Prézidént bush: amérika tashqi siyasitining négizi " erkinlik" we " azadliq"

• Muxbirimiz erkinning bu heqtiki xewiri
• Download story audio

Prézidént bush charshenbe küni kechte sözligen amérika dölet mejlisidiki nutuqida, özining kelgüsi 4 - yildiki ichki - tashqi siyasitini sherhilidi. Prézidént bush, ijtima'iy sughurta islahati qatarliq ichki mesililer heqqide köprek toxtaldi. Amma u, buningdin kéyinki amérika tashqi siyasitining négizi " erkinlik" we " azadliq" bolidighanliqini tekitlidi. Amérika pré'izdénti nutuqida " erkinlik" ni 21 qétim, " azadliq" ni 7 qétim tilgha alghan.

2 - Qarar prézidéntliqqa xelq saylimi arqiliq saylan'ghanliqini tekitligen jorji bush, bu imtiyaz saylam arqiliq hoquq tutqan kishilerge ortaqliqini bildürdi. U mundaq deydu: "biz xelq saylimi arqiliq hoquqqa érishtuq. Hazir biz bu imtiyazgha afghanistan, pelestin zémini, ukra'iniye shundaqla erkin we igilik hoquqluq iraqtiki yéngi saylan'ghan rehberler bilen ortaqlishiwatimiz."

Prézidént bush, meqsidimiz "azatliqni amérikida shundaqla pütün dunyada qanat yaydurush," dep körsetti. Prézidént bush, " nishanimiz hökümetler puqralirigha jawab béreleydighan, öz medeniyitige sadiq erkin jem'iyet, musteqil döletlerni berpa qilish we kéngeytish. Chünki, démokratiye öz xelqighe shundaqla xoshnilirigha hörmet qilidu. Erkinlikni yétekchi qilghanda tinchliqqa yétekleydu." Dep eskertti.

Amérika siyasi tüzülmisini bashqilargha tangmaydu

Amérika qoshma shtatlirining siyasi tüzülmimizni bashqilargha téngish hoquqi , muddi'asi yaki bundaq bir arzusi yoq. Bu, bizning düshmenlirimiz bilen bolghan tüpki perqimiz.

Jorji bush, amérikining ottura sherq we dunyadiki démokratiye heriketlirini qollaydighanliqini tekitlep, axirqi nishanimiz istibdatliqqa xatime bérish, dep sözlidi. Amérika siyasi tüzülmisini bashqilargha téngish niyiti yoqliqini bildürgen bush, "bu bizning düshmenlirimiz bilen bolghan tüpki perqimiz" didi. Bush yene "amérika qoshma shtatlirining siyasi tüzülmimizni bashqilargha téngish hoquqi , muddi'asi yaki bundaq bir arzusi yoq. Bu, bizning düshmenlirimiz bilen bolghan tüpki perqimiz."

Démokratiye düshmenlirining istibdatliqni omumlashturush péshide yürgenlikini tekitligen jorji bush, " istibdatliqni ilgiri sürüsh we kéngeytish yolidiki öz aldigha hökümranliq quruwalghan bu bir qisim wehshiler, kishilik hayatning hemme teripini kontrol qilishqa urundi." Dep sözlidi.

Bush süriyini agahlandurdi

Bush, iraqtiki saylam heqqide mundaq deydu: "iraqtiki erkinlikning ghelibisi térrorchiliqqa qarshi ittipaqni kücheytti. Demeshqtin téhran'ghiche démokratik islahatchilargha ilham bérip, toqunush ichidiki rayon'gha téximu köp ümid we ilgirilesh élip keldi. Shuning bilen birge balilirimiz we newrilirimizning hayatigha kélidighan tehditni yoqatti."

Térorchilarni qaghdawatqan shundaqla qirghinchiliq xaraktérlik qorallarni yasawatqan döletlerge qarshi turidighanliqini bildürgen jorji bush, süriyini agahlandurdi. U, " süriye öz térritoriyiside shundaqla liwanning bir qisim rayonlirida térorchilarning pa'aliyitige yol qoymaqta." Dep körsetti.

Amérika iran xelqining erkinlik herikitini qollaydu

Meqsidimiz azatliqni amérikida shundaqla pütün dunyada qanat yaydurush.

Iran heqqide tutulup, iran dunyadiki öz xelqining erkinlikini boghup, térrorchiliqni qollawatqan, qirghinchiliq xaraktirlik qorallargha érishish péshide yürgen dölet, dep eskertti. U mundaq deydu: " eger iran xelqi erkinliki üchün des tursa, biz ular terepte turimiz."

Hökümetler bilen qirghinchiliq xaraktérlik qorallarni cheklesh mesilisi boyiche hemkarlishiwatqanliqini bildürgen bush, shimali koriye yadro qorallar mesilisi heqqide toxtaldi. U mundaq deydu: " biz asiyadiki hökümetler bilen shimali koriyini yadro qorallargha érishish niyitidin waz kechürüshke tirishiwatimiz."

Pelestin bilen isra'iliye tinchliq nishanigha yétishke az qaldi

Pelestin - isra'iliye toqunushi heqqide toxtilip, amérika dölet mejlisining pelestindiki siyasi, iqtisadi we bixeterlik islahati üchün 350 milyon dollar ajritishini telep qildi. Prézidént bush, pelestin ziminidiki islahat we dimokratiye qedimi zorawanliq aditining yimirilghanliqini we meghlubiyitini körsetti, dep tekitlidi. U mundaq deydu: "isra'iliye bilen pelestindin ibaret ikki démokratik döletning öz - ara tinchliq ichide yashash nishanigha yétishige az qaldi. Amérika ularning bu nishan'gha yétishige yardem béridu."

Erkinlik arzusi hamini bir küni emelge ashidu

Amérika dölet mejlisidiki nutuqida, kommunizm yoqulushtin ilgiri nurghun kishilerning buni bir chüsh, dep qarighanliqini, yawropada fashizim yoqulushtin ilgiri buning kishiler tesewwuridin yiraq mesile, dep qaralghanliqini tekitligen prézidént bush, "kishilerning bügünki arzusi térrorchiliq üstidin ghelibe qilip, erkinlik yoligha méngish. Bu arzu kommunizm shundaqla fashizimning halakiti riyalliqqa aylan'ghandek hamini bir küni emelge ashidu." Dep körsetti. (Erkin)