Sewr we chidam heqqide

Sewr qilish we chidamliq bolush her qandaq bir ademde bolushqa tégishlik ésil exlaq we aliyjanab peziletlerning biri.
Muxbirimiz ömerjan toxti
2009-01-22
Share

Sewr bilen chidam insan özining rohi we nepsi xahishi bilen küresh qilish arqiliq érishidighan güzel exlaq bolup, bir hediste:" héchkimge sewrdin artuq we keng sowgha bérilgini yoq" dep kelgen. Chünki sewrchanliq bilen chidam insanning piship yétilgenlikining alamitidur.

Se'udi erebistanining mekke mukerreme shehiride turushluq yash alim abdulla hajim bu heqtiki söhbitimizni qobul qilghan idi.

Abdulla hajim bilen söhbet

Abdulla hajim sewrchan bolushning menisi heqqide toxtilip mundaq dédi: " sewr qilish köngül hawayi - hewesni we gunah ishlarni qilishni ishtiha qilip tursimu, eqilning nidasigha qulaq bérip, bundaq ishlardin özini tartish, azar, külpetlerge, ongushsizliqlargha, késelliklerge, namratliqqa, musibetlerge we balayi - apetlerge chidashliq bérip, özini yoqatmasliqtur. Heqiqiy sewr insanni gunah, mesiyetlerdin tosidu we u ishlarni qilmasliqqa ündeydu. Heqiqi sewr we chidamgha ige bolghan adem hayatida uchrighan chong sinaqlar aldida tit - tit bolmaydu, ganggirap qalmaydu, teqdirdin aghrinmaydu, eksiche uni allahning siniqi dep chüshinip, qiyinchiliqni yéngish we sinaqtin ötüsh üchün küch serp qilidu. Sewr köpligen kishiler chüshen'gendek, naheqchilikke, zulumgha we yamanliqqa köz yumup jim turush dégenlik emes, eksiche, yamanliqni qayturush, zulumni yoq qilish we heqqaniyliqni jari qildurush üchün harmay - talmay ishlesh we bu yolda chidamliq bolush sewrning jewhiridur."

Sewrning ehmiyiti

Abdulla hajim sewrning ehmiyiti toghruluq yene mundaq dédi:" insan ré'al turmushta teqdirning nurghun sinaqlirigha uchraydu. Beziliri shu ongushsizliqlargha waysap teqdirdin we zamandin aghrinidu, sinaqlar aldida temtireydu, buni hergizmu allah teripidin kelgen sinaq dep qarimaydu. Netijide shu sinaqlardin ötelmey bir ömür qaymuqidu. Beziler bolsa sinaq we külpetlerge duch kelgen waqitta, bu sinaq we külpetlerni yéngish üchün barliq seweblerni we tirishchanliqlarni körsitish bilen birge allani esleydu, uningdin yardem soraydu. Netijide allah uning mushkilatlirini asanlashturup, sinaqlardin ötüshke yardem qilidu hemde uning sewr qilghanliqigha we chidamliq bolghanliqigha katta ejir we sawab béridu. Bu heqte qur'an kerimde:" sewr qilghuchilargha elwette, ularning qilghan emelidinmu yaxshiraq sawab bérimiz" dep körsitilgen."

Chidamliq bolush üchün sewrchan bolush kérek

Abdulla hajimning éytishiche, chidamliq bolush turmushqa adil qaraydighan kishilerning sho'ari, piship yétilgen kishilerning turmush mizani bolup, sewr bilen bir orunda turidu. Lékin uni emelge ashurush sewrni emelge ashurushtin qiyin. Shunga chidamliq bolush üchün sewrchan bolush kérek. Sewr chidamning muqeddimisi we netijisidur.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet