Америка етип чүшүргән сүний һәмраһ һәққидики инкаслар


2008.02.21

Америка өзиниң аләм бошлуқида контроллуқни йоқатқан бир сүний һәмраһини 2 ‏- айниң 20 ‏- күни башқурулидиған бомба билән етип, униң йеқилғу сандуқини пачақлиди. Бу һәқтә учур вастилири охшимиған инкас вә мулаһизиләрни елан қилди.

Сүний һәмраһниң һидрозин йеқилғу сандуқи пачақланди

Бирләшмә агентлиқниң баян қилишичә, америкиниң деңиз армийә генерали, бәш бурҗәк бинаниң аләм техникиси бирләшмә шитабиниң муавин башлиқи җәмс картрайт бүгүн 'америкиниң аләм бошлуқида контроллуқини йоқатқан, аптобус чоңлуқидики чарлаш сүний һәмраһи тинч окян вә атлантик окянлардин ишәнчлик алий техника үскүнилири билән из қоғлап нишанға елинип бүгүн етип ташланғанлиқини, униң тузанлири йәр йүзигә чүшкәндә инсанларға хәтәр йәткүзәлмигидәк дәриҗигә чүшүрүлгәнликини' җакарлиди.

Униң ейтишичә, бу қетим асасән аләм бошлуқидин йәр шариға қарап пәсләватқан сүний һәмраһниң 454 килограмлиқ гидразин йеқилғу сандуқинила пачақлаш, йәр йүзидики инсанларни униңдики һидрогенниң хәтиригә учраштин сақлаш мәқсәт қилинған болуп, әмәлийәттиму бу нишан толуқ орунланған.

Униң тузанлири инсанларға хәтәр йәткүзәлмәйду

Америкиниң деңиз армийә генерали җәмс картрайтниң ейтишичә, америкиниң сәзгүр әслиһәлири йәр йүзидин 247 километир игизликтә етип ташланған бу сүний һәмраһниң гидразин йеқилғу сандуқи партлиғанда һасил болған от топчисини вә униң әтрапида һасил болған қоюқ туманни ениқ байқиған вә рәсимгә алалиған.

Бу сүний һәмраһниң тузанлириниң йәр йүзигә чүшүши пәйшәнбә күни, һәтта җүмә күнигичә давам қилиши мумкин. Униң һазирқи тузанлири бәш бурҗәк бина мөлчәрлигәндинму аз. Мутәхәссисләрниң ейтишичә, әгәр ундақ болмиғанда, бу сүний һәмраһниң парчилирини башқа дөләтләр йиғивелип, униңдики мәхпийәтликләрни оғрилаш еһтимали бар иди. Һазир бундақ еһтималлиқ мәвҗут әмәс, шундақла униңдики зәһәрлик маддиларму инсанларға хәтәр йәткүзәлмәйду.

Америка планетлар ара уруш қилишқа йетәкчилик қилалайдиған қабилийәткә игә

Франсийә агентлиқиниң баян қилишичә, америка бу қетим аләм бошлуқидики сүний һәмраһни етиш арқилиқ, өзиниң планетлар ара уруш қилишқа йетәкчилик қилалайдиған қабилийәткә игә икәнликини тулуқ намайән қилди.

Америкиниң бу һәрикитидин хәлқара җәмийәт омумйүзлүк гуманланди

Хитайниң шинхуа агентлиқи елан қилған хәвәрдә баян қилинишичә, америка деңиз армийисиниң бир чарлаш парахоти 2 ‏- айниң 20 ‏- күни кәч саәт 10дин 26 минут өткәндә, тинч окяндин MS-3 бәлгилик башқурулидиған бомба етип, америкиниң аләм бошлуқида контроллуқини йоқатқан бир җасуслуқ сүний һәмраһини мувәппәқийәтлик пачақлиди. Буниң билән америка дуняда өзи елан қилған пилан буйичә, йәни нишан, вақит, җай вә оқ түри буйичә бир қетим маһарәт көрсәтти, тоғрисини ейтқанда, америка өзиниң башқурулидиған бомбидин мудапиә көрүш сестимисиниң қисқа вә оттура мусапилиқ башқурулидиған бомбини тосушни синақ қилди. Шинхуа агентлиқиниң ейтишичә, америкиниң бу һәрикитидин һазир хәлқара җәмийәт омумйүзлүк гуманланди.

Хитайниң 'хәлқ гезити'му обзор елан қилип, америкиниң сүний һәмраһни етип уни һәрбий мәқсәт үчүн қилинған әмәс, дегәнликини тәнқит қилип, америка техичә аләм бошлуқида өзиниң үстүнлүкини сақлап қелиштин ваз кәчмәйватиду, дәп баян қилди.

Америка санлиқ мәлуматларни хәлқара җәмийәткә тәпсилий мәлум қилиши керәк

Б б с ниң хәвәр қилишичә, мушу айниң бешида, русийә билән хитай бирликтә пиланлап, буниңдин кейин аләм бошлуқида һәрбий қорал қоллинишни мәний қилиш келишими имзалашни тәшәббус қилған иди. Бу қетим америка өзиниң сүний һәмраһини атқандин кейин, русийә дөләт мудапиә министирлиқи' америкиниң дегәнлири немә болушидин қәтий нәзәр, у бир қетим аләм бошлуқидики сүний һәмраһни етиш арқилиқ өзиниң башқурулидиған бомбидин мудапиәлиниш сестимисиниң иқтидарини синиди вә қабилийитини дуняға көз-көз қилди' деди.

Хитай ташқи ишлар мнистирлиқиниң баянатчиси лю җйәнчав болса'җуңго һазир америка қатарлиқ дөләтләрниң аләм бошлуқиниң бихәтәрликигә йәткүзүватқан тәсиригә нисбәтән җиддий қараватиду. Америка бу қетимқи һәрикәткә даир санлиқ мәлуматларни хәлқара җәмийәткә тәпсилий мәлум қилиши керәк' деди. Хәвәрдә ейтилишичә, гәрчә хитай 2007 ‏- йили 1 ‏- айда, өзиниң бир сүний һәмраһини аләм бошлуқида пачақлайдиғанлиқидин һечқандақ бир дөләтни хәвәрләндүрмигән вә вәқәдин кейинму буниңға даир санлиқ мәлуматларни елан қилишни рәт қилған болсиму. (Вәли)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.