Президент буш: америка ташқи сияситиниң негизи " әркинлик" вә " азадлиқ"


2005-02-03
Share

Президент буш чаршәнбә күни кәчтә сөзлигән америка дөләт мәҗлисидики нутуқида, өзиниң кәлгүси 4 - йилдики ички - ташқи сияситини шәрһилиди. Президент буш, иҗтимаий суғурта ислаһати қатарлиқ ички мәсилиләр һәққидә көпрәк тохталди. Амма у, буниңдин кейинки америка ташқи сияситиниң негизи " әркинлик" вә " азадлиқ" болидиғанлиқини тәкитлиди. Америка преизденти нутуқида " әркинлик" ни 21 қетим, " азадлиқ" ни 7 қетим тилға алған.

2 - Қарар президентлиққа хәлқ сайлими арқилиқ сайланғанлиқини тәкитлигән җорҗи буш, бу имтияз сайлам арқилиқ һоқуқ тутқан кишиләргә ортақлиқини билдүрди. У мундақ дәйду: "биз хәлқ сайлими арқилиқ һоқуққа ериштуқ. Һазир биз бу имтиязға афғанистан, пәләстин земини, украинийә шундақла әркин вә игилик һоқуқлуқ ирақтики йеңи сайланған рәһбәрләр билән ортақлишиватимиз."

Президент буш, мәқсидимиз "азатлиқни америкида шундақла пүтүн дуняда қанат яйдуруш," дәп көрсәтти. Президент буш, " нишанимиз һөкүмәтләр пуқралириға җаваб берәләйдиған, өз мәдәнийитигә садиқ әркин җәмийәт, мустәқил дөләтләрни бәрпа қилиш вә кеңәйтиш. Чүнки, демократийә өз хәлқиғә шундақла хошнилириға һөрмәт қилиду. Әркинликни йетәкчи қилғанда тинчлиққа йетәкләйду." Дәп әскәртти.

Америка сияси түзүлмисини башқиларға таңмайду

Америка қошма штатлириниң сияси түзүлмимизни башқиларға теңиш һоқуқи , муддиаси яки бундақ бир арзуси йоқ. Бу, бизниң дүшмәнлиримиз билән болған түпки пәрқимиз.

Җорҗи буш, америкиниң оттура шәрқ вә дунядики демократийә һәрикәтлирини қоллайдиғанлиқини тәкитләп, ахирқи нишанимиз истибдатлиққа хатимә бериш, дәп сөзлиди. Америка сияси түзүлмисини башқиларға теңиш нийити йоқлиқини билдүргән буш, "бу бизниң дүшмәнлиримиз билән болған түпки пәрқимиз" диди. Буш йәнә "америка қошма штатлириниң сияси түзүлмимизни башқиларға теңиш һоқуқи , муддиаси яки бундақ бир арзуси йоқ. Бу, бизниң дүшмәнлиримиз билән болған түпки пәрқимиз."

Демократийә дүшмәнлириниң истибдатлиқни омумлаштуруш пешидә йүргәнликини тәкитлигән җорҗи буш, " истибдатлиқни илгири сүрүш вә кеңәйтиш йолидики өз алдиға һөкүмранлиқ қурувалған бу бир қисим вәһшиләр, кишилик һаятниң һәммә тәрипини контрол қилишқа урунди." Дәп сөзлиди.

Буш сүрийини агаһландурди

Буш, ирақтики сайлам һәққидә мундақ дәйду: "ирақтики әркинликниң ғәлибиси террорчилиққа қарши иттипақни күчәйтти. Дәмәшқтин теһранғичә демократик ислаһатчиларға илһам берип, тоқунуш ичидики районға техиму көп үмид вә илгириләш елип кәлди. Шуниң билән биргә балилиримиз вә нәврилиримизниң һаятиға келидиған тәһдитни йоқатти."

Терорчиларни қағдаватқан шундақла қирғинчилиқ характерлик қоралларни ясаватқан дөләтләргә қарши туридиғанлиқини билдүргән җорҗи буш, сүрийини агаһландурди. У, " сүрийә өз территорийисидә шундақла ливанниң бир қисим районлирида терорчиларниң паалийитигә йол қоймақта." Дәп көрсәтти.

Америка иран хәлқиниң әркинлик һәрикитини қоллайду

Мәқсидимиз азатлиқни америкида шундақла пүтүн дуняда қанат яйдуруш.

Иран һәққидә тутулуп, иран дунядики өз хәлқиниң әркинликини боғуп, террорчилиқни қоллаватқан, қирғинчилиқ характирлик қоралларға еришиш пешидә йүргән дөләт, дәп әскәртти. У мундақ дәйду: " әгәр иран хәлқи әркинлики үчүн дәс турса, биз улар тәрәптә туримиз."

Һөкүмәтләр билән қирғинчилиқ характерлик қоралларни чәкләш мәсилиси бойичә һәмкарлишиватқанлиқини билдүргән буш, шимали корийә ядро қораллар мәсилиси һәққидә тохталди. У мундақ дәйду: " биз асиядики һөкүмәтләр билән шимали корийини ядро қоралларға еришиш нийитидин ваз кәчүрүшкә тиришиватимиз."

Пәләстин билән исраилийә тинчлиқ нишаниға йетишкә аз қалди

Пәләстин - исраилийә тоқунуши һәққидә тохтилип, америка дөләт мәҗлисиниң пәләстиндики сияси, иқтисади вә бихәтәрлик ислаһати үчүн 350 милйон доллар аҗритишини тәләп қилди. Президент буш, пәләстин зиминидики ислаһат вә димократийә қәдими зораванлиқ адитиниң йимирилғанлиқини вә мәғлубийитини көрсәтти, дәп тәкитлиди. У мундақ дәйду: "исраилийә билән пәләстиндин ибарәт икки демократик дөләтниң өз - ара тинчлиқ ичидә яшаш нишаниға йетишигә аз қалди. Америка уларниң бу нишанға йетишигә ярдәм бериду."

Әркинлик арзуси һамини бир күни әмәлгә ашиду

Америка дөләт мәҗлисидики нутуқида, коммунизм йоқулуштин илгири нурғун кишиләрниң буни бир чүш, дәп қариғанлиқини, явропада фашизим йоқулуштин илгири буниң кишиләр тәсәввуридин йирақ мәсилә, дәп қаралғанлиқини тәкитлигән президент буш, "кишиләрниң бүгүнки арзуси террорчилиқ үстидин ғәлибә қилип, әркинлик йолиға меңиш. Бу арзу коммунизм шундақла фашизимниң һалакити рияллиққа айланғандәк һамини бир күни әмәлгә ашиду." Дәп көрсәтти. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт