Se'udi erebistan hökümiti xitay chish pastilirini cheklidi


2007-08-24
Share

Se'idi erebistan gézitlirining 2007- yili 8- ayning 23- künidiki , yeni peyshenbe künlük xewiride, se'udi erebistan soda - sana'et ministirlikining se'udi erebistanning barliq sheher we rayonliridiki bazarlardin xitayda ishlen'gen 7 türlük chish pastisini derhal yighiwélish toghruluq jiddiy xewiri élan qilindi.

Xitayda yasalghan 7 türlük chish pastisi

Se'udi erebistanning soda - sana'et ministirlikining bayanatigha asaslan'ghanda, xitayda ishlen'gen we se'udi erebistanning her qaysi sheher we rayonliridiki bazarlarda sétilghan mezkur 7 türlük chish pastisining terkibide, "day isilin glaykol"dep atilidighan zeherligüchi madda köp miqdarda arilashturulghan bolup, insanlarning qollinishi üchün intayin xeterlik iken.

Se'udi erebistanning yémek - ichmeklerni kontrol qilish komitéti xitayda ishlen'gen mezkur 7 xil chish pastisidin nemune élip, merkiziy laboratoriyide tekshürüp chiqqandin kéyin, mezkur chish pastilirida "day isilin glaykol"dégen zeherlik maddining köp miqdarda barliqi bayqalghan. Tekshürüsh doklatida, xitayda yasalghan mezkur 7 türlük chish pastisida insan hayatigha xeterlik bolghan zeherlik maddining bayqalghanliqi we bu chish pastilirida se'udi erebistanda ishlitilip kelgen normal chish pastilirida bolushqa tégishlik salahiyet we bixeterlik shertliri tépilmighanliqi seweblik ishlitishke qet'iy bolmaydighanliqi bayan qilin'ghan.

Se'udi erebistanning soda - sana'et ministirlikining bayanati

Buninggha bina'en, se'udi erebistanning soda - sana'et ministirliki se'udi erebistandiki pütün laboratoriyiler xitayda yasalghan her qandaq bir chish pastisini qattiq tekshürüp, kontroldin ötküzmigiche we zeherlik" day isilin glaykol" maddisining bar yoqluqi tetqiq qilinip chiqilmighiche se'udi erebistan bazarlirigha chiqarmasliq toghruluq perman chüshürgendin tashqiri, xitayning mezkur 7 türlük zeherlik chish pastisini bazarlargha salghan barliq shirket we hemme mu'essesilerning mezkur chish pastilirini sétishni toxtitishini, bu zeherlik pastilarni bir terep qilishta ularning hökümet da'irilirige maslishishni, xéridarlarningmu mezkur 7 türlük chish pastisini qet'iy ishletmeslikini telep qilghan.

Bayanatning axirida, xitayda ishlen'gen mezkur 7 türlük chish pastisini qaysibir magizinda sétilghinini körgenlerning se'udi erebistan soda - sana'et mupettish orginining heqsiz téléfon léniyisige téléfon urup derhal xewer bérishi telep qilin'ghan.(Toxti)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet