Dunyaning sirek topigha bolghan éhtiyaji hem tijaret, hem istratégiye mesilisi

Xuddi b b s bayan qilghandek, dunya hazir xitayning sirek topa ékisportini kozur qiliwalghan mesilini hel qilishqa kirishtila emes, belki xitaydin bashqa jaylarda sirek topa menbelirini échishqa bel baghlidi.
Muxbirimiz weli
2010.10.28
Share on WhatsApp
Share on WhatsApp
Serek-topa-we-ishlitilishi-305 Sürette, sirek topining her sahe yuqiri téxnikilirida ishlitilish we éhtiyaj ehwali körsitilgen.
AFP Photo

Hélariy klinton: xitay emdi sirek topa éksport qilish siyasitini dunyagha éniq jakarlishi kérek

Roytrs agéntliqining bayan qilishiche, amérika tashqi ishlar ministiri hélariy klinton xanim tünügün honoluluda, yaponiye tashqi ishlar weziri séyji mayixara bilen körüshkende, xitay emdi sirek topa éksport qilish siyasitini dunyagha éniq jakarlishi kérek, dunyaning sirek topigha bolghan éhtiyaji hem tijaret, hem istratégiye mesilisi, xitay emdi yaponiyige, amérikigha we yawropa döletlirige sirek topa éksport qilishni kozurgha aylanduruwalsa bolmaydu dep jakarlighan idi.

Séyji mayixara: xitayning sirek topa éksport qilishqa cheklime qoyghanliqi dunyadiki sana'etleshken döletlerge bérilgen oyghinish signali

Yaponiye tashqi ishlar weziri séyji mayixaramu 'xitayning sirek topa éksport qilishqa cheklime qoyghanliqi dunyadiki sana'etleshken döletlerge bérilgen oyghinish signali' dep körsetken idi. Uning bayan qilishiche, yaponiyige her yili 32 ming tonna sirek topa kérek idi, hazir 10 ming tonna kam. Xitay qesten kamlatqan bu sanni bashqa döletlerdiki menbelerdin toldurushqa toghra kélidu. Eng yaxshisi, dunya emdi xitaydin bashqa jaylarda sirek topa menbelirini échish kérek.

Ju xungrén: junggo sirek topa éksport qilishta sirek topa échish bilen bayliq menbelirini qoghdashni teng yolgha qoyidu

Birleshme agéntliqining béyjingdin bayan qilishiche, xitay sana'et - uchur ministirliqining bayanatchisi ju xongrén bügünki bayanatida 'junggo sirek topa éksport qilishni bashqa döletler bilen mu'amile qilishtiki kozurgha aylanduruwalghini yoq. Junggo peqet yer sharida kam uchraydighan sirek topa menbeliridin paydilinish bilen bayliq menbelirini qoghdashni teng yolgha qoyuwatidu dep jakarlidi.

Xitayning dunyagha sirek topa éksport qilishni kozurgha aylanduruwalghanliqi xitayda élan qilin'ghan maqalilerde bayan qilin'ghan pakit

B b s ning bayan qilishiche, xitayning dunyagha sirek topa éksport qilishni kozurgha aylanduruwalghanliqi, xitayda yéqinda élan qilin'ghan 'sirek topa éksport qilishta junggo yaq déyeleydu' , ' pul - mu'amile urushining is - tütekliri bésilmay turup, yene sirek topa urushi bashlandi' dégen maqalilerde alliqachan éniq bayan qilinip boldi. Bu maqalilerde, xitayda hazirgha qeder éniqlinip bolghan sirek topa zapisi pütün dunyadiki sirek topa zapisining 55% ni teshkil qilsimu, emma pütün dunyaning sirek topigha bolghan éhtiyajining 97% ni xitay qamdawatidu, peqet 2010‏ - yiligha kelgendila, xitay tosattinla sirek topa ékisportini 40% kémeytti, dep bayan qilin'ghan idi.

Uyghur yurtliridiki sirek topini xitaylar dunyagha erzan sétip pul tépiwatidu

Gugul arqiliq sirek topa bayliqliri heqqidiki uchurlarni izlep körsingiz , yer sharida kam uchraydighan sirek topa ménéralliri dunyaning köpünche jaylirida bar ikenliki, sirek topa ménéralliri del kamputér, yanfon, t w ikrani, aptomobilning éléktronluq chatmiliri qatarliqlarni ishlepchiqirish üchün qollinilidighan, ayropilan, bashqurulidighan bomba we alem boshluqida qollinidighan bashqa yuqiri téxnikiliq qorallarni ishleshtimu kam bolsa bolmaydighan matériyal ikenlikige da'ir nurghun uchurlarni tapalaysiz.

Ürümchidiki intérnét betliride, yer sharida kam uchraydighan sirek topa ménéralliri Uyghur yurtlirida köp ikenlikini tonushturidighan uchurlar turuptu. Uningda yene, xitaylar ürümchige kélip échiwalghan herxil chong - kéchik shirketlerning nami, adrisi, téléfon numurliri, hetta 'sirek tupini dunyagha eng erzan satimiz' dep chiqarghan élanlirimu bar.

Bay nahiysining shimal teripide 80 ming tonna ni'obyum zapisi bar, mushuning özila 130 milyard yu'en pulgha yaraydu

Bu jehettiki bir uchurda éytilishiche, xitay gi'ologiye akadémiyisi kan bayliqliri bashqarmisining bashliqi shü xeyming, bay nahiysining shimal teripidiki tagh qaptallirida, yer sharida kam uchraydighan medenlerdin 80 ming tonna ni'obyum zapisi bar, mushuning özila 130 milyard yu'en pulgha yaraydu. Buningdin bashqa yene 100 ming tonna tantalum zapisi bar. Bu sirek topilarni échish intayin asan hem erzan dégen. Yene bir uchurda, qumuldiki we lopnur cholliridiki sirek topa bayliqliri tonushturulghan.

Jang ependi dawanchingdiki sirek topa zawuti bilen yilda 2 milyun yu'en pul tapqan

Ürümchidiki 'sherq bayliqi' dégen intérnét torida, jang famililik bir xitayning sirek topa zawuti tonushturulghan. Uningdin melum bolushiche, yer - zémin sodisi qiliwatqan bu xitay, besh yilliq kan échish ruxsiti élip, dawanchingdiki kölimi 0.21 Kwadirad kilométér kélidighan bir döngdin qazghan sirek topini éksport qilishqa teyyarlaydighan bir zawut qurghan.

Bu üsti ochuq kan qatnash yolining buyida bolghachqa, mehsulatlirining tennerqi intayin ezran toxtighan. Deslepqi besh yil ichide, yilda 2 milyun yu'endin neq kirim bolup turghan. Shuningdin kéyin, yilliq kirimini 60 milyon yu'en'ge yetküzüsh üchün kénishkisini yéngilap, ichkiridin yene zawut üskünilirini yötkep kelgen.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.