Русийиниң өзгәрмәс принсипи немигә әсқатиду?

• Мухбиримиз өмәрҗан тохтиниң бу һәқтики толуқ мәлумати
• Download story audio

2008- Йили 26- феврал күни қатарниң "әл җәзирә" телевизийә қанилида, "косова мустәқиллиқ елан қилғандин кейинки хәлқарадики пикирләр" дегән мавзуда елип берилған сөһбәткә иштирак қилған сүрийилик мәшһур обзорчи доктор исам садиқ косованиң мустәқиллиқини қоллайдиғанлиқи вә русийиниң наразилиқ билдүрүшини қаттиқ әйибләйдиғанлиқини ипадиләп мундақ диди: " русийә баш министириниң муавини демитри медведофниң белградта сөзлигән баянати шуни испатлайдуки, русийиниң башқа милләтләрниңму мустәқил һалда һөр яшишиға қарши туруш сиясити бурунму шундақ иди вә путиндин кейинму өзгәрмәйду.Русийиниң башқа милләтләрни езиш вә уларниңму башқа һөр инсанларға охшаш мустәқил һөр яшишиға җан - җәһли билән қарши туруштин ибарәт бу өзгәрмәс принсипи немигә әсқатиду? зади әсқатқини йоқ. Тарих бәтлирини варақлап көридиған болсақ, буниңға мисаллар көп учрайду.Русийә аталмиш совет иттипақи вақтида түркистан вә балқан районлиридики хәлқләрниң мустәқил яшишиға қарши туруп, уларни қанлиқ бастуруп кәлгәнниң сиртида, хитайдики һазир 'шинҗаң' дәп атилидиған түркий мусулман хәлқлири райониниң икки қетимлиқ мустәқиллиқ иқбалини янҗип ташлиған иди. Совет иттипақи зади буни немә үчүн қилди? буни өзиниң мустәмликиси астидики милләтләрниңму мустәқиллиқ тәләп қилишидин қорқуп шундақ қилди. Әмма совет иттипақиниң парчилиниш вақти йетип келип, русларниң төмүр тапанлири астида езилгән милләтләрниң мустәқиллиқини елишиниң вақти саити келивиди, совет иттипақиниң башқиларни мустәқиллиқтин чәкләштин ибарәт бу өзгәрмәс принсипи һеч немигә әсқатмиди."

Хитай дөлитиму русийидин қелишмайду

Доктор исам садиқ йәнә мундақ диди:"совет иттипақи парчилинип русийә федератсийисигә айланған болсиму, русларниң бу өзгәрмәс принсипи давам қилмақта. Һазирму русийиниң косованиң мустәқиллиқини етирап қилмаслиқи косова хәлқини мустәқиллиқниң һузур - һалавитидин тосуп қалалмайду. Қариши турғанлар қеливериду. Карван алдиға илгириләп кетивериду. Хитайму бу ноқтида русийидин қелишмайду. Хитайму косованиң мустәқиллиқ елан қилғиниға аз дегәндә русийидәк ғәзәпләнгән. Чүнки һәр иккисиниң қорқидиғини қол астидики милләтләрниң мустәқиллиқ дәваси қилип уларниң бешини ағритишидур. Лекин һәр ишниң вақти саити йетип кәлгәндә уларниң бәрибир беши ағримай қалмайду."

Мустәмликичиләрниң тили бир

Доктор исам садиқ йәнә мундақ диди:" әзәлдин мустәмликичиләрниң тили бир болуп кәлгән. Уларниң оттурисида өзлириниң мәнпәәтлирини көзләш йолида башқиларни қурбан қилиштин ибарәт принсип бирлики болғанлиқи үчүн бириниң темиға чалма етилса, йәнә бириниң темиға дәз кетиду. Худди'оғри қорқунчақ келиду' дегәндәк,мустәмликичиләр һәмишә әнсизлик ичидә болғанлиқтин өзлиригә мунасивәтлик болмиған мәсилиләрниму өзлиригә четивалиду. Русийиниң косованиң мустәқиллиқиға қаратқан һазирқи позитсийиси әнә шундақтур. Русийә баш министириниң муавини белградта елан қилған баянатида, русийиниң косова киризиси мәсилисидә һәмишә белград һөкүмити билән биллә икәнликини билдүрди." (Өмәрҗан)