Shimaliy koriye özining herikitige diqqet qilishi kérek, bu agahlandurushla emes, belki nesihet

Shimaliy koriye özining yerlik waqti buyiche 7 ‏- ayning 5 ‏-‏ küni etigen sa'et 3 tin 32 minut ötkendin bashlap bir nechche sa'et ichide 7 qétim bashqurulidighan bomba sinaq qildi. "Birleshme agéntliqi"ning bayan qilishiche, shimaliy koriye sinaq qilghan 7 dane bashqurulidighan bombining az dégende biri yiraq musapidiki nishanlargha qarita atidighan bashqurulidighan bomba. Shimaliy koriyining dapudong ‏-2 belgilik bashqurulidighan bombisi adette amérikining déngiz qirghaqlirigha yétip baralaydu, dep qarilidighan, qit'eler ara nishanlan'ghan nuqtilargha zerbe bérish üchün atidighan uzun musapiliq bashqurulidighan bombisi bolup, u étip chiqirilip 40 sékunttin kéyin sherqiy déngizgha chüshüp ketken.

B b s ning xewer qilishiche, shimaliy koriye 6 ‏- qétim bashqurulidighan bomba sinaq qilghanda, yaponiye bilen jenubiy koriyining herbiy qisimliri herbiy haletke ötken. Birleshken döletler teshkilati koriye weziyitini muzakire qilidighan yépiq yighin achqan. Merkizi agéntliqining maniladin xewer qilishiche, shimaliy koriye uda 6 qétim bashqurulidighan bomba sinaq qilghandin kéyin, amérika-yaponiye ittipaqning ezasi bolghan filippin otturigha chiqip shimaliy koriyini eyibligen. Filippin prézidént mehkimisining emeldari shimaliy koriyini agahlandurup " birleshken döletler teshkilatning ezasi bolghan her qandaq bir dölet dunya tinchliqigha xewp keltüridighan bundaq heriketke jiddiy qaraydu" dégen. Awstraliye hökümitimu buninggha inkas qayturup shimaliy koriyini ochuq eyiblepla qalmay, belki shimaliy koriyining bash elchisini chaqirtip kélip "bu shimaliy koriyining tinchliqqa qilghan riqabiti" dégen. Shundaqla yene awstraliye déplomatlirining shimaliy koriyige baridighan pilanini emeldin qaldurghan. Fransiyining bash ministiri déwirspen ependi uningdin bir kün burun firansiyini ziyaret qiliwatqan birleshken döletler teshkilatining bash katipi kofi annan'gha "shimaliy koriye bashqurulidighan bomba sinaq qilish aldida turuwatidu, biz buninggha qet'iy qarshi turimiz, shimaliy koriye xelq'ara jem'iyetning inkasigha qulaq sélishi kérek" dep bayan qilghan.

Birleshme agéntliqining moskwadin xewer qilishiche, rusiye charshenbe küni shimaliy koriyining bash elchisini chaqirtip kélip, shimaliy koriyining uda bir qatar bashqurulidighan bomba sinaq qilghanliqigha naraziliq bildürgen. Itartas agéntliqining bayan qilishiche, shimaliy koriye sinaq qilghan bashqurulidighan bomba rusiyining déngiz boyliridin egip yapon déngizigha chüshken. Xewerde éytishiche, xitay tashqi ishlar ministirliqining bayanatchisimu shimaliy koriyining uda 7 qétim bashqurulidighan bomba sinaq qilghanliqigha qarita inkas qayturup, xitay hökümitining buninggha jiddiy qaraydighanliqini, munasiwetlik tereplerning özini tutuwélip, koriye yérim ariligha paydiliq ishlarni köprek qilishni ümid qilidighanliqini bildürgen. B b s ning bayan qilishiche, béyjingda élip bériliwatqan 6 terep söhbitide bir nechche aydin buyan ilgirilesh bolmighan idi. Shimaliy koriye özining söhbettiki salmiqini ashurush üchün bu sinaqlarni élip barghan bolushi mumkin. Xewerde éytilishiche yene, adette shimaliy koriyining "dapudong" belgilik bashqurulidighan bombilirining musapisi 2200 kilométirdin 6000 kilométirghiche, koriye da'irisidin étilsa rusiye, xitay, pakistan, hindistan, awstraliye we amérikining alyaska shtatighiche yétip baralaydu, dep qarilip kelmekte.

Amérika awazining xewer qilishiche, amérika tashqi ishlar ministirliqining bayanatida "shimaliy koriye bashqurulidighan bomba sinaq qilish arqiliq xoshna döletlerge tehdit salmaqta" déyilgen. Amérikining yaponiyide turushluq bash elchisi "eger shimaliy koriyining bashqurulidighan bomba siniqi dawamliq derije örlitip, amérika bilen ittipaqdash döletlerge xewp yetküzse, amérika qoghdash xaraktérlik heriket qollinishqa teyyar" dégen. Aq sarayning bayanatchisi koriyini agahlandurup " shimaliy koriye derhal 6 terep söhbitige qaytip kélishi kérek, yaponiye, jenubiy koriye, xitay we rusiyilerning agahlandurushigha qulaq sélishi kérek, hazir özining herikitige diqqet qilidighan dölet amérika emes, belki shimaliy koriye , bu agahlandurushla emes, belki nesihet" dégen. (Weli)