Rusiyining özgermes prinsipi némige esqatidu?

2008-02-29
Élxet
Pikir
Share
Print

2008- Yili 26- féwral küni qatarning "el jezire" téléwiziye qanilida, "kosowa musteqilliq élan qilghandin kéyinki xelq'aradiki pikirler" dégen mawzuda élip bérilghan söhbetke ishtirak qilghan süriyilik meshhur obzorchi doktor isam sadiq kosowaning musteqilliqini qollaydighanliqi we rusiyining naraziliq bildürüshini qattiq eyibleydighanliqini ipadilep mundaq didi: " rusiye bash ministirining mu'awini démitri médwédofning bélgradta sözligen bayanati shuni ispatlayduki, rusiyining bashqa milletlerningmu musteqil halda hör yashishigha qarshi turush siyasiti burunmu shundaq idi we putindin kéyinmu özgermeydu.Rusiyining bashqa milletlerni ézish we ularningmu bashqa hör insanlargha oxshash musteqil hör yashishigha jan - jehli bilen qarshi turushtin ibaret bu özgermes prinsipi némige esqatidu? zadi esqatqini yoq. Tarix betlirini waraqlap köridighan bolsaq, buninggha misallar köp uchraydu.Rusiye atalmish sowét ittipaqi waqtida türkistan we balqan rayonliridiki xelqlerning musteqil yashishigha qarshi turup, ularni qanliq basturup kelgenning sirtida, xitaydiki hazir 'shinjang' dep atilidighan türkiy musulman xelqliri rayonining ikki qétimliq musteqilliq iqbalini yanjip tashlighan idi. Sowét ittipaqi zadi buni néme üchün qildi? buni özining mustemlikisi astidiki milletlerningmu musteqilliq telep qilishidin qorqup shundaq qildi. Emma sowét ittipaqining parchilinish waqti yétip kélip, ruslarning tömür tapanliri astida ézilgen milletlerning musteqilliqini élishining waqti sa'iti kéliwidi, sowét ittipaqining bashqilarni musteqilliqtin chekleshtin ibaret bu özgermes prinsipi héch némige esqatmidi."

Xitay dölitimu rusiyidin qélishmaydu

Doktor isam sadiq yene mundaq didi:"sowét ittipaqi parchilinip rusiye fédératsiyisige aylan'ghan bolsimu, ruslarning bu özgermes prinsipi dawam qilmaqta. Hazirmu rusiyining kosowaning musteqilliqini étirap qilmasliqi kosowa xelqini musteqilliqning huzur - halawitidin tosup qalalmaydu. Qarishi turghanlar qéliwéridu. Karwan aldigha ilgirilep kétiwéridu. Xitaymu bu noqtida rusiyidin qélishmaydu. Xitaymu kosowaning musteqilliq élan qilghinigha az dégende rusiyidek ghezeplen'gen. Chünki her ikkisining qorqidighini qol astidiki milletlerning musteqilliq dewasi qilip ularning béshini aghritishidur. Lékin her ishning waqti sa'iti yétip kelgende ularning beribir béshi aghrimay qalmaydu."

Mustemlikichilerning tili bir

Doktor isam sadiq yene mundaq didi:" ezeldin mustemlikichilerning tili bir bolup kelgen. Ularning otturisida özlirining menpe'etlirini közlesh yolida bashqilarni qurban qilishtin ibaret prinsip birliki bolghanliqi üchün birining témigha chalma étilsa, yene birining témigha dez kétidu. Xuddi'oghri qorqunchaq kélidu' dégendek,mustemlikichiler hemishe ensizlik ichide bolghanliqtin özlirige munasiwetlik bolmighan mesililernimu özlirige chétiwalidu. Rusiyining kosowaning musteqilliqigha qaratqan hazirqi pozitsiyisi ene shundaqtur. Rusiye bash ministirining mu'awini bélgradta élan qilghan bayanatida, rusiyining kosowa kirizisi mesiliside hemishe bélgrad hökümiti bilen bille ikenlikini bildürdi." (Ömerjan)

Pikirler (0)
Share
Toluq bet