Senuber sen'et ömiki konyada oyun körsetti

Jalalidin rumining qebrisi we en'eniwiy türk medeniyet puriqini saqlap qélishi bilen, türkiyining eng qedimiy sheherliridin biri hésablinidighan konya shehiride toqquzinchi nöwetlik xelq'ara mistik muzika féstiwali ötküzüldi.
Ixtiyari muxbirimiz erkin tarim
2012-09-28
Share
senuber-senet-omiki-305.png Senuber sen'et ömiki ezaliri türkiyede
RFA/Erkin Tarim


22 - Séntebirdin 30 - séntebirgiche ötküzülidighan bu muzika féstiwali 2004 - yilidin béri konya sheherlik hökümet teripidin oyushturulup kelgen bolup, bu qétimqi pa'aliyet konya sheherlik hökümet, selchuq uniwérsitéti, konya sheherlik kültür - sayahet bashqarmisi qatarliq organlarning birlishishi arqiliq ötküzülgen. Konya xelq'ara mistik muzika féstiwali dunya mistik muzika féstiwalliri ichidiki eng ammibab we chong tiptiki féstiwallardin biri hésablinidu. Féstiwalda körgezme qilin'ghan muzikilar ochuq konsért bolup, bélet tarqitilmaydu. Xelq ammisi pütün dunyaning herqaysi jayliridiki sen'etkarlar élip kelgen mistik muzikilardin hozurlinip qedimiy tüske ige bolghan konya shehiride xuddi özlirini téximu qedimiy chaghlargha bérip qalghandek hés qilidu.

Toqquzinchi nöwetlik xelq'ara mistik muzika féstiwaligha ili xelq naxshilirini wayigha yetküzüp orunlap elge tonulghan dangliq naxshichi senuber tursun we senuber tursun sen'et etritidiki bashqa artislarmu qatnashti. Senuber tursun sen'et etriti senuber tursun, hesen tursun, hüsen tursun we mijit yunuslar teripidin qurulghan shexsiy sen'et etriti bolup, hesen we hüsen tursunlar senuberning qérindishi, mijit yunus bolsa shinjang sen'et inistitutining oqutquchisidur.

Iran, bulghariye, afghanistan, chéx jumhuriyiti, sherqiy türkistan, giruziye, hindistan qatarliq döletlerdin kelgen muzika etretliri orunlighan mistik muzikilar oxshashmighan kültürlerning namayendisi süpitide sayahetchiler we yerlik xelqni özige jelp qiliwaldi. Konsértlar herküni kech sa'et toqquzda jalalidin rumi kültür merkizi we sama zalida élip bérildi. Bolupmu, 27 - séntebir küni senuber muzika etriti teripidin satar, duttar we temburlar bilen orunlan'ghan Uyghur muqam muzikiliri we senuberning mungluq awazi tamashibinlarni hang - tang qaldurdi.

27 - Séntebir künidiki konsértqa konya, qeyseri, istanbul qatarliq jaylardin kelgen Uyghurlardin bashqa konya xelqi, türkiyining bashqa sheherliridin kelgen türk xelqi we bashqa döletlerdin bolup texminen besh yüzdin oshuq tamashibin qatnashti.

Bu konsértni anglighan, qurban qudayning oghli konyadiki atélla qoday ependi konsért heqqidiki tesiratini anglatti.

Atélla qoday ependi sözide, türk xelqining Uyghur naxshilirini söyüp anglaydighanliqidiki seweb, ikki xelqning sen'et menbesining bir ikenlikini körsitip berdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet