Хитайда, сахта дорилар техиму көп адәмләрни һаятидин айримақта

• Мухбиримиз меһрибанниң бу һәқтики мәлумати
• Download story audio

Хитайда кәйни ‏- кәйнидин йүз бериватқан сахта дора мәсилиси кишиләрниң нәпритини қозғаш билән бир вақитта, җәмийәттә бир хил җиддийчиликни пәйда қилмақта. Бундин илгири хитай чичихар иккинчи дора ишләпчиқириш ширкитиниң бир қисим сахта, җан алғу дорилири ашкариланған иди. Узун өтмәй, йеқинда йәнә әнхуй дора завутиниң "шиңфу" йәни "бәхт" маркилиқ дорисиму көплигән бимарларни һаятидин айриди.

Әмәлийәт йошурулған

Сәйшәнбә күни хитай даирилири тәрипидин берилгән хәвәрдин мәлум болушичә, әнхуй хуайүән дора завути ишләпчиқарған "шиңфу" маркилиқ окул дориси түпәйлидин өлгәнләр сани бир нәччә күн ичидила әслидики 4 нәпәрдин 7 нәпәргә көпәйгән шундақла 81 нәпәр бимар мәзкур окулни ишләткәнликтин кесәл әһвали охшимиған дәриҗидә бирдинла еғирлишип кәткән.

Әнгилийә б б с хәвиридә берилгән мәлуматта көрситилишичә, шиңфу маркилиқ дора окули өлүм вәқәсини кәлтүрүп чиқарғандин кейин, хитай дора буюмлирини назарәт қилиш оргини дәрһал буйруқ чүшүрүп, мәзкур дора окулини ишләтмәсликни вә бу һәқтә тәкшүрүш елип бериш керәкликини оттуриға қойған. Лекин бу җәрянда, әнхуй өлкисиниң дора буюмларни назарәт қилиш оргини һәқиқәтни йошурушқа урунған. Хитай яшлар гезитидә берилгән бу һәқтики хәвәрдиму, әнхуй дора буюмларни назарәт қилиш оргининиң мәзкур вәқәдин хели бурунла хәвири бар икәнликини ашкарилап, " немә үчүн әһвални билип туруп, вақтида чарә -тәдбир қолланмайду" дәп мәзкур дора назарәт қилиш оргинини қаттиқ тәнқидлигән.

Әнгилийә б б с радио ‏- телевизийә хәвиридә берилгән мәлуматта билдүрүлүшичә, әнхуй хуа йүән дора ишләпчиқириш завутиниң "шиңфу " маркилиқ бо дора окулини ишләткәнликтин вәқә йүз бәргән өлкиләр, һазирниң өзидила 10 дин ашқан болуп, уйғур елиму буларниң арисида икән.

Уйғур елидиму сақта дора ямримақта

Биз әнхуй дора завутиниң "шиңфу " маркилиқ бу дорисиниң уйғур елидики хәлқниң саламәтликигә елип кәлгән зийини һәққидә мәзкур җайдики дора назарәт қилиш оргини вә һәр қайси дохтурханиларға телефон қилдуқ. Зияритимизни қобул қилған үрүмчи шәһири достлуқ дохтурханисиниң дора бөлүми хадими йеқиндин буян, мәзкур җайда бу һәқтики тәкшүрүшниң күчийиватқанлиқини тәкитләп" телевизорлардиму бу һәқтә уқтуруш қилған, шуңа һазир бизниң дохтурханида бу хил дора окули пәқәт ишлитилмәйду. Лекин башқа дохтурханиларда қандақкин ? буниңға ениқ бир нәрсә дегили болмайду"дәп җаваб бәрди.

Гәрчә биз телефон қилип сүрүштә қилған көп сандики дохтурханилар "шиңфу " маркилиқ бу хил дора окулини ишләтмәйдиғанлиқини һәмдә сахта дориларниңму мәвҗут әмәсликини тәкитләватқан болсиму, зияритимизни қобул қилған бир қисим пуқралар җәмийәттә ямрап кетиватқан сахта дорилардин интайин әндишә қилидиғанлиқини билдүрди. Улар өзлириниң сахта дориларға йолуқуп қелишидин сақлиниш үчүн, адәттә ушшақ -чүшшәк дора понкитлиридин һәргиз дора алмайдиғанлиқини, һәтта зукам вә баш ағриқ дорилириниму мәхсус дохтурханиларға берип дохтурға көрүнүш арқилиқ андин йүрәклик алидиғанлиқини билдүрди.

"Шиңфу " маркилиқ сахта дориға охшаш кишиләрниң саламәтликигә шипалиқ әмәс бәлки зор зиян елип келиватқан дора түрлири бимарлар үчүн һәқиқәтән зор тәһдит болуп, уларниң роһий кәйпиятиғиму зор тәсир көрсәтмәктә. (Меһрибан)