.

Amérika tashqi ishlar ministirliki bayanatchisi si'an mékormék: "erge rusiye bu kona ayropilanlarni élip chiqip qayta uchurushni xalighan bolsa, bu ularning özining qarari" ikenlikni bildürüp, bu jehette amérikining intayin salmaq ikenlikini ipadiligen.

Tetqiqatchi doktur erkin ekrem, rusiyining bu xil siyasetlirining amérikigha anche chong tesir yetküzelmeydighanliqini bildürdi.

Rusiye herbiy we awi'atsiye sana'itini güllendürüsh üchün köplep meblegh salmaqchi

Erkin ekremning bildürüshiche, rusiye néfit we tebi'iy gaz sodisidin alghan paydisigha yenimu ilghar bolghan herbiy téxnikilargha meblegh sélish üchün hazir qolida bar téxnikilirini sétish yolini tutqan iken.

Sowét ittipaqi ghulap chüshkendin kiyin rusiye awi'atsiye sana'itige salidighan mebleghni köplep qisqartqanliqi we gherb elliride yasalghan küreshchi we yoluchi ayropilanlar téxnika ilgharliqi hem layihilinishtiki körkemliki bilen rusiyining ayropilanliridin éship chüshken bolghachqa rusiye awi'atsiye sana'iti chöküshke bashlighan idi.

Rusiye birleshme awi'atsiye sana'iti shirkitini prézidénti alékséy fydorowning bildürüshiche, hökümet rus awi'atsiye sana'itini güllendürüsh üchün 250 milyard dollar meblegh salidiken. (Jüme)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet