Xitay sayahetchilirining medeniyetsiz qilmishliri yaman tesirlerni peyda qilmaqta


2007-05-09
Share

Xitayning 1 - may altun sayahet heptiliki axirlashti. Xitay da'irilirining xewerlirige qarighanda bu yilliq may sayahet heptiliki sayahetke chiqqan adem sani , sayahetchilik kirimi, sayahet heptiliki oboroti jehetlerde altun sayahet heptiliki yolgha qoyulghandin buyanqi eng yuqiri rékortni yaratqan.

Emma, shuning bilen birge xitay hemde bashqa tillardiki tor betlerdiki mulahizilerdin melumki, bu may sayahet heptilikide xitay sayahetchilerning qedimi tekken sayahet orunliri oxshimighan derijide buzghunchiliqlargha uchrighan. Elwette Uyghur élidiki güzel sayahet orunlirimu buningdin mustesna emes.

Sayahet nuqtiliri buzghunchiliq bedilige sayahettin kirim qilmaqta

Xitay hem Uyghur tor betliridin melum bolushiche, Uyghur éli sayahiti nöwette xitay sayahetchilerning barghanche diqqitini tartqan bolup , bu qétimliq may altun sayahet heptilikide Uyghur élining her qaysi güzel menzirilik sayahet nuqtiliri, nuqtiliq asare ‏- etiqe orunliri hemde alahide sayahet türliri orunlashturulghan jaylar hetta sheher ichidiki baghchilarmu köp sandiki xitay ölkiliridin kelgen sayahetchilerdin terkip tapqan adem déngizigha tolghan.

Shinjang gézitining 8 - maydiki xewiride körsitilishiche , Uyghur éli statistika idarisining besh nuqtiliq sayahet ornida élip barghan tekshürüshining netijiside melum bolushiche, bu bir heptide Uyghur éli xitay ölkiliridin kütiwalghan sayahetchiler sani 844 ming adem‏- qétimgha yetken. Kündilik sayahetchilerning yuqiri basquchida eng köp bolghanda 548 ming 600 adem ‏- qétimgha yetken.

Sayahetchilerning éshishigha egiship gerche bu sayahet heptilikide sayahetchilik kirimi 400milyon yüendin ashqan ‏- sayahetchiler qedimi Uyghur élining bu sayahet nuqtilirigha iqtisadi kirim élip kelgen bolsimu , shuninggha tetür tanasip halda yene ilgirikidinmu éghir derijide bulghinish hem buzghunchiliqlarni qaldurghan .

"Xitay sayahetchilerning muhit saqlash éngi, sapasimu yoq"

Uyghur élidiki tengri köli, qanas köli hemde narat yayliqi qatarliq qayta hasil qilghili bolmaydighan teb'iy menzirilik jayliri alahide nuqtiliq sayahet orunliri süpitide téximu köp ,yeni méhman kütüwélish ölchimidin halqighan halda sayahetchilerni qobul qilishqa mejbur bolghan, sayahet dolquni axirlashqandin kéyinki bu jaylar nöwette exlaqsiz, medeniyetsiz sayahetchilerning qaldurghan exletliri bilen tolghan orunlarni , buzulghan muhitni tüzesh üchün meshghul bolmaqta iken.

Uyghur élidiki melum muhim sayahet nuqtilirining biride muhit qoghdash üchün xizmet qiliwatqanliqigha 27 yil bolghan bir Uyghur kishi nöwette sayahet rayonlirining altun sayahet heptilikide uchrawatqan muhit mesililiri heqqide ziyaritimizni qobul qilip, "xitay sayahetchilerning muhit saqlash éngi, sapasimu yoq," dédi.

Medeniyetsiz sayahetchiler dunyani bizar qilmaqta

Sayahetchilik xitay medeniyitige nisbeten yéngi uqum bolsimu , xitay iqtisadining yüksilishige egiship xitay xelqimu sayahetke chiqishni tézla qobul qildi. Emma, ularda téxi mukemmel sayahet medeniyiti yétilgini yoq , shunga xitay sayahetchilirining tesirimu intayin yaman bolmaqta.

Béyjing kündilik gézitining 30 - april sanida xitay sayahetchilerning obrazi heqqide bérilgen bir maqalide éytilishiche , bezi döletlerdiki sayahet orunliri hemde dem élish we ghizalinish orunlirida mexsus " junggoluq sayahetchiler üchün" dep ayrim rayonlarni belgilep qoyulghan.

Bu qilmish, junggoluqlargha alahide étibar bergenlikning belgisi bolmastin , belki xitay sayahetchilerning yuqiri awazda gep qilip, soqushup, paskina qilip, bashqa sayahetchilerge tesir yetküzüshining aldini élish üchün amalsiz qollan'ghan tedbir iken .

"Junggoluqlar téxi sayahet qilidighan'gha baldur"

Yéqinda yawropada élip bérilghan her qaysi döletlerning sayahetchilirini bahalashqa munasiwetlik rayi sinashta , xitaylar dunya buyiche eng medeniyetsiz sayahetchiler bolup bahalan'ghan.

Xitay sayahetchilerning yuqiri awazda gep qilish, muhit taziliqini asrimasliq, qatnash qa'idilirige, waqitqa ri'aye qilmasliq, urushqaqliq, gül géya , teb'iy haywanatlarni asrimasliq , asare‏ - etiqilerni qoghdimasliq, yimeklerni israp qilish, ammiwiy sorunlarning jimjitliqi , tertipini buzushqa oxshash jem'iyet exlaqigha yad qilmishliri chet'ellerdimu qattiq bizarliq hem seskinish peyda qilghan.

Xitayning iqtisadi bilen xelqning sapasi yeni medeniytining tereqqiyatidiki tengpungsizliq sayahet sahesidimu éniq ipadilinip turghan bolghachqa , bezi xitay mulahizichiliri özlirimu " junggoluqlar téxi sayahet qilidighan'gha baldur " dep otturigha qoymaqta. (Gülchéhre)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet