2007 ‏- Йилидики дунявий сиясий һәрикәтләрдә аяллар


2007-12-25
Share

2007 ‏- Йили дуня сиясий сәһнисидә йүз бәргән чоң вәқәләрни көздин кәчүргән бир қисим мулаһизичиләр, 2007 ‏- йилини " аяллар йили" яки " аялларниң гәвдә көрситиш"(мәвҗутлуқини ипадиләш) йили дәп қарашмақта. Бундақ қарилиштики сәвәб, 2007 ‏- йили йүз бәргән зор вәқәләрдә аялларниң йиллардикигә нисбәтән актип рол ойниғанлиқидур.

2007 ‏- Йилидики әң зор вәқә, бермидики демократик қаршилиқ һәрикитидур. Раһиблар намайиши билән башланған бу һәрикәтниң вәкили болуп, 18 йилдин бери өз қоросида нәзәрбәнд астида тутулуватқан аңсаң су чи ханим мәйданға чиқти. У б д т вәкили вә берма һәрбий һөкүмити билән сөһбәт өткүзүп берма демократик һәрикитигә дипломатик йол билән йетәкчилик қилди. Бу җәрянда, өзиниң хәп-хәтәргә пәрва қилмаслиқ роһий билән дуня җамаитиниң йәнә бир қетим һөрмитигә еришти.

2007 ‏- Йилида дуняниң диққитини тартқан сайламлардин бири аргентина президент сайлимидур. Чүнки бу сайламниң риқабәтчилиридин бири вәзипә өтәватқан президент нәстәр кричәрниң аяли киристина фәрнандез ханимдур. Бу йил өктәбир елип берилған бу сайламда, киристина фәрнандез ханим, %45.29 Аваз авазға еришип, %22 авазға еришкән рәқибини мутләқ үстүнлүк билән йеңип, йолдиши нәстәр кричәрниң президентлиқ тәхтигә варислиқ қилди. Ноябирда дөләт кабинтини тәшкиллигән фәрнандәз ханим 10 ‏- декабир күни президентлиқ вәзипини өткүзүвелип, аргентина тарихидики иккинчи аял президент болуп тарих яратти.

2007 ‏- Йилдики маҗиралиқ вәқәләрдин бири, пакистанниң президент сайлам тәйярлиқидур. Сайламға қатнишиш үчүн муһаҗирәттин қайтқан бинәзәр бутто ханим, тунҗи күнила, 100дин артуқ кишиниң өлүмигә сәвәб болған өзини партлитиветиш характерлик бомба һуҗумиға дуч кәлди. Шундақ туруқлуқ арқидин өткүзүлгән демократик намайишта сәпниң алдида орун алди. Дәсләп мушәррәп билән мурәссәлишиш йолини таллиған бинәзәр бутто, мушәррәп, һәрбий һаләт елан қилғанда дәрһал қарши мәйданға өтти вә һәрбий һаләткә қарши намайиш өткүзди, бу сәвәблик арқа-арқидин қораси ичидә назарәт астиға елинди.

2007 ‏- Йилдики, муһим сайламлардин бири, хоңкоңниң демократийә рефирандами дәп қаралған, хоңкоң арилиниң парламент вәкил сайлимидур. Бу сайламда хоңкоң демократийә тәрәпдарлири билән бейҗиң тәрәпдарлири арисида бир нөвәт куч синишиш йүз бәрди. Сайламдики икки риқабәтчи аял болуп, сайламда утуп чиққан демократийә тәрәпдари, аң саңчән ханим болди. 2007 ‏- Йили дуняниң диққәт мәркизигә айланған һәрикәт, 2008 ‏- йили өткүзилидиған америка президент сайлиминиң намзатлиқини талишиш риқабитидур. Бу риқабәттә, демократчиларниң алдинқи орунда кетиватқан икки намзатидин бири һилларий клинтон ханимдур.

Дуняда бүгүн мустәқиллиқ арзуси билән тәшкиллик паалийәт елип бериватқан милләтләрниң сани йүздин артуқ болуп булардин, хәлқара күнтәртипини игиләп келиватқанлар йигирмигә йәтмәйду, мана булардин бири болған уйғур миллий һәрикити, 2007 ‏- йили рабийә қадир ханимниң йетәкчиликидә йәнә бир балдақ юқири басқучқа көтүрүлди. Рабийә қадир ханим, бу йил ичидә чех җумһурийитиниң пайтәхти прагада америка президенти бушниң қобул қилишиға еришти вә америка президенти тәрипидин талант игиси дәп мәдһийиләнди. Шундақла америка дөләт мәҗлисидә, рабийә қадир ханим, вашингтон, далай лама қатарлиқ дуняви шәхсләр қатарида тилға елинип мәдһийиләнди. Рабийә қадир ханим, 2007 ‏- йилни, өзиниң муһаҗирәттики сиясий һаятида мувәппәқийәтлик бир йил дәп қарайду.

Рабийә қадир ханим 2007 ‏- йили йәнә 3 ‏- қетим нобил мукапати намзатлиқиға көрситилди. (Шөһрәт һошур)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт