Сәуди әрәбистан ширкәтлири хитай маллиридин шикайәт қилмақта

Хитайда әқлий мүлүк һоқуқиға таҗавуз қилип ишләнгән вә мусадирә қилинған сахта DVD лар.

Сәуди әрәбистанида чиқидиған "әл мәдинә" гезитиниң 2009 - йили 20 - април санида елан қилинған бир мақалиға көрә, бу йил мартниң 15 - күни сәуди әрәбистани тиҗарәт мәркизидә сәуди әрәбистанлиқ мәсуллар билән хитайниң юқири дәриҗилик бир мәсулиниң иштирак қилиши билән чоң йиғин чақирилған болуп, җиддә шәһәрлик сода ишлири мәркизиниң муавин башлиқи васиф кабили сәуди әрәбистанидики бәзи чоң шерикәтләрниң хитайдин кәлгән малларда сахта марка қоллиниш ишиға хатимә беришниң зөрүрликини тәкитлигән. Хитай вәкили болса, сахта марка қоллиниш ишлирини түгитиш үчүн чарә тәдбир қоллинидиғанлиқини билдүргән.
 
Гезиттә ейтилишичә, хитайдин кәлгән маллар сүпәт җәһәттә явропа вә америка қатарлиқ дөләтләргә келидиған малладин алаһидә пәрқлиқ болуп, малларниң сүпәтсиз болғининиң сиртида, бу маллар гаһ маркиси ениқ әмәс, гаһ сахта маркилар билән келип шерикәт вә шәхсләрни зиянға учратмақта икән, һәтта таможна идарисидики мушкилатларға сәвәб болидикән. Бу сәвәбтин сәуди әрәбистанидики чоң шерикәтләр вә бәзи сода комитетлири хитай маллиридин шикайәт қилған.

Йәнә "сәуди әрәбистани телеивизийә қанили" 2009 - йили 20 - април күнидики хәвиридә "явропадики хәтәрлик маддиларниң мәнбии хтай" дегән хәвәрни анлатқан болуп, хәвәрдә ейтилишичә, явропа иттипақи мәсуллири бросселда елан қилған баянатида, явропа базарлирида сетиливатқан маллардики хәтәрлик маддиларниң йүздә 60 пирсәнтиниң мәнбии хитай икәнликини ениқ баян қилған. Баянатта мундақ дейилгән:"өткән бир йил ичидә явропа базарлирида сетиливатқан маллардики хәтәрлик маддилар һәққидә елип берилған тәкшүрүшкә көрә, явропа базарлиридики малларда байқалған хәтәрлик маддиларниң йүздә 60 пирсәнтиниң мәнбии хитай болуп, явропа базарлирида мусадирә қилинғанлири аран 20 прсәнтни тәшкил қилиду. Өткән бир йил ичидә хәтәрлик дәп йиғивелинған һәр хил малланиң түри 1866 гә йәткән.
 
Баянатта йәнә явропа иттипақиниң сода ишлири мәсуллири явропалиқ шеркәтләрни һазирқи иқтисад киризисини баһанә қилип, сүпәтсиз вә өлчәмсиз малларни кәлтүрүшниң ақивитидин агаһландурған.

Сәуди әрәбистанлиқ иқтисадшунаслардин һашим җәбари телевизийә мухбириниң зиянлиқ маддилар болған маллартоғрулуқ сориған соалиға җавап берип мундақ диди:" биз хәтәрлик маддилар бар малларни базарлардин тосушқа әһмийәт бәрмигәндә, киризис үстигә киризис болуп, биз ойлап бақмиған зиянлар келип чиқиши мумкин."