Xitayning balilar oyunchuqliri se'udi erebistani baliliri üchün xeter yaratmaqta

• Muxbirimiz ömerjan toxtining bu heqtiki toluq melumati
• Download story audio

Xitaylar yasighan balilar oyunchuqliri se'udi erebistani bazarlirini qaplap ketken. Netijide, bu oyunchuqlarning mutleq köp qismining telepke layiq halda bixeter yasalmighanliqi seweblik xitay balilar oyunchuqliri se'udi erebistanidiki balilar üchün chong xeter yaratmaqta.

Se'udi erebistanida chiqidighan "el riyad"gézitining 2007- yili 21- iyul sanida se'udi erebistanidiki iqtisad mutexessisi doktor abdul'eziz hesenning qelimi bilen élan qilin'ghan bir maqalide yézilishiche, se'udi erebistanigha kélidighan balilar oyunchuqlirining %70 i xitaydin kélidiken. Se'udi erebistani yiligha balilar oyunchuqliri üchünla az dégende 700 milyon se'udi erebistani riyali (texminen 200 milyon amérika dolliri) chiqim qilidiken.

Se'udi erebistanining xitaydin kélidighan balilar oyunchuqlirigha bolghan telipi yildin yilgha köpiyip bérip, yiligha %5 din éship kétip barmaqta iken. Xususen balilarning yazliq tetil mezgilliride we héyt , bayram künliride xitayning balilar oyunchuqlirigha bolghan telep téximu köpiyidiken. Buninggha egiship se'udi erebistanining her qaysi jayliridiki mexsus oyunchuq bazarlirining sani yiligha % 40 din köpiyip mangghan.

Xitayning balilar oyunchuqliri se'udi erebistani bazirining %30 ni teshkil qilidu

Doktor abdul eziz hesen yene mundaq dep yazghan:" éléktronluq balilar oyunchuqliri se'udi erebistan bazarlirining %30 ni teshkil qilidu. Se'udi erebistanining herqaysi jayliridiki oyunchuq bazarlirigha bir yil ichide 3 milyondin köprek éléktronluq oyunchuqlar kélidu.

Bulardin 10 ming tal oyunchuq telepke layiq sanalsimu, bashqilirining hemmisi hiyle bilenla yasalghan we bixeterliki yoq oyunchuqlardur. Ehwal shundaq tursimu, se'udi erebistanliqlarning éléktronluq balilar oyunchuqliri üchün serp qilidighan omumiy meblegh miqdari her bir bala béshigha 400 dollardin kélidu. Se'udi erebistanliqlarning %60 ning öyide az dégende bir yaki ikkidin éléktronluq balilar oyunchuqi yépilidu."

Doktor abdul eziz hesenning éytishiche, pütün ottura sherqtiki xitaydin kélidighan balilar oyunchuqliri üchünla serp qilinidighan meblegh miqdari yiligha bir yérim milyarttin ashidiken. Xususen, ereb qoltuqi döletliri hemkarliq kéngishige eza döletlerdin se'udi erebistani, ereb birleshme xelipiliki, behreyn, qatar, kuwéyt qatarliq döletlerning mexsus balilar oyunchuqliri üchün serp qilidighan meblegh miqdari alahide yuqiri iken. Pütün ereb döletliridiki balilar oyunchuqliri üchünla serp qilinidighan yilliq meblegh miqdarini shu memliketlerdiki pütün balilargha chachqanda, her bir bala béshigha 263 dollardin chüshidiken.

Xitaydin kelgen balilar oyunchuqliri seweblik bir yilda 13 bala öldi

Se'udi erebistanining süpet bahalash komitétining yilliq doklatigha asaslan'ghanda, xitaydin kélidighan balilar oyunchuqlirining, xususen éléktronluq oyunchuqlarning süpiti nachar we xeterning aldini élish nisbitining nöl derijide bolghanliqi seweblik nurghun balilar oyunchuqlardin ziyan'gha uchrighan. 2005- Yili bir yil ichide éléktronluq oyunchuqlardin kélip chiqqan xeter seweblik 13 bala hayatidin ayrilghan we 40 mingdin köprek bala méyip bolghan.

Éléktronluq emes oyunchuqlardin ziyan'gha uchrighan balilarning sani intayin köptur. Bu oyunchuqlarda alahide agahlandurush yézilmighanliqtin, oyunchuqlarning kichik parchilirini kichik balilarning yutiwélishi seweblik yüz bergen iken. Shundin béri se'udi erebistanliq mes'ullar chet'ellerdin, xususen xitaydin kélidighan balilar oyunchuqlirining bixeterlikini we süpitini tekshürüsh ishigha alahide köngül bölidighan bolghan iken. (Toxti)