" Prézidént putin gherbke qarshi turushta yalghuz qilishi mumkin "


2007-08-02
Share

Rusiyide chiqidighan komiérsant gézitining 25‏- iyul küni xewer qilishiche, rusiye prézidénti wladimiz putin,ötken hepte, rusiye hökümitini qollawatqan rus yashlar herikitining pa'aliyetchiliri we rehberliri bilen ötküzgen söhbitide, gherb döletlirige qarshi nahayiti qattiq teleppuzda söz qilghan. U, gherb dölet mes'ullirining démokratiye toghrisida rusiyige qaratqan tenqidlirini ret qilip, bolupmu rus siyasiy öktichilirige siyasiy panahliq bergen en'gliyini, rusiyide jinayet ishligen kishilerge panahliq bériwatidu dep eyibligen.

Rusiyining gherb döletliri bilen munasiwetliri barghanséri jiddiylishiwatidu

Gherb döletliri bilen munasiwetliri barghanséri jiddiylishiwatqan rusiye prézidénti putinning, kéler hepte shangxey hemkarliq teshkilati teripidin ötküzülmekchi bolghan herbiy manéwirining harpisida gherb döletlirige qaratqan pozitisyisini qattiqlashturghanliqi, mulahizichilerning diqqitini tartmaqta.

Pawel félgen hoyerning merkizi washin'gtondiki jimiz tawn tetqiqat fondi jem'iyiti teripidin neshr qiliniwatqan yawru-asiya kündilik közitish zhurnilida élan qilghan maqaliside bildürüshiche, rusiye prézidénti putining shangxey hemkarliq teshkilatigha eza döletlerning qatnishishi bilen élip bérilidighan herbiy manéwir harpisida gherbke qaratqan pozitisyisini téximu qattiqlashturghanliqi, gherb bilen munasiwetliri künsiéri yiriklishiwatqan ru'isye hökümitining, shangxey hemkarliq teshkilatidin yéngi ittipaqlar qurush üchün paydilinish we shimaliy atlantik okyan ehdi teshkilatigha taqabil turush üchün shangxey hemkarliq teshkilatini küchlendürüshni meqset qilghanliqini körsitidiken.

Shangxey hemkarliq teshkilatining bu qétimqi herbiy manéwiri

Shangxey hemkarliq teshkilatining bu qétimqi herbiy manéwiri bu teshkilat teripidin hazirghiche élip bérilghan eng chong herbiy manéwir bolup, manéwirgha xitay, rusiye, qazaqistan, qirghizistan, tajikistan we özbékistandin 6500 esker we 80 urushchi ayropilan qatnishidiken.

Buningdin sirt rusiye prézidént wladimir putin, xitay dölet re'isi xu jintaw qatarliq shangxey hemkarliq teshkilatigha eza döletlerning dölet bashliqliri, béshkekte ötküzülidighan dölet bashliqliri yéghinidin kéyin, manéwirning ürümchi rayonida élip bérilidighan ikkinchi qismini nazaret qilishni pilanlimaqta.

Mutexessslerning éytishiche, 9‏- awghust künidin 17‏- awghust künigiche rusiyining chilyabnisk rayoni bilen Uyghur élining ürümchi rayonida élip bérilidighan bu qétimqi manéwirgha xitayning 1600 kishilik herbiy qisim urushchi ayropilanliri we yénik ‏- éghir tiptiki qoral-yaraqlar bilen qatnashqanliqi, bolupmu manéwirning ikkinchi qismining urümchi rayonida élip bérilishi üchün jiddiy tirishchanliq körsetkenliki, xitayning bu herbiy manéwir arqiliq Uyghurlargha bir signal bérishni oylashqanliqini körsitidiken.

Rusiye we xitayning sh h t din aldighan paydisi

Démek, xitay hökümiti shangxey hemkarliq teshkilatidin, Uyghur pa'aliyetchilirini basturush, Uyghur milliy herikitining ottura asiya rayonida kéngiyishining aldini élish üchün paydiliniwatqan bolsa, rusiye hökümiti yéngi ittipaqlar qurush we gherb döletlirige taqabil turush üchün paydilinishqa urunmaqta.

Lékin pawel félgen hoyerning maqaliside eskertishiche, gerche wladimir putin shangxey hemkarliq teshkilatini, shimaliy atlantik okyan ehdi teshkilatigha qarshi bir herbiy teshkilatqa aylandurushni oylishiwatqan bolsimu, lékin shangxey hemkarliq teshkilatining bashqa ezaliri gherb bilen döshmenlishini xalimaydiken.

Maqaliside, shangxey hemkarliq teshkilatining eng muhim ezalirining béri bolghan xitayning asasliq meqsitining Uyghur milliy musteqilliq herikitining kéngiyishining we ottura asiyada islamiy heriketlerning küchiyishining aldini élish ikenlikini tekitligen pawel félgen hoyer, prézidént putin gherbke qarshi turushta shangxey hemkarliq teshkilatidiki bashqa döletlerning himayisige érishelmey yalghur qilishi mumkin, dep körsetken . (Ömer qanat)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet