Obama - médwédéw uchrishishi yéngi basquchning bashlan'ghanliqini körsitidu

Londonda ötküzülgen 20 dölet bashliqliri yighini peyshenbe küni axirlashti, bu yighin jeryanida amérika prézidénti barak obama rusiye, xitay we bashqa bir qisim döletlerning bashliqliri bilen körüshti. Bolupmu rusiye prézidénti bilen bolghan uchrishishi küchlük inkaslarni qozghidi.
Muxbirimiz ümidwar
2009-04-02
Share
Obama-Medvedev-Xu-305 Londonda ötküzülgen 20 dölet bashliqliri yighini jeryanida amérika prézidénti barak obama rusiye, italiye, xitay we bashqa bir qisim döletlerning bashliqliri bilen körüshken.
AFP Photo

Londonda ötküzülgen 20 dölet bashliqliri yighini peyshenbe küni axirlashti we yighin xulasisi süpitide bir triliyon dollardin artuq meblegh ajritip, dunyani iqtisadiy  krizistin qutuldurushqa pütüshti.

Bu qétimqi yighinda asasliqi pul - mu'amile sahesidiki hemkarliq we kontrolluqni kücheytish, baj sahesini yaxshilash we kücheytish qatarliq muhim témilar muzakire qilinip, körünerlik pikir birliki hasil qilin'ghanliqi melum. En'giliye bash ministiri yighinning xulasisini sözlep, özining dunyawi krizisni hel qilishqa ümidwar ikenlikini izhar qildi.

Yighin bashlinishtin igliri amérika prézidénti rusiye, xitay qatarliq döletlerning bashliqliri bilen körüshken bolup, barak obama bilen rusiye prézidénti dmitriy médwédéwning londonda ötküzülgen 20 dölet yighini jeryanidiki uchrishishi rusiye terepning yuqiri bahalishigha érishti.

Qizghin keypiyattiki uchrishishtin kéyin moskwada ötküzülgen rusiye tashqi ishlar ministirlikining axbarat élan qilish yighinida rusiye tashqi ishlar ministiri wekili andréy néstérénko barak obama bilen dmitriy médwédéwning bu qétimliq tunji uchrishishini yuqiri bahalap, buning ikki dölet arisidiki emeliy hemkarliq asasini sélish mumkinchilikini bergenlikini tekitlesh bilen birge " bu uchrishishning xulasisi kütkendinmu netijilik boldi" dep eskertti.

Amérika awazining rus tilida anglitish béridighan shöbisining élan qilghan xewiridin melum bolushiche, bu qétimqi uchrishishta ikki prézidént rusiye bilen amérikining arisidiki bir qatar hemkarliq sahelirini kücheytish bilen bir waqitta bolupmu, istratégiyilik qorallarni qisqartish mesilisige alahide köngül bolidighanliqini bildürgen.

Rusiye terepning körsitishiche, ikki dölet istratégiyilik qorallarni qisqartish heqqide yéngi bir kélishim hasil qilishi mumkin. Közetküchilerning perez qilishiche, belki bu kélishim arqiliq rusiye bilen amérika arisida prézidént bush we putin dewride ötkürliship ketken bashqurulidighan bombidin mudapi'e körüsh sistémisi mesilisige munasiwetlik ixtilaplargha xatime bérilishi mumkin iken. Chünki, aldinqi bir qanche yil ichide rusiye bilen amérika arisidiki munasiwetler bir qeder soghuqliship qalghan bolup, buningdiki asasliq terep, amérikining sherqiy yawropada bashqurulidighan bombidin mudapi'e körüsh sistémisi ornitish pilani rusiyini xapa qilghan bolup, rusiye terep amérikining chüshenche bérishigha qarimay, buni izchil türde özige nisbeten tehdid hésablap kelgen.

Ikki terep munasiwiti yene shimaliy atlantik okyan ehdi teshkilatining sherqqe kéngiyishi, kosowa musteqilliqi shuningdek rusiyining gruziye bilen urushup, jenubiy ossétiye we abxaziyining musteqilliqini étirap qilishi qatarliq bir qatar xelq'araliq we rayon xaraktérliq mesililerge egiship, téximu ötkürleshken idi.

Rusiyining "newsru" torining xewer qilishiche, obama bilen médwédéwning uchrishishida hazirche bashqurilidighan bombidin mudapi'e körüsh sistémisi mesilisidiki talash - tartish yenila saqlinip qalghan bolup, ikki prézidént bu mesilini ikki hökümetning birlikte muzakire qilishigha qaldurghan. Emma, obama bilen médwédéw afghanistan mesiliside ikki döletning rayonning muqimliqini emelge ashurush üchün yéngidin hemkarlishishqa pütüshken shuningdek yene iranning yadro qorali mesiliside hemkarlishishqa kéliship, buni diplomatiyilik yol bilen hel qilish kérek dégen qarashqa kelgen.

Rusiye metbu'atlirining yézishiche, barak obama prézidént bolghandin kéyin rusiye terep amérika bilen bolghan munasiwetlirini illitish arzusini bildürdi. Prézidént dimitriy médwédewmu bir qanche qétim rusiyining amérika bilen bolghan munasiwitini yaxshilash arzusini bildürgen idi.

Bu qétim médwédéw obamani resmiy türde bu yil iyun éyida moskwani ziyaret qilishqa teklip qildi. Rusiyilikler buningdin kéyin ikki dölet munasiwetlirining güllinish basquchigha kirishi mumkinlikini perez qilishmaqta.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet