Sherqiy türkistan medeniyet we hemkarliq jem'iyiti enqere shöbisi mukapatlandi
2006.07.31
7-Ayning 30-kuni enqerediki aldino méhmanxanisida mukapatlash murasimi ötküzüldi. Murasimda sherqiy türkistan medeniyet we hemkarliq jem'iyiti enqere shöbisimu mukapatlandi. Bu mukapat türkiyide 17 yildin buyan nesr qiliniwatqan büyük anadolu géziti, yeni büyük anatoliye géziti teripidin tesis qilin'ghan bolup, muwapiqyetlik we toghra istil bilen xizmet qilip kelgen sheherlik we yerlik hokumetlerge, shirketlerge, ammiwi teshkilatlar we mekteplerge bérilidiken.
Enqerediki aldino méhmanxanisida ötküzülgen murasimgha türkiyining herqaysi yerliridin kelgen kop sanda kishi qatnashti. Sherqiy türkistan medeniyet we hemkarliq jem'iyiti enqere shöbisige bérilgen mukapati shöbe bashliqi xayrullah efendigil ependi aldi.
Büyük anadolu gézitining igisi bextiyar özgür ependi mukapatlash murasimida bu mukapatni tarqitishtiki meqset üstide toxtilip mundaq dédi:
Anatoliyediki her qatlam hökümet bashliqliqigha, ammiwi teshkilatlargha, ish ademlirige durus ish qilghanliqi shundaqla muwapiqiyetliri üchün sherep mukapati berduq. Biz bügün jemi 41 orun we shexske mukapat berduq. Biz bu mukapatni bérishtin burun bir komissiyon qurup uzun waqit türkiyidiki herqaysi qurulush we shexislerning xizmetliri heqqide muzakire élip bérish arqiliq yuqiridiki orun we shexslerni békitip chiqtuq.
Bextiyar özgür ependi sherqiy türkistan medeniyet we hemkarliq jem'iyiti enqere shöbisige mukapat bérishning sewebi üstide tutulup mundaq dédi:
Hemmdin awal biz türklikni söyimiz. Uyerde türk qérindashlirimiz ézilse men bu yerde turup qandaqmu rahette yashiyalaymen. Sherqiy türkistan medeniyet we hemkarliq jem'iyiti sherqiy türkistandiki qérindashlirimizning derdini anglitish üchün, ularning derdini yéniklitish üchün xizmet qiliwatidu. Shunga biz ularni bu mukapatqa layiq körduq.
Mukapatka érishküchiler ichide afyon wilayiti dinar sheherlik hökümetning bashliqi mustafa tarlaji ependimu bar idi. U sherqiy türkistan medeniyet we hemkarliq jem'iyitige bu mukapatning bérilgenlikining alahide diqqet tartqanliqini éytip mundaq dédi: sherqiy türkistandiki qérindashlirimiz yillardin buyan chékiwatqan zulum we ishkenjilirini birlikte yashawatimiz. Bizning bu yerde yashishimiz ularning japalirini bilish üchün bir tosalghu emes. Bizning qelbimiz ular bilen birlikte. Ularningmu birkün qutulidighanliqigha ishenchimiz kamil. Buning üchün qolimizdin kelgenni qilimiz. Biz alghan melumatlargha qarighanda xitaydiki Uyghur qérindashlirimiz her sahede kemsitishke uchrawétiptu. Bizning sheherdimu herxil milletler bar. Emma biz héchbir waqit ulargha ayrimichi siyaset élip barmaymiz. Shunga men bir sheher bashliqi bolush supiti bilen Uyghurlargha teng barawer mu'amile qilishini telep qilimen.
Munasiwetlik maqalilar
- Türkiyidiki Uyghur teshkilatliri turk dunyasi féstiwalgha qatnashti
- Sherqiy türkistan medeniyet hemkarliq teshkilati munewwer Uyghur oqughuchilarni mukapatlidi
- Sherqiy türkistan medeniyet we hemkarliq jem'iyitining 9 - nöwetlik umumiy yighini ghelibilik axirlashti
- Sherqiy türkistan medeniyet we hemkarliq jem'iyiti birla waqitta 2 féstiwalgha qatnashti
- Uyghur baliliri 2-nöwetlik xelq'ara balilar uchrishishigha qatnashti
- Türkiye dunya tijaret merkizide sherqiy türkistan körgezmisi échildi