Bush: erkinlik yolida ilgirilesh " dewrimizdiki ulugh dastan"


2006.02.01
bush-speech.jpg

Prézidént jorji bush seyshenbe küni dölet mejliside amérika puqralirigha qoshma shtatlarning dölet ehwali heqqide doklat bérip, amérikining ichki- tashqi weziyiti we siyasitini sherhilidi. U, amérikining uzun - muddetlik pilani " dunyarimizda mustebitlikke" xatime bérish, dep körsetti we shuning bilen birge " erkinlik yolida ilgirilesh dewrimizdiki ulugh dastan" dédi.

U, "2006- yili bashlan'ghan bir chaghda dunya xelqining yérimidin köpreki démokratik döletlerde yashawatidu. Emma shuning bilen birge biz süriye, bérma, zimbabuwi, shimaliy koriye we iran'gha oxshash döletlerde yashaydighan, xelqning qalghan yérimini untup qalmasliqimiz kérek. Chünki adaletke bolghan telepler we dunya tinchliqi ularning erkinlikini zörür qilmaqta", deydu.

Ottura sherq mesilisi

Bush 2002 - yili sözligen dölet ehwali heqqidiki nutiqida, shimaliy koriye, iran we iraqlarni bi'ologiyilik, ximiyilik we yadro qorallirigha ige bolush péshidiki "qebih küchler " dep atighan idi. "Qebih küchler" qataridiki iraq 2003 - yili amérika bashchiliqidiki ittipaqdash küchler teripidin boysunduruldi. Emma uning bi'o-ximiyilik qorallargha ige emesliki ashkarilandi. Prézidént bush seyshenbe künki nutuqida shimaliy koriyini tenqid qilish tonini peseytip, iran bilen pelestin radikal islam herikiti xamasni agahlandurush tonini yükseltti.

Bush, iranni " görüge éliwalghan az sandiki mollilar tebiqisi xelqini yalghuzluq we bésim astida tutmaqta " deydu. Bush, iranni pelestin we liwanda térrorchilarni qollash we yadro qorallirini tereqqi qildurushni dawamlashturush bilen eyiblidi. U, " iran hökümiti yadro qorallargha érishish arzusida dunya bilen tirkeshmekte. Emma dunya döletliri iran hakimiyitining yadro qorallargha ige bolushigha yol qoymasliqi kérek. Amérika bu tehditke xatime bérish yolida dunyani dawamliq seperwer qilidu " dédi.

Démokratiyileshtürüsh kürishini dawamlashturush

Pelestin mesilisini tilgha alghanda bush, "nöwette xamas rehberliri isra'iliyini étirap qilishi, qoral tashlap térrorluqni ret qilishi, uzun - muddetlik tinchliq üchün xizmet qilishi kérek " deydu. Prézidént bushning tekitlishiche, amérika dunyagha démokratiyini tarqitish yolida küresh qilishni dawamlashturidiken. U, " amérika ézilgen xelqlerni azat qilish we dunya tinchliqini ilgiri sürüsh tarixy chaqiriqigha awaz qoshidu" dep körsetti.

Biraq mutexessislerning pikiriche, prézidént bush nutuqining bu qisimida mesilini omumyüzlük tilgha alghan bolup, nishanini konkrét bir döletke qaratmighan. Shunga bu xitaygha oxshash démokratiye we kishilik hoquq mesilisi bar bezi döletlerning jiddiy inkasini qozghimasliqi mumkin.

Bush, démokratiyini ret qilghan döletlerni tilgha alghanda shimaliy koriyini birla qétim eskertip ötti. U, shimaliy koriye bilen bolghan yadro qorallar mesilisidiki talash - tartishning tepsili ditallirini tilgha almighan. Közetküchilerning eskertishiche, u shimaliy koriye bilen yadro qorallar söhbiti basquchida pyongyangning ghezipini qozghaydighan sözlerni qilishtin özini qachirghan bolushi mumkin.

Iqtisad mesilisi

Bushning xitay mesilisini tilgha alghanda qilghan sözliri nisbeten mötidil bolup, bush hökümiti xitayni adaletsiz soda riqabiti élip bérish bilen eyiblisimu, emma u nutuqida amérikiliqlarni béyjingni tenqid qilish ornigha riqabet küchini kücheytishke chaqirdi. U, xitayni amérikining "yéngi riqabetchisi" dep atighan. Bush mundaq deydu: amérika iqtisadi yenila küchlük, biraq biz meghrurlanmasliqimiz kérek. Dunya iqtisadining dinamikisida xitay we hindistan'gha oxshash riqabetchilerni nezerde tutushimizgha toghra kélidu ". Birleshme axbarat agéntliqining tekitlishiche, xitay, iqtisadimizning téz tereqqiyati dunya bazirini menpe'etdar qiliwatidu, dep qarash bilen birge, özini dunya soda sahesining hemkarlashquchi ezasi, dep körsetsimu, biraq amérika xitay mallirining yamrap kétishi we xitay toqulma boyumlirining amérikigha seldek éqip kirishidin narazi idi. Shuning bilen birge béyjing, amérika we yawropa ittipaqi qatarliq soda shériklirining xelq pulini qimmetleshtürüsh jehettiki bésimigha duch kelmekte idi. Emma prézidént bush bu mesililerni tilgha almidi.

Iraqtin qoshun chékindürüsh

Bush, iraqni tilgha alghanda qoshun chékindürüsh waqit jediwili élan qilishni ret qildi. "Ghelibe qazinishqa ishenchlik pilanimiz bar " dep tekitligen bushning eskertishiche, qoshun chékindürüsh mesilisini siyasetchiler emes, herbiyler qarar qilishi kérek. Bush "biz qoshun chékindürüsh iqtidarigha ige bolushimiz, emma bu qararni washin'gtondiki siyasetchiler emes, belki bizning herbi qomandanlirimiz chiqirishi kérek " deydu.

Bush, néfit énérgiye mesilisini tilgha alghanda, yéngi énérgiye menbelirini échishqa meblegh sélishni kücheytip, ottura sherqning néfitige tayinishni azaytimiz, dédi. Bushning eskertishiche, amérika 2025 - yilghiche ottura sherq néfitige tayinishni 75 % azaytidiken. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.