Сәвр вә чидам һәққидә

Сәвр қилиш вә чидамлиқ болуш һәр қандақ бир адәмдә болушқа тегишлик есил әхлақ вә алийҗанаб пәзиләтләрниң бири.
Мухбиримиз өмәрҗан тохти
2009-01-22
Share

Сәвр билән чидам инсан өзиниң роһи вә нәпси хаһиши билән күрәш қилиш арқилиқ еришидиған гүзәл әхлақ болуп, бир һәдистә:" һечкимгә сәврдин артуқ вә кәң совға берилгини йоқ" дәп кәлгән. Чүнки сәврчанлиқ билән чидам инсанниң пишип йетилгәнликиниң аламитидур.

Сәуди әрәбистаниниң мәккә мукәррәмә шәһиридә турушлуқ яш алим абдулла һаҗим бу һәқтики сөһбитимизни қобул қилған иди.

Абдулла һаҗим билән сөһбәт

Абдулла һаҗим сәврчан болушниң мәниси һәққидә тохтилип мундақ деди: " сәвр қилиш көңүл һавайи - һәвәсни вә гунаһ ишларни қилишни иштиһа қилип турсиму, әқилниң нидасиға қулақ берип, бундақ ишлардин өзини тартиш, азар, күлпәтләргә, оңушсизлиқларға, кесәлликләргә, намратлиққа, мусибәтләргә вә балайи - апәтләргә чидашлиқ берип, өзини йоқатмаслиқтур. Һәқиқий сәвр инсанни гунаһ, мәсийәтләрдин тосиду вә у ишларни қилмаслиққа үндәйду. Һәқиқи сәвр вә чидамға игә болған адәм һаятида учриған чоң синақлар алдида тит - тит болмайду, гаңгирап қалмайду, тәқдирдин ағринмайду, әксичә уни аллаһниң синиқи дәп чүшинип, қийинчилиқни йеңиш вә синақтин өтүш үчүн күч сәрп қилиду. Сәвр көплигән кишиләр чүшәнгәндәк, наһәқчиликкә, зулумға вә яманлиққа көз юмуп җим туруш дегәнлик әмәс, әксичә, яманлиқни қайтуруш, зулумни йоқ қилиш вә һәққанийлиқни җари қилдуруш үчүн һармай - талмай ишләш вә бу йолда чидамлиқ болуш сәврниң җәвһиридур."

Сәврниң әһмийити

Абдулла һаҗим сәврниң әһмийити тоғрулуқ йәнә мундақ деди:" инсан реал турмушта тәқдирниң нурғун синақлириға учрайду. Бәзилири шу оңушсизлиқларға вайсап тәқдирдин вә замандин ағриниду, синақлар алдида тәмтирәйду, буни һәргизму аллаһ тәрипидин кәлгән синақ дәп қаримайду. Нәтиҗидә шу синақлардин өтәлмәй бир өмүр қаймуқиду. Бәзиләр болса синақ вә күлпәтләргә дуч кәлгән вақитта, бу синақ вә күлпәтләрни йеңиш үчүн барлиқ сәвәбләрни вә тиришчанлиқларни көрситиш билән биргә аллани әсләйду, униңдин ярдәм сорайду. Нәтиҗидә аллаһ униң мушкилатлирини асанлаштуруп, синақлардин өтүшкә ярдәм қилиду һәмдә униң сәвр қилғанлиқиға вә чидамлиқ болғанлиқиға катта әҗир вә саваб бериду. Бу һәқтә қуран кәримдә:" сәвр қилғучиларға әлвәттә, уларниң қилған әмәлидинму яхширақ саваб беримиз" дәп көрситилгән."

Чидамлиқ болуш үчүн сәврчан болуш керәк

Абдулла һаҗимниң ейтишичә, чидамлиқ болуш турмушқа адил қарайдиған кишиләрниң шоари, пишип йетилгән кишиләрниң турмуш мизани болуп, сәвр билән бир орунда туриду. Лекин уни әмәлгә ашуруш сәврни әмәлгә ашуруштин қийин. Шуңа чидамлиқ болуш үчүн сәврчан болуш керәк. Сәвр чидамниң муқәддимиси вә нәтиҗисидур.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт