Amérikida "zeherlik mehsulat" larni import qilishni toxtitish herikiti qozghash chaqiriqi meydan'gha keldi

• Muxbirimiz jümening bu heqtiki toluq melumati
• Download story audio

Yéqindin buyan, balilar oyunchuqi terkibide zeherlik madda qoghushunning miqdari ölchemdin éship kétish mesilisi körün'genliki seweblik, amérika kéngesh palata ezasi shérrod brawn ependi we amérika birleshme polat-tömür ishchilar birleshmisi birlikte " balilirimizni qoghdap, zeherlik mehsulatlarni import qilishni toxtitayli" namliq heriket bashlidi. Amérika awazi radi'osida körsitilishiche, mezkur heriketning asasliq meqsiti bolsa ata- anilarning balilar oyunchuqlirining terkibidiki qoghushunning miqdarini közitip turushta diqqitini qozghash iken.

"Erzan mallargha töleydighan bedel bek yuqiri bolup ketti"

Amérika awazi radi'osida, amérika polat-tömür ishchilar birleshmisi re'isi lé'o gerardning éytqanlirini neqil élip körsitishiche, hazirgha qeder bixeterlik jehette mesile bar import mehsulatlirining amérika bazarlirida tosalghusiz import qilinishida bir nechche türlük sewebler bar iken.

Karxana bashqurushtiki ach közlük, 25, 30 yilliq xata soda siyasiti sewebidin xizmet pursitini chet'ellerge bérip qoyush qatarliqlarning, ötkenki besh yil mabeynide besh milyon etrapidiki xizmet pursitining qoldin kétishige seweb bolghanliqini körsetken lé'o gérard ependi: "shuning bilen ashu mehsulatlarni yasash jeryanimu chet'elliklerge bériwétildi. Netijide nurghunlighan zawut- karxanilar taqilip ketti. Aqiwet, mana biz balilirimizni xeterlik buyumlar arisigha tashlap qoyduq. Mutexessislerning körsitishiche, biz erzan mallarni qoldin bérip qoymasliqimiz kérekmish. Emma bu erzan mallargha töleydighan bedel bek yuqiri bolup ketti" deydu.

Istémalchilarni mehsulatlar terkibidiki qoghushun miqdarini qandaq ölchesh jehette terbiyilesh

Uning qarishiche yene, amérikida sétilghan nachar süpetlik mehsulatlardin bulghan'ghan yémeklik, mesile bar chish pastisi, saxta mashina baloni qatarliqlar bar bolup, ademni eng endishige salidighan yéri, zeherlik ximiyiwi terkibi derijidin tashqiri yuqiri bolghan balilar oyunchuqlirining bolushi iken.

Mezkur birleshme bashlighan " zeherlik import mehsulatlirini toxtitish herikiti" ning asasliq meqsiti amérikiliq istémalchilarni mehsulatlarning terkibidiki qoghushun terkibige nisbeten segeklikini östürüshtin bashqa, istémalchilargha tawar buyumlar terkibidiki qoghushun miqdarini qandaq ölchesh jehette terbiyilesh élip bérish iken.

Bu pa'aliyetni polat ‏- tömür ishchilar birleshmisi bilen birliship bashlighan palata ezasi brawn ependining amérika awazi radi'osida bildürgenlirige qarighanda, bu yil kirgendin buyan amérikida nurghunlighan xitayda ishlen'gen mehsulatlarning yighiwélinishi amérika soda siyasiti bilen munasiwetlik bolupla qalmay, belki yene xitay we amérikining karxaniliri bilenmu munasiwetlik iken.

U mundaq deydu: " amérika karxaniliri xitaygha we yaki üchinchi bir döletke bérip mehsulat pishshiqlap ishlepchiqarmaqchi bolghanda, ular choqum qarshi terep höddigiridin mehsulatlarning tennerxini töwenlitishni telep qilidu. Shundaq iken mehsulatlarning saxtilishishi yaki xeterlik bolup qélish mumkinchilikini éship kétidu."

Hazirgha kelgüche, 20 milyon danidin artuq xitayda ishlen'gen balilar oyunchuqlirini yighiwélish uqturushi chiqirildi

Bu yil 8-awghusttin buyan, amérikidiki eng chong oyunchuq yasash shirkiti mattél, xitayda yasitip özi bazargha salghan balilar oyunchuqliri terkibide ademge ziyanliq zeherlik madda qoghushun bayqalghanliqi üchün, pütün dunya miqyasida omumyüzlük yighiwélish uqturushi chiqarghan idi. Mattél shirkiti, deslepki qétimliqi yighiwélish uqturushini 1- awghust chiqirilghan bolup, shuningdin étibaren hazirgha kelgüche 20 milyon danidin artuq xitayda ishlen'gen balilar oyunchuqlirini yighiwélish uqturushi chiqardi.

Dewri zhurnilining 17 ‏- siéntebirdiki sanida " qorchaq dunyasidiki awarichilik" namliq maqalide körsitilishiche, bu yil pütün dunya miqyasida yighiwélish uqturushi chiqirilghan balilar oyunchuqlirining 80 pirsentini xitaydin import qilin'ghan mehsulatlar teshkil qilidighanliqi otturigha qoyulghan.

Shu seweb bilen, amérikida xitay mallirigha nisbeten bir xil ishenmeslik tuyghusi shekillinishke bashlighan bolup, küz peslidiki bayram mezgili kélishtin ilgiri amérika we yawropada bu yilliq bayramliq balilar oyunchuqlirini sétiwélishta herxil gumansirash tuyghuliri peyda bolushqa bashlidi.

Bu mesilige amérika hökümiti jiddiy qarimaqta

Shuninggha egiship, amérikiliq istémalchilarni qoghdash we balilarning bixeterlikini kapaletke ige qilish üchün 12- séntebir amérika kéngesh palatasida guwahliq bérish yighini chaqirildi hemde bu yighin'gha mattél shirkitining bashliqliri we birqanche yuqiri derijilik xitay emeldarliri chaqirtip kélin'gen idi.

Yighin jeryanida durbén ependi amérika terepning balilar oyunchuqlirining bixeterlikini tekshüridighan organlirining wezipisini ünümlük élip baralmaywatqanliqini otturigha qoyghan.

Yawropadimu bezi xitay mallirini cheklesh pikri meydan'gha kelmekte

2- Öktebir ‏- seyshenbe küni, amérika paytexti washin'gtonda ziyarette boluwatqan yawropa ittipaqi istémalchilar jem'iyiti re'isi mégléna kunéwa, amérika we yawropa ittipaqi xitaydin import qilghan balilar oyunchuqlirida yene bixeterlik mesilisi körülüshtin saqlinish we xéridarlarning ishenchini eslige keltürüsh üchün, yawropa ittipaqi bilen amérika qoshma shtatliri xitayning oyunchuq yasash karxanilirini közitish jeryanida bayqalghan uchurlarni öz ‏- ara almashturush élip bérish kéreklikini tekitligen.

Ötken ayda mégléna kunéwa yawropa parlaméntining soda komitétigha, bixeterlik we süpet ölchemlirige toshmaydighan bir nechche türlük xitay mehsulatlirini cheklesh pikrini otturigha qoyghan idi. (Jüme)