Se'udi erebistan padishahi süriye mesilisi heqqide axirqi sözini sözlidi

Elwette islam döletliriningmu bu wehshiylikke qarshi pikir-qarashliri bolup, hemmisi dégüdek süriyidiki qirghinchiliqni eyiblimekte.

Se'udi erebistan hökümiti süriye hakimiyitini qan töküshning aqiwetliridin köp qétim agahlandurghan bolsimu, süriye tereptin ijabiy inkas bolmidi. Shuning bilen se'udi erebistan hökümiti özining süriyidiki bash elchisini qayturup ketti. Shu küni se'udi erebistan padishahi abdulla süriye hakimiyitini qattiq eyiblidi we süriye xelqige “Silerge qiliniwatqan jinayetlerni din we exlaq qobul qilmaydu” dédi.

Londonda chiqidighan“Ottura sherq”gézitining 2011-yili8-awghust sanida élan qilin'ghan bir maqalide padishah abdullaning süriye hakimiyitige we süriye xelqige qaritip sözligen nutuqliri tepsiliy neqil qilin'ghan we padishah abdullaning süriye hakimiyitini artuq qan töküshning yaman aqiwetliridin agahlandurghanliqi yézilghan.

Süriye hakimiyitining aldida ikkila yol bar

Maqalide mundaq dep yézilghan:“ Se'udi erebistan padishahi abdullaning süriye mesilisi heqqidiki nöwettiki nutqi hemmini rahetletti, xususen süriyidiki heqqaniyetchilerge küch béghishlidi. Emeliyette padishah abdullaning bu nutqi özining bir musulman emeldari süpiti bilen süriye xelqi üchün diniy hem insaniy burchini ada qilghanliqi déyishke bolidu. Chünki se'udi erebistanning ereb we islam elliridiki nopuzi we hörmiti chong bolup, bu memliketning süriye xelqi terepte turghanliqi bashqa musulman memliketliri üchün ülgilik yaki bashlamchiliq rolini oynaydu. Padishah abdulla süriyidiki namayishlarda hayatidin ayrilghanlarni shéhitler dep atidi we süriye hakimiyitining aldida ikki yoldin bashqa yol qalmighanliqini, bu ikki yolning biri, xelqning telipini orundash we öltürüshni toxtitish, yene biri mushu qattiq qolluq siyasiti seweblik peqetla tügishish ikenlikini eskertti.”

Se'udi erebistan padishahining nöwettki nutqi türkiye bash ministiri rejeb tayyib erdughan bilen türkiye tashqi ishlar ministiri ehmed dawud oghlining teklipining özidur. Démek, se'udi erebistan hökümitimu süriye mesiliside, süriye xelqige hésdashliq qilishta we süriye hakimiyitige bolghan naraziliqta türkiye jumhuriyiti bilen oxshash pikirde déyishke bolidu.