Уйғур тәшкилатлири қәшқәрдә өлүмгә һөкүм қилинған уйғурлар һәққидә баянат елан қилди

• Мухбиримиз шөһрәт һошурниң бу һәқтики толуқ мәлумати
• Download story audio

Бу йил 8 ‏- ноябир күни, хитай соти қәшқәрдә һөкүм елан қилип, памир теғида хитай сақчи даирилири билән етишип қолға елинған, 6 нәпәр уйғур мустәқиллиқ җәңчисини өлүмгә буйриған иди. Бу мунасивәт билән чәтәлдики уйғур тәшкилатлири баянат елан қилип, хитай һөкүмитини қаттиқ әйиблиди.

Дуня уйғур қурултийиниң баянатчиси дилшат решит, : һөкүмнамидә, мәһкумлар бөлгүнчилик җинайити билән әйибләнгән, демәк,хитай олимпикниң һарписидиму, өктичи сиясий күчләрни қаттиқ бастуриватиду; уларниң охшимиған сиясий күз қараштикиләргә өлүм җазаси бериши хәлқара қанунларға тамамән хилап дәп әйиблиди.

ETIC : " Улар әркинлик җәңчилири"

Германийидә паалийәт елип бериватқан шәрқи тـүркистан ахбарат мәркизи, хитай сотиниң 6 уйғур үстидики һөкүмини хитайниң уйғурлар устидин елип бериватқан дөләт террориниң бир қисми дәп көрсәтти. Мәзкур тәшкилатниң баянатида мундақ дейилгән :

Хитай соти мәһкумларниң, шәрқи туркистан мустәқиллиқи учун тәшкиллинишини, бөлгүнчилик дәп әйиблигән, биз уни,хәлқара қанунларда бәлгиләнгән уйғурларниң оз тәқдирини өзи бәлгиләш һоқуқини қолға кәлтүрүш учун күрәш қилиш дәп қараймиз.

Шәрқи туркистан мустәқиллиқ һәрикитини тенчлиқ йоли билән елип бериш пүтүн шәрқи туркистан хәлқиниң арзуси ; әмма, хитай һөкүмити, оз һакимийити астидики милләтләрниң һеч биригә, әркин пикир қилиш вә тәшкилатларға оюшуш әркинликини бәргини йоқ; шуңа бир қисим уйғур паалийәтчилириниң қораллиқ күрәш йолиға меңишида мәсулийәтни хитай тәрәптә дәп қараймиз.

Туйғунҗан абдувели: " улар бизниң пәхримиз"

Канадада яшаватқан уйғур сиясий паалийәтчилиридин туйғунҗан абдувели өлүмгә буйрулған 6 нәпәр уйғур яш үстидә тохтилип, уларниң өлүмини уйғур хәлқиниң мустәқиллиқ күриши йолида төлигән бәдәллириниң бири дәп қарайдиғанлиқини билдүрди вә у йәнә, нөвәттә уйғур елида хроин зиянкәшликигә учрап, әйдиз кесилигә йолуқуп өлүватқан онмиңларчә ойғур яшлириниң өлүмигә селиштуруп, шәрәплик өлүм дәп қарайдиғанлиқини билдүрди. Туйғунҗан әпәнди сөзиниң ахирида, шеһид аилилиригә алаһидә һөрмитини ипадилиди.

Хитай ахбаратиниң мәлуматиға қариғанда, бу йил 1 ‏- айниң бешида, памир теғида һәрбий мәшиқ елип бериватқан бир йәр асти шәрқи туркистан тәшкилати билән хитай сақчи қисимлири арисида тоқунуш юз бәргән, тоқунушта, хитай тәрәптин бир киши өлгән вә бир киши яридар болған, йәр асти тәшкилат әзалиридин 18 киши өлгән вә 17 киши қолға елинған. Әмма бәзи толуқсиз мәлуматлар, хитайниң өзи тәрәптин өлгүчиләр санини йошуруп аз көрсәткәнликини билдүрмәктә. Шинхуа ахбарат агентлиқниң 8 ‏- ноябирдики хәвиридә, тоқунушни 25 ‏-декабир вәқәси дәп тилға алған әмма мәһкумларниң қолға елинған күнини 1 ‏- айниң 5 ‏- күни дәп көрсәткән, бу мәлумат икки тәрәп арисики тоқунушниң аз дегәндә 11 күн давам қилғанлиқини көрситиду, бу әһвал хитай тәрәпниң өз тәрипидин өлгүчиләр санини йошурғанлиқи һәққидики толуқсиз мәлуматларниң асассиз әмәсликини көрсәтмәктә.

Уйғур тәшкилатлири уйғур хәлқиниң сәрхил оғланлири дәп баһа бәргән алтә киши: абдувели имин, мухтәр сетивалди, қурбан мамут, әхмәт рахман, имин меһман, пәрһат яқуп қатарлиқлардур. (Шөһрәт һошур)