Yawrupa birliki saxta mallar mesiliside xitayni agahlandurdi


2004-11-16
Share

Fransiye axbarat agéntliqining xewirige qarighanda, yawrupa birlikining yéqinda élip barghan bir qétimliq tekshürüshige asaslan'ghanda, ötken yili, yawrupa tamozhnisida tutup qélin'ghan saxta mallarning٪ 60 i xitaydin kelgen bolup, buning omomiy qimmiti besh yérim milyon yawrugha toghra kilidiken.

Xewerge qarighanda, yawrupa birliki bu munasiwet bilen ötken hepte saxta mallargha zerbe béridighan bolupmu eqliy emgek mehsulatlirining patént hoqoqigha xilapliq qilish qilmishlirini ünümlük kontrol qilishni meqset qilghan bir heriket pilanini otturigha qoyghan.

Pilanning asasliq meqsidi

Yawrupa birliki komitéti emeldari'ining bildürüshiche, ularning heriket pilani asasliqi soda shérikliri arisida téxnika hemkarliqini we saxta mallargha zerbe bérishni kücheytishni meqset qilghan. Bu pilan'gha asasen yawrupa birliki séstimliq halda eqliy emgek mehsulatliri we bashqa mehsulatlarning patnént hoqoqigha xilapliq qilmishliri bilen shoghullan'ghan döletlerge qarita, qilche ikkilenmestin qosh tereplime we köp tereplime iqtisadiy jaza yürgüzidiken. Halbuki xitay bolsa bu pilanning merkizi qismigha aylinishi mumkin iken.

Xitay patént hoquqini qoghdashtiki tedbirliri ajiz

Amérika chikago uniwérsitétidiki xitay ishliri we iqtisad mutexessisi yang dali ependi xitayda mehsulatlarning patént hoqoqigha xilap halda markilarni oghrilap ishlitidighan ehwallarning éghirliqini bildürüp, xitay hökümitiningmu bu mesilisini his qilishqa bashlighanliqini körsetti. U mundaq didi:

- Xitay hökümitimu hazir bu mesilini his qilip, saxta mallargha zerbe béridighan tedbirlerni qolliniwatidu. Xitaydiki saxta mallar asasliqi shirketler we bir qisim yerlik hökümet da'irilirining iqtisadiy menpe'etni qoghlashqanliqidin kélip chiqiwatidu.Gerche xitayning hazir iqtisadiy tereqqiyat sür'iti intayin téz bolsimu, biraq kishi béshigha toghra kélidighan daramiti nisbeten yenila töwen. Bundaq shara'itta, hökümetning saxta mallargha zerbe bérishtiki we eqliy emgek mehsulatlirining patént hoqoqini qoghdashtiki tedbirliri ajiz kéliwatidu.

Saxta mallarning xitay – gherb munasiwitidiki orni

Amérika oxey'o shtatliq uniwérsitétining xitay ishliri mutexessisi ren bogung ependi, xitayning saxta malliri mesilisining peqet xitay- yawrupa soda munasiwitidila emes, belki xitay - amérika soda munasiwitidimu bir muhim mesile ikenlikini bildürüp, mundaq didi:

- Xitayning saxta mallirining köpliki hazir yawrupaghila emes, belki amérika we bashqa döletlergimu bash aghriqi élip kéliwatidu. Yawrupada bu mesile hemmidin éghir, xitayning saxta malliri yawrupa bazirida köp salmaqni igelleydu. Nime üchün bundaq bolidu digende, xitayning iqtisadiy tereqqiyati basquchlarni bashtin kechürgen. Deslepte xitay hökümiti nuqul iqtisadiy tereqqiyatni qoghliship, saxta mallargha zerbe bermigen. Buning bilen nurghunlar saxta mal ishlepchiqirip béyighan. Kiyin bolsa, hökümet bir qisim tedbirlerni qollan'ghan bolsimu, biraq kishiler yochuq tépip saxta mallarni ishlepchiqiriwergen. Saxta mal yasash xitayda bir éqimgha aylan'ghan.

Yawropa birlikining éhtiyatchanliqi

Béyjingda ziyarette boliwatqan yawrupa birliki emeldarining bildürishiche, yawrupa birliki gerche iqtisadiy jaza qollinishi mumkin bolsimu, biraq yawrupa birliki bu xil wastini ishlitishtin saqilinishni xalaydiken. Uning yene körsitishiche, yawrupa birliki xitayning ikkkinji chong soda shériki bolup, ikki terepning soda sommisi bu yil ٪ 35 köpeygen. Shuning üchün, xitayning saxta mallar mesilisini yaxshi bir yol bilen hel qilish, ikkila terepning menpe'etige uyghun kélidiken.

Fransiye axbarat agéntliqining melumatlirigha qarighanda, analizchilar nöwette xitayda sétiliwatqan dangliq markiliq mehsulatlarning ٪ 20 ining saxta ikenlikini, saxta mallarning nisbitining yenimu éshiwatqanliqini bildürmekte. Xewerge qarighanda, xitaydin yawrupa bazirigha éqip kirgen saxta mallar asasliqi tamaka, CD pilastinkiliri, kompiyotér yumshaq ditalliri we DVD qatarliqlar iken. (Arzu)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet