Америкида дөләт мәҗлиси сайлими


2006-11-07
Share

Әгәр демократлар дөләт мәҗлисиниң икки палатасиниң йәни я авам палатаси яки кеңәш палатасиниң беридә көп санлиқни игилисә, бу демократларға ирақ қатарлиқ нурғун муһим мәсилиләрдә президент бушниң пиланлириниң алдини тосаш имканийитини беридикән. Лекин ақсарай сайламниң нәтиҗисиниң һәмдә ирақ уруши мәсилисидә елип бериливатқан рай синаш нәтиҗилириниң қандақ болушидин қәтинәзәр, ираққа қаратқан сияситиниң өзгәрмәйдиғанлиқини билдүрмәктә.

Икки партийә оттурисидики дәталаш

Америка муавин президенти дек чийни йәкшәнбә күни и б с телевизийисигә бәргән баянатида, көп санлиқ хәлқ ирақтики урушни қоллимаслиқи мумкин. Әмма тоғра икәнликигә ишәнгән сияситимизни давамлаштуривиримиз, деди. Президент буш болса дүшәнбә күни йәнә 2002 - йилидики дөләт мәҗлиси сайлими вә 2004 ‏- йилидики президент сайлимида ишләткән сөзлирини ишлитип, демократларни хәлқара террочилиққа қарши урушта ишәнгили болмайдиған кишиләр дәп көрсәтти.

Сиясий мулаһизчиләрниң ейтишичә, ирақтики вәқәләрниң сайламда җумһурийәтчиләр үчүн сиясий бир тосалғу икәнлики ениқ, шуңа президент буш һөкүмити сайлам үчүн елип берилған тәшвиқат паалийити җәрянида демократларни тәслимийәтчи дәп көрситишкә һәмдә саддам һөсәйинниң өлүм җазасиға һөкүм қилинғанлиқини америкиниң ирақтики ғәлибиси қилип көрситишкә тиришқан.

Демократлар болса, америка хәлқи арисида ирақ уруши тоғрисида күнсери күчийиватқан наразилиқтин пайдилинип, җумһурийәт партийисиниң америка дөләт мәҗлиси үстидики сиясий манаполийисигә хатимә беришкә тиришти.

Ирақтики вәзийәт бу қетимқи сайламниң асаслиқ темисини тәшкил қилған

Ирақтики тоқунушларниң үзлүксиз давамлишиши, ирақта өлүватқан америка әскәрлири саниниң күнсери көпийиши, президент буш һөкүмитиниң ирақтики кризистин чиқиш үчүн һазирғичә ениқ бир пилан оттуриға қоймиғанлиқи, америкида ирақ урушиға болған наразилиқиниң күнсери күчийишигә сәвәб болмақта. Ирақ уруши, уруштин кейинки ирақни қайтидин қуруш үчүн сәрп қилинған пул миқдари 340 милярд долларға йәткән. Мутәхәссисләр ирақта оттура һесаб билән һәр айда 100 америка әскири вә 4000 ирақ сақчи вә әскириниң өлүватқанлиқини, қанчилик ирақ пуқрасиниң өлүватқанлиқиниң ениқ әмәсликини билдүрмәктә. Лекин мушунчилик иқтисадий зиян вә қурбанларға қаримай, ирақтки вәзийәтниң яхшлинидиғанлиқи һәққидә һечқандақ бир бишарәтниң көрүлмигәнлики һәтта вәзийәтниң техиму начарлишиш еһтималлиқиниң барлиқи америка хәлқи ичидә ирақ урушиға болған наразилиқни техиму күчәйтмәктә. Шуңа ирақтики вәзийәт бу қетимқи сайламниң асаслиқ темисини тәшкил қилған. Һәтта бәзи мутәхәссисләр бу қетимқи сайламниң ирақ уруши үчүн бир баһалаш болуп һесаблинидиғанлиқини билдүрмәктә. Аваз ташлаш сандуқлири әттигән саәт 6 дә ечилған болуп, аваз бериш ахшам саәт 6 гичә давамлишиду. Сайлам ишлири хадимлири вә мутәхәссисләр индияна, оһайо, ниюҗирси, калорадо вә филорида штатлиридики електронлуқ аваз бериш машинилирида бәзи мәсилиләр чиққанлиқини билдүрди.

Бу қетимқи сайламда америка дөләт мәҗлиси авам палатасиниң 435 әзаси вә кеңәш палатасиниң 33 әзаси һәмдә 33 штатниң валийлири сайлап чиқилиду. Әгәр сайламда демократлар ғәлбә қилса, бу уларниң 1994‏- йилидин бери тунҗи қетим дөләт мәҗлисидә көп санлиқни игилиши болуп һесаблинидикән. Демократларниң дөләт мәҗлиси авам палатасида көп санлиқни игилиши үчүн 15 орун вә кеңәш палатасида контроллуқни қолға кәлтүрүш үчүн 6 қошумчә орунға игә болуши керәк икән. (Қанат)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт