Хитайниң балилар оюнчуқлири сәуди әрәбистани балилири үчүн хәтәр яратмақта


2007.07.23

Хитайлар ясиған балилар оюнчуқлири сәуди әрәбистани базарлирини қаплап кәткән. Нәтиҗидә, бу оюнчуқларниң мутләқ көп қисминиң тәләпкә лайиқ һалда бихәтәр ясалмиғанлиқи сәвәблик хитай балилар оюнчуқлири сәуди әрәбистанидики балилар үчүн чоң хәтәр яратмақта.

Сәуди әрәбистанида чиқидиған "әл рияд"гезитиниң 2007- йили 21- июл санида сәуди әрәбистанидики иқтисад мутәхәссиси доктор абдуләзиз һәсәнниң қәлими билән елан қилинған бир мақалидә йезилишичә, сәуди әрәбистаниға келидиған балилар оюнчуқлириниң %70 и хитайдин келидикән. Сәуди әрәбистани йилиға балилар оюнчуқлири үчүнла аз дегәндә 700 милйон сәуди әрәбистани рияли (тәхминән 200 милйон америка доллири) чиқим қилидикән.

Сәуди әрәбистаниниң хитайдин келидиған балилар оюнчуқлириға болған тәлипи йилдин йилға көпийип берип, йилиға %5 дин ешип кетип бармақта икән. Хусусән балиларниң язлиқ тәтил мәзгиллиридә вә һейт , байрам күнлиридә хитайниң балилар оюнчуқлириға болған тәләп техиму көпийидикән. Буниңға әгишип сәуди әрәбистаниниң һәр қайси җайлиридики мәхсус оюнчуқ базарлириниң сани йилиға % 40 дин көпийип маңған.

Хитайниң балилар оюнчуқлири сәуди әрәбистани базириниң %30 ни тәшкил қилиду

Доктор абдул әзиз һәсән йәнә мундақ дәп язған:" електронлуқ балилар оюнчуқлири сәуди әрәбистан базарлириниң %30 ни тәшкил қилиду. Сәуди әрәбистаниниң һәрқайси җайлиридики оюнчуқ базарлириға бир йил ичидә 3 милйондин көпрәк електронлуқ оюнчуқлар келиду.

Булардин 10 миң тал оюнчуқ тәләпкә лайиқ саналсиму, башқилириниң һәммиси һийлә биләнла ясалған вә бихәтәрлики йоқ оюнчуқлардур. Әһвал шундақ турсиму, сәуди әрәбистанлиқларниң електронлуқ балилар оюнчуқлири үчүн сәрп қилидиған омумий мәбләғ миқдари һәр бир бала бешиға 400 доллардин келиду. Сәуди әрәбистанлиқларниң %60 ниң өйидә аз дегәндә бир яки иккидин електронлуқ балилар оюнчуқи йепилиду."

Доктор абдул әзиз һәсәнниң ейтишичә, пүтүн оттура шәрқтики хитайдин келидиған балилар оюнчуқлири үчүнла сәрп қилинидиған мәбләғ миқдари йилиға бир йерим милярттин ашидикән. Хусусән, әрәб қолтуқи дөләтлири һәмкарлиқ кеңишигә әза дөләтләрдин сәуди әрәбистани, әрәб бирләшмә хәлипилики, бәһрәйн, қатар, кувейт қатарлиқ дөләтләрниң мәхсус балилар оюнчуқлири үчүн сәрп қилидиған мәбләғ миқдари алаһидә юқири икән. Пүтүн әрәб дөләтлиридики балилар оюнчуқлири үчүнла сәрп қилинидиған йиллиқ мәбләғ миқдарини шу мәмликәтләрдики пүтүн балиларға чачқанда, һәр бир бала бешиға 263 доллардин чүшидикән.

Хитайдин кәлгән балилар оюнчуқлири сәвәблик бир йилда 13 бала өлди

Сәуди әрәбистаниниң сүпәт баһалаш комитетиниң йиллиқ доклатиға асасланғанда, хитайдин келидиған балилар оюнчуқлириниң, хусусән електронлуқ оюнчуқларниң сүпити начар вә хәтәрниң алдини елиш нисбитиниң нөл дәриҗидә болғанлиқи сәвәблик нурғун балилар оюнчуқлардин зиянға учриған. 2005- Йили бир йил ичидә електронлуқ оюнчуқлардин келип чиққан хәтәр сәвәблик 13 бала һаятидин айрилған вә 40 миңдин көпрәк бала мейип болған.

Електронлуқ әмәс оюнчуқлардин зиянға учриған балиларниң сани интайин көптур. Бу оюнчуқларда алаһидә агаһландуруш йезилмиғанлиқтин, оюнчуқларниң кичик парчилирини кичик балиларниң ютивелиши сәвәблик йүз бәргән икән. Шундин бери сәуди әрәбистанлиқ мәсуллар чәтәлләрдин, хусусән хитайдин келидиған балилар оюнчуқлириниң бихәтәрликини вә сүпитини тәкшүрүш ишиға алаһидә көңүл бөлидиған болған икән. (Тохти)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.