Pütün bayliqini xelqi üchün atiwetken bay


2007-10-15
Share

Bu pütün hayatini japa - musheqqet bilen ötküzüp, bir ömür ishlep pul tapqan we tapqan puli bilen bu dunyaning rahitini tétishtinmu, öz xelqige yardem qilishni üstün körgen we pütün tapqan, tergenlirini xelqi üchün atiwetken bir pidakar shexsning qissisidur.

2006- Yili 12- yanwar küni se'udi erebistanining medine munewwere shehiride wapat bolghan turghunjan hajim mundin 60 yil ilgiri Uyghur élining xoten wilayitidin se'udi erebistanigha hijret qilip kélip yerliship qalghan kishi bolup, turghunjan hajim öz méhniti bilen tijaret qilip béyighan we se'udi erebistanida közge körün'gen baylardin sanilatti.

Bu kishining se'udi erebistanining jidde we mekke mukerreme sheherliride köpligen öy- imaretliri we dukanliri bolup, tapqan pulini öz xelqining éhtiyajliri üchün serp qilishtek ésil xisliti bilen xelq arisida tonulghan nadir shexslerdin idi. Merhum turghunjan hajim wapat bolup kétishi aldida pütün mal - dunyasini öz xelqining menpe'eti üchün weqp qilip ketken.

Abdulla dölet bilen söhbet

Se'udi erebistanining medine munewwere shehiridiki xoten weqp öyining mes'uli ustaz abdulla dölet merhum turghun hajim toghruluq toxtilip mundaq dédi:" merhum turghunjan hajim sherqiy türkistanning xoten wilayitide toghulghan we mundin 60 yil ilgiri bu jaygha hijret qilip kelgen kishi bolup, tijaret bilen béyighan. Emma hayatida héch öylenmigenliktin, uning bayliqigha warisliq qilidighan warisliri yoq idi. Merhum turghunjan hajim xeyr - saxawet ishlirida nahayiti séxiy we merd kishi bolup, Uyghurlardin bolghan ajiz - uruq, péqirlargha hemishe yardem qolini sunatti, meschit we medrise sélish ishlirighimu yardem qilatti. 2005- Yili medine munewwere shehiridiki xoten weqp öyini qayta sélip chiqish ishlirigha 300 ming riyal se'udi erebistani riyali (texminen 80 ming amérika dolliri) i'ane qilghan idi. Kéyinche merhum hayatining axirliship qalghanliqini sezgenmu, jidde we mekke mukerreme sheherliridiki barliq yer - zéminliri, neq pulini öz millitining éhtiyaji yolida weqp qilish pikrige kélip, bashqilargha bu heqte meslihet salghan boldi. Hemmining qollishi bilen bu weqipni emelge ashurdi. Weqipning shertliride merhum turghunjan hajim pütün yer - zéminlirini kiragha qoyup uningdin chiqqan paydilarni toplap Uyghurlar üchün yéngi weqp binalirini sétiwélish, diniy kitablarni neshr qilish, mektep we meschitlerge yardem qilishnimu qoshup qoyghan."

Turghunjan hajimning wapati

Abdulla döletning éytishiche, merhum turghunjan hajim qolidiki pütün bayliqlirini weqp qiliwetkendin kéyin, tijaret ishlirinimu toxtitip, medine munewwere shehirige bérip ibadet bilenla shughullan'ghan bolup, aridin köp waqit ötmestin 2006 - yili 12 - yanwar küni medine munewwere shehiride wapat bolghan. Jinazisi medine munewwere shehiridiki peyghember meschitide oqulup, "Beqi" qebristanliqigha depne qilin'ghan.

Abdulla döletning éytishiche, merhum wapat bolushtin ilgiri mekke mukerreme shehiridin 350 ming riyal ( texminen 95 ming amérika dolliri) gha töt qewetlik bir binani sétiwélip, unimu Uyghurlar üchün weqp qiliwetken. Hazir merhum turghunjan hajim weqpisining yardimi bilen neshr qilinip keng Uyghurlargha tarqitilghan diniy kitablarmu xéli bar iken. Merhumning weqp qilip ketken jimi bayliqi bir milyon amérika dolliridin ashidiken. (Ömerjan)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet