Америка кеңәш палатасида хитай таварлирини тәкшүрүшни күчәйтиш тәләп қилинди

• Мухбиримиз әркинниң бу һәқтики толуқ мәлумати
• Download story audio

Америкиға експорт қилинидиған хитай таварлириниң сүпити вә бихәтәрлики хитай - америка алий дәриҗиликләр сөһбитидә музакирә қилинидиған мәсилә болуп қалди. Президент буш йеқинда хитай дөләт рәиси ху җинтав билән австралийидә көрүшкәндә сүпәт мәсилисини оттуриға қойған, ху җинтав болса сүпәт мәсилигә җиддий қарайдиғанлиқини билдүргән иди. Америка кеңәш палатасида чаршәнбә күни чақирилған бир испат бериш йиғинида, кеңәш палата әзалири таварлардики "хитайда ишләнди " дегән бәлгә агаһландуруш сигнали болуп қалғанлиқини вә хитай таварлирини тәкшүрүшни күчәйтидиған қанун чиқиришни тәләп қилди.

"Хитайда ишләнди" дегән бәлгә агаһландуруш сигнали болуп қалди

Хитай дөләт рәиси ху җинтав өткән һәптә австралийидә президент буш билән көрүшкәндә, хитай експорт таварлирида байқалған сүпәт вә бихәтәрлик мәсилисигә җиддий муамилә қилидиғанлиқини билдүргән шундақла хитай һөкүмити, сәйшәнбә күни вашингтонда өткүзүлгән експорт таварлириниң сүпәт вә бихәтәрлик йиғинида мәһсулатларниң бихәтәрлики вә оюнчуқларға қоғушун ишләтмәсликкә вәдә бәргән болсиму, лекин америка кеңәш палата әзалири йәнила хитай таварлирини тәкшүрүшни күчәйтидиған қанун чиқиришни тәләп қилмақта .

Америка кеңәш палатасиниң хитай експорт қилған оюнчуқлардики бихәтәрлик мәсилиси тема қилинған чаршәнбә күнки испат бериш йиғинида, бәзи кеңәш палата әзалири хитай таварлириниң сүпити вә бихәтәрлик өлчимигә қоюлидиған тәләпни күчәйтидиған қанун бәлгилимә чиқиришни оттуриға қойди. Йиғинда җумһурийәтчи кеңәш палата әзаси сам бровенбәк, таварлардики" 'хитайда ишләнди ' дегән бәлгә агаһландуруш сигналиниң ролини ойнайдиған бәлгә болуп қалди " дәйду. У йәнә, хитай таварлириға тәдбир қоллиниш вақти келип қалғанлиқини әскәртип, бу мәсилә балилар, истималчилар вә әмәк һайванлириниң саламәтликигә мунасивәтлик мәсилә. Буниңда сәвир тақитимиз қалмиди. Буниңға тәдбир қоллинидиған вақтимиз кәлди" дәп көрсәтти.

Карханилар бизниң саламәтлик вә бихәтәрлик өлчимимизгә йетиши керәк

Кеңәш палатаси хитай таварлириниң сүпәт вә бихәтәрлик мәсилиси үстидә испат бериш йиғини чақирған мәзгил, америка истималчилар бихәтәрликини қоғдаш комитетиниң рәиси нәнси норд билән хитай дөләтлик сүпәт тәкшүрүш идарисиниң башлиқи вей чүәнҗуң, вашингтонда хитай експорт таварлириниң бихәтәрликигә капаләтлик қилиш келишими имзалап, хитай балилар оюнчуқлириға қоғушун маддиси ишләтмәсликкә вәдә бәргән мәзгилгә тоғра кәлди.

Кеңәш палатасиниң чаршәнбә күнки испат бериш йиғинида демократик кеңәш палата әзаси дик дурбин хитай карханилирини агаһландуруп, америкилиқлар мәһсулатларниң бихәтәрлик мәсилисидә һәргиз йол қоймайдиғанлиқини әскәртти. У, "биз експорт содиси билән шуғуллинидиған хитай карханилириға шуни әскәртип қоюш лазим, дәп қараймизки, америка бизниң истималчилиримиз вә аилимизниң саламәтлик вә бихәтәрлик мәсилисидә һәргиз йол қоймайду. Карханилар бизниң саламәтлик вә бихәтәрлик өлчимимизгә йетиши керәк " дәйду. Дик дурбин йәнә, оюнчуқларниң бихәтәрлик сестимисини күчәйтиш керәк, дәп қарайдиғанлиқини билдүрди.

Хитай мәһсулатлириниң бихәтәрлик мәсилиси явропа истималчилирини әндишигә селиватқан мәсилә

Хитай мәһсулатлириниң саламәтлик вә бихәтәрлик мәсилиси америкиниңла әмәс, бу йәнә явропаниң диққитини қозғаватқан вә явропа истималчилирини әндишигә селиватқан мәсилидур.

явропа иттипақиниң сәһийә комиссари маркос копириано, әгәр хитай мәһсулатлири явропа пуқралириниң саламәтликигә тәһдит йәткүзсә, иттипақниң хитай маллирини тосайдиғанлиқини чәткә қақмиди. У бейҗиңдики бир қетимлиқ сөзидә, "хитай маллирини чәкләш бизниң ахирқи тәдбиримиз. Лекин бу бизниң кишиләрниң саламәтлики тәһдиткә учриғанда алидиған ахирқи чаримиз " дәп тәкитлигән.

Вей чүәнҗуң бәзи мәһсулатларда мәсилә байқалғанлиқини етирап қилған

Америкиниң Mettal ширкити хитайдин балилар оюнчуқи импорт қилидиған карханиларниң бири болуп, мәзкур ширкәт йеқинқи бир қанчә һәптидин бери бир қанчә қетим америка базиридики бәзи хитай оюнчуқлирини бихәтәрлик сәвәбидин йиғивалған иди.

Америка кеңәш палатасиниң чаршәнбә күнки испат бериш йиғинида Mettal ширкитиниң иҗраийә мудири роберт екерт, истималчиларниң әпу қилишини сориди вә хитайда ясалған оюнчуқларниң бихәтәрлик тәкшүрүши чиңитилғанлиқини билдүрди. У, " бизниң мәһсулатлиримизни ишләпчиқиридиған карханилар Mettal ширкитиниң мәһсулат бихәтәрлик өлчимигә бой сунуши керәк. Бу мәһсулатларни бояшни өз ичигә алиду" дәп көрсәтти.

Mettal Ширкити бәзи оюнчуқларниң сир тәркивидә наһайити көп миқдарда қоғушун байқалғанлиқини вә бу балиларниң саламәтликигә зиян йәткүзидиғанлиқини елан қилип, бу оюнчуқларни йиғивалди. Хитай дөләтлик сүпәт тәкшүрүш идарисиниң башлиқи вей чүәнҗуң, вашингтондики зияритидә бәзи мәһсулатларда мәсилә байқалғанлиқини етирап қилған болсиму, лекин у буниңға икки дөләтниң сүпәт өлчимидики пәрқләр , лайиһиләш җәрянидики сәвәнликләр вә мәтбуатларниң мәсилини көптүрүвитиши қатарлиқлар сәвәбчи болғанлиқини билдүрди. (Әркин)