Сәуди әрәбистан һөкүмити хитай чиш пастилирини чәклиди


2007.08.24

Сәиди әрәбистан гезитлириниң 2007- йили 8- айниң 23- күнидики , йәни пәйшәнбә күнлүк хәвиридә, сәуди әрәбистан сода - санаәт министирликиниң сәуди әрәбистанниң барлиқ шәһәр вә районлиридики базарлардин хитайда ишләнгән 7 түрлүк чиш пастисини дәрһал йиғивелиш тоғрулуқ җиддий хәвири елан қилинди.

Хитайда ясалған 7 түрлүк чиш пастиси

Сәуди әрәбистанниң сода - санаәт министирликиниң баянатиға асасланғанда, хитайда ишләнгән вә сәуди әрәбистанниң һәр қайси шәһәр вә районлиридики базарларда сетилған мәзкур 7 түрлүк чиш пастисиниң тәркибидә, "дай исилин глайкол"дәп атилидиған зәһәрлигүчи мадда көп миқдарда арилаштурулған болуп, инсанларниң қоллиниши үчүн интайин хәтәрлик икән.

Сәуди әрәбистанниң йемәк - ичмәкләрни контрол қилиш комитети хитайда ишләнгән мәзкур 7 хил чиш пастисидин нәмунә елип, мәркизий лабораторийидә тәкшүрүп чиққандин кейин, мәзкур чиш пастилирида "дай исилин глайкол"дегән зәһәрлик маддиниң көп миқдарда барлиқи байқалған. Тәкшүрүш доклатида, хитайда ясалған мәзкур 7 түрлүк чиш пастисида инсан һаятиға хәтәрлик болған зәһәрлик маддиниң байқалғанлиқи вә бу чиш пастилирида сәуди әрәбистанда ишлитилип кәлгән нормал чиш пастилирида болушқа тегишлик салаһийәт вә бихәтәрлик шәртлири тепилмиғанлиқи сәвәблик ишлитишкә қәтий болмайдиғанлиқи баян қилинған.

Сәуди әрәбистанниң сода - санаәт министирликиниң баянати

Буниңға бинаән, сәуди әрәбистанниң сода - санаәт министирлики сәуди әрәбистандики пүтүн лабораторийиләр хитайда ясалған һәр қандақ бир чиш пастисини қаттиқ тәкшүрүп, контролдин өткүзмигичә вә зәһәрлик" дай исилин глайкол" маддисиниң бар йоқлуқи тәтқиқ қилинип чиқилмиғичә сәуди әрәбистан базарлириға чиқармаслиқ тоғрулуқ пәрман чүшүргәндин ташқири, хитайниң мәзкур 7 түрлүк зәһәрлик чиш пастисини базарларға салған барлиқ ширкәт вә һәммә муәссәсиләрниң мәзкур чиш пастилирини сетишни тохтитишини, бу зәһәрлик пастиларни бир тәрәп қилишта уларниң һөкүмәт даирилиригә маслишишни, херидарларниңму мәзкур 7 түрлүк чиш пастисини қәтий ишләтмәсликини тәләп қилған.

Баянатниң ахирида, хитайда ишләнгән мәзкур 7 түрлүк чиш пастисини қайсибир магизинда сетилғинини көргәнләрниң сәуди әрәбистан сода - санаәт мупәттиш оргининиң һәқсиз телефон ленийисигә телефон уруп дәрһал хәвәр бериши тәләп қилинған.(Тохти)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.