"Xitayning mehsulatlirini tekshürüsh téxnikisi yéterlik emes"


2007.07.24

Xitay ékisport mehsulatlirining bixeterlik mesiliside körüliwatqan nuqsanlar bolupmu , süpetsiz we saxta mallar, amérikida küchlük diqqet qozghawatqan bir peytte, yawrupa ittipaqi béyjingdin bu jehettiki bashqurushni kücheytishni muhimi mehsulatlarning bixeterlikini ashurushni telep qildi.

Xitayning tekshürüsh téxnikisi tereqqi qilghan döletlerning xélila keynide

Bu arida mütexessisler, xitayning mehsulatlarning bixeterlik mesilisige ehmiyet bérishte bir qeder ilgirleshlerni qolgha keltürgenlikini tekitlep, nöwette xitayning tekshürüsh téxnikisi bilen süpet ölchimi qatarliq jehetlerde tereqqi qilghan döletlerning xélila keynide ikenlikini otturigha qoydi.

Yawrupa ittipaqi istimalchilarning menpe'etini qoghdash kométitining mexsus xadimi méglina kuniwa yekshenbe küni, xitayning saxta mehsulat we bixeter bolmighan mehsulatlarni ishlepchiqiridighan zawut karxanilargha zerbe bérishi kéreklikini telep qildi. Yawrupa ittipaqining mezkür xadimi béyjinggha qaratqan 5 künlük ziyariti dawamida yuqiriqi mesililerni otturighan bolsimu , emma xitay da'iriliri yawrupa ittipaqi otturigha qoyghan telepler buyiche ish körüshke bolmaydighanliqini bildürüp kelmekte. Chünki yawrupa ittipaqi otturigha qoyghan telepler ichide éléktronluq buyumlar, balilar oyunchuqi, mashina eswabliri we bashqa nurghun mehsulatlar da saqlan'ghan mesililer otturigha qoyulghan.

Xitayning öz mehsulatlirining bixeterlikini ashurushqa ehmiyet bérishni, saxta mallarning bazargha kirishini qet'iy cheklishini bildürgen kuniwa xanim, yawrupa ittipaqining béyjingdin saxta we ölchemsiz mehsulatlarni tekshürüsh xizmitige hemkarlishishni hetta mehsulatlarni ishlepchiqiridighan zawutlarning her bir séxlirighiche kirip tekshürüp bir terep qilishni ümid qilidighanliqini tekitlidi.

Zeherlik madda bayqalghan saxta chish pastisi

Xelq'ara metbu'atlarda méksikining, ötken hepte kishilerning salametlikige éghir ziyan élip kélidighan ikki xil chish pastisini ishlitilishni qattiq chekligenliki, buning bilen teng en'giliyidimu zeherlik madda bayqalghan saxta chish pastisi bayqalghanliqi élan qilinmaqta.

Xitay chish pastisida zeherlik maddilarning bayqalghanliqi yalghuz chet'ellerdila ashkarilinipla qalmay , belki xitayning özidimu intayin éghir bolup, yéqinda Uyghur ilidiki alawtaw portidin chet'elge ékisport qilinmaqchi bolghan 10 ming yeshikke yéqin chish pastisining ölchemge yetmey, qayturwitilgenlik ehwali meydan'gha chiqqan idi.

Xitay mehsulatlirida mesile éghir körüliwatqan bir peytte , xitay mehsulat süpitini nazaret qilish we tekshürüsh ministirliqining téxnika xadimi ju, chet'el metbu'atlirining ziyaritini qobul qilip, her derijilik organlarning bixeterlik mesilisige alahide köngül bölüwatqanliqini bildürdi.

Téxnika xadim ju muxbirlargha mundaq dédi: "bolupmu bizge oxshash mehsulat süpitini nazaret qilish we tekshürüsh organliri, bir qatar chare tedbirlerni qollinip, dölet ichide mehsulatlarning bixeterlik mesilisini yaxshilash xizmetlirini yaxshi ishleshke kapaletlik qilip kelmekte. Méningche, dunyaning hemmila yéride dégüdek mehsulatlarning bixeterlikide az ‏- tola mesile bar , amérika we yapon'gha oxshash tereqqi qilghan döletlerdimu bu xil ehwallar körülüp turidu.

Mehsulatlar üstide tekshürüsh xizmiti élip baridighan mezkür xadim sözide yene mundaq deydu": birinchidin , bizning téxnikimizning bashqilardin perqliq ikenlikige iqrar qilish kérek, bizning pishiqlap ishlesh, bashqurush, süpetni kontrol qilish jehetlerdiki téxnikimizni yawrupa we amérikigha oxshash tereqqi qilghan döletler bilen sélishturush hazirche anche muwapiq bolmaydu. Ikkinchidin , bizning xadimlirimizning sewiyisi, téxnika küchi bashqilardin xélila töwen , bu emeliyet , biraq shuni eskertip ötüshke toghra kéliduki , bixeterlik mesilisige bolghan qarash we hökümetning bashqurush we nazaret qilish chare ‏- tedbirliri jehette, méningche héchqandaq mesile yoq."

450 Ming pay chaq bixeterlik ölchimige yetmigen

Xitayning organ metbu'ati shinxu'a agéntliqi yéqinda, hökümet tekshürüsh guruppisining xitayning herqaysi jayliridiki 30 shirket teripidin yasiliwatqan 51 xil yük aptomobillirining chaqliri üstide tekshürüsh élip barghanliqini élan qilip, hökümet xadimining sözini mundaq dep neqil keltürdi:" barliq aptomobil chaqlirining hemmisi ölchemge uyghun, texminen 14 % lik kamir ölchemsiz bolup, téz sür'ette mangghanda partlap kétish éhtimalliqi yuqiri, bu xil kamirlar peqet xitayning özidila sétilghan."

Bir qanche hepte ilgiri, amérika qatnash bixeterlik organliri, xitayning ikkinchi chong chaq ishlepchiqirish shirkitining 450 ming pay chaqni, bixeterlik ölchimige yetmigen dep qarap yighiwalghan idi. Biraq , xitay süpet tekshürüsh organliri, chaqlarning amérika bixeterlik ölchimige tamamen uyghun kélidighanliqi heqqide uqturush élan qildi.

Amérika hökümet xadimlirining pat arida béyjingda élip baridighan mehsulatlarning bixeterlikige a'it söhbiti harpisida, ikki xil xitay mehsulati amérika istimalchilar bixeterlikini qoghdash kométiti teripidin yighiwilindi. Yighiwilin'ghan bu ikki xil mehsulatning biri 15 ming dane rahetlinish orunduqi , 220 ming dane ot késish mashinisi iken.

Mütexessisler yene, xitay mehsulatlirining xelq'ara bazardiki abroyining xunuklishishi, uchqandek tereqqi qiliwatqan xitay iqtisadigha selbiy tesir körsitishi müqerrer dep eskertish bilen bille , yéqindin buyan amérikidiki xitay soda baziri we résturanlirining bazirining alahide kasatlashqanliqini tekitlidi. (Eqide)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.