Prézidént bush xitayni xelq'ara soda nizamnamisigha emel qilish heqqide agahlandurdi

Xitayning bir qisim toqulma mehsulatlar éksport béjini bikar qilish qararigha amérika téz inkas qayturdi. Bush hökümiti, xitayning xelq'ara soda nizamnamilirigha hörmet qilishini telep qilip, kishiler amérikining sodida adil bolush tirishchanliqini köridu, dep tekitlidi.

Amérika prézidénti jorji bush, seyshenbe küni aq saraydiki muxbirlarni kütüwélish yighinida, xitay bilen soda qilishning eng toghra usuli xitay hökümitige xelq'ara qa'ide - qanunlarning barliqini eskertish, dep körsetti. Prézidént bush, amérikining soda mesiliside xitaygha dawamliq bésim ishlitidighanliqini tekitligen.

Bush, xitayning xelq'ara sodida adil bolushini telep qildi

Bush, seyshenbe künki muxbirlarni kütüwélish yighinida soda mesilisi shundaqla axbarat we diniy ibadet erkinliki qatarliq mesililerdiki köz- qarishini sherhilidi.Bush, xitay - amérika munasiwitige baha bérip, "méningche xitay - amérika munasiwiti intayin murekkep, amérika xelqi buni chüshinishi kérek," dep körsetti. Prézidént bush, xitayning xelq'ara sodida adil bolushini telep qildi. Bush mundaq deydu:

"Tereptin biz xitayni bir iqtisadi purset, dep qaraymiz. Xitay bilen alaqe qilishning eng yaxshi charisi xitaygha xelq'ara soda nizamnamilirini eslitish. Biz xitayning bu nizamnamilargha emel qilishini kütimiz. Yene bir tereptin xitayning tereqqiyati shundaqla murekkep soda munasiwitige egiship, kishiler amérikining sodida adil bolush tirishchanliqini köridu. Biz xitayning xelq'ara sodida adil bolushini kütimiz."

Bush hökümiti amérika dölet mejlisining bésimigha duch kelmekte

Amérika bash soda wekili robért portman, 4 - iyunda amérika soda ministiri gutiliz bilen birge béyjingda xitayning mu'awin bash ministiri wu yi we soda ministiri bo shileyler bilen söhbet ötküzidken. Portman, xitay - amérika soda munaswitining jiddi sinaqlargha duch kéliwatqanliqini tekitlidi. Ikki terep söhbet ömiki toqulma mallar sodisidiki talash - tartish, xelq pulining qimmitini östürüsh shundaqla eqliy mülk hoquqini qoghdash qatarliq mesililer boyiche sözlishidiken.

Amérikining 2004 - yili xitay bilen élip barghan sodidiki qizil reqimi 162 milyard dollar bolup, bush hökümiti amérika dölet mejlisining éghir bésimini duch kelmekte. Amérika soda ministirliqining ashkarilishiche, eqliy mülk hoquqigha tajawuz qilish amérikini yilda 250 milyard dollar ziyan'gha uchratmaqtiken.

Bush, amérikining xitayning semige sélish mejburiyiti bar

Prézidént bush, muxbirlarni kütüwélish yighinida xitayning kishilik hoquq xatirisini tilgha aldi. Bush mundaq deydu: "men bizning xitayning semige sélish mejburiyitimiz barliqimizgha ishinimen. Ümidwarliqqa tolghan her qandaq jem'iyette bolushqa tégishliki iqtisadi erkinlikla emes, belki diniy ibadet we axbarat erkinlikige ige bolushtur. Men hazirgha qeder uchrashqan her qandaq xitay rehbirige dalay lamani , rim watikanining xitaygha épiskop ewetelmeywatqanliqini tilgha aldim. Xitayning qorqushigha hajet yoq. Dinning tinchliq élip kélidighanliqini chüshünish kérek."

Amérika teywen boghuzida toqunush yüz bérishini xalimaydu

Bush, teywen boghuzi ikki qirghizidikilerning otturisidiki ixtilapni tinch yollar bilen hel qilishini telep qildi. Bush mundaq dédi: " nahayiti éniqki amérika xitay bilen teywen otturisidiki jiddi munasiwet bilen yüzlishishi kérek. Méning meydanim nahayiti éniq shundaqla izchilliqqa ige. Xitay bilen teywen buni chüshinidu. Amérikining mesilini hel qilish, rayondiki muqimliqni qoghdash shundaqla mesilini tinch yollar bilen bir terep qilish üchün yardem bérishige toghra kélidu."

U yene, xitayning shimaliy koriye yadro qorallar mesiliside aktip rol oynishini ümid qildi. Bush, kim jung'ilni yadro qorallardin waz kechishke uning bilen pikirdash döletler küch chiqiralaydighanliqini eskertip, " xitay mezkur rayonning yadro qorallar tehtididin qutulushigha yardem béreleydu," dep körsetti. (Erkin)