Amérika étip chüshürgen sün'iy hemrah heqqidiki inkaslar

• Muxbirimiz welining bu heqtiki toluq melumati
• Download story audio

Amérika özining alem boshluqida kontrolluqni yoqatqan bir sün'iy hemrahini 2 ‏- ayning 20 ‏- küni bashqurulidighan bomba bilen étip, uning yéqilghu sanduqini pachaqlidi. Bu heqte uchur wastiliri oxshimighan inkas we mulahizilerni élan qildi.

Sün'iy hemrahning hidrozin yéqilghu sanduqi pachaqlandi

Birleshme agéntliqning bayan qilishiche, amérikining déngiz armiye générali, besh burjek binaning alem téxnikisi birleshme shitabining mu'awin bashliqi jems kartrayt bügün 'amérikining alem boshluqida kontrolluqini yoqatqan, aptobus chongluqidiki charlash sün'iy hemrahi tinch okyan we atlantik okyanlardin ishenchlik aliy téxnika üsküniliri bilen iz qoghlap nishan'gha élinip bügün étip tashlan'ghanliqini, uning tuzanliri yer yüzige chüshkende insanlargha xeter yetküzelmigidek derijige chüshürülgenlikini' jakarlidi.

Uning éytishiche, bu qétim asasen alem boshluqidin yer sharigha qarap peslewatqan sün'iy hemrahning 454 kilogramliq gidrazin yéqilghu sanduqinila pachaqlash, yer yüzidiki insanlarni uningdiki hidrogénning xetirige uchrashtin saqlash meqset qilin'ghan bolup, emeliyettimu bu nishan toluq orunlan'ghan.

Uning tuzanliri insanlargha xeter yetküzelmeydu

Amérikining déngiz armiye générali jems kartraytning éytishiche, amérikining sezgür esliheliri yer yüzidin 247 kilométir igizlikte étip tashlan'ghan bu sün'iy hemrahning gidrazin yéqilghu sanduqi partlighanda hasil bolghan ot topchisini we uning etrapida hasil bolghan qoyuq tumanni éniq bayqighan we resimge alalighan.

Bu sün'iy hemrahning tuzanlirining yer yüzige chüshüshi peyshenbe küni, hetta jüme künigiche dawam qilishi mumkin. Uning hazirqi tuzanliri besh burjek bina mölcherligendinmu az. Mutexessislerning éytishiche, eger undaq bolmighanda, bu sün'iy hemrahning parchilirini bashqa döletler yighiwélip, uningdiki mexpiyetliklerni oghrilash éhtimali bar idi. Hazir bundaq éhtimalliq mewjut emes, shundaqla uningdiki zeherlik maddilarmu insanlargha xeter yetküzelmeydu.

Amérika planétlar ara urush qilishqa yétekchilik qilalaydighan qabiliyetke ige

Fransiye agéntliqining bayan qilishiche, amérika bu qétim alem boshluqidiki sün'iy hemrahni étish arqiliq, özining planétlar ara urush qilishqa yétekchilik qilalaydighan qabiliyetke ige ikenlikini tuluq namayen qildi.

Amérikining bu herikitidin xelq'ara jem'iyet omumyüzlük gumanlandi

Xitayning shinxu'a agéntliqi élan qilghan xewerde bayan qilinishiche, amérika déngiz armiyisining bir charlash paraxoti 2 ‏- ayning 20 ‏- küni kech sa'et 10din 26 minut ötkende, tinch okyandin MS-3 belgilik bashqurulidighan bomba étip, amérikining alem boshluqida kontrolluqini yoqatqan bir jasusluq sün'iy hemrahini muweppeqiyetlik pachaqlidi. Buning bilen amérika dunyada özi élan qilghan pilan buyiche, yeni nishan, waqit, jay we oq türi buyiche bir qétim maharet körsetti, toghrisini éytqanda, amérika özining bashqurulidighan bombidin mudapi'e körüsh séstimisining qisqa we ottura musapiliq bashqurulidighan bombini tosushni sinaq qildi. Shinxu'a agéntliqining éytishiche, amérikining bu herikitidin hazir xelq'ara jem'iyet omumyüzlük gumanlandi.

Xitayning 'xelq géziti'mu obzor élan qilip, amérikining sün'iy hemrahni étip uni herbiy meqset üchün qilin'ghan emes, dégenlikini tenqit qilip, amérika téxiche alem boshluqida özining üstünlükini saqlap qélishtin waz kechmeywatidu, dep bayan qildi.

Amérika sanliq melumatlarni xelq'ara jem'iyetke tepsiliy melum qilishi kérek

B b s ning xewer qilishiche, mushu ayning béshida, rusiye bilen xitay birlikte pilanlap, buningdin kéyin alem boshluqida herbiy qoral qollinishni men'iy qilish kélishimi imzalashni teshebbus qilghan idi. Bu qétim amérika özining sün'iy hemrahini atqandin kéyin, rusiye dölet mudapi'e ministirliqi' amérikining dégenliri néme bolushidin qet'iy nezer, u bir qétim alem boshluqidiki sün'iy hemrahni étish arqiliq özining bashqurulidighan bombidin mudapi'elinish séstimisining iqtidarini sinidi we qabiliyitini dunyagha köz-köz qildi' dédi.

Xitay tashqi ishlar mnistirliqining bayanatchisi lyu jyenchaw bolsa'junggo hazir amérika qatarliq döletlerning alem boshluqining bixeterlikige yetküzüwatqan tesirige nisbeten jiddiy qarawatidu. Amérika bu qétimqi heriketke da'ir sanliq melumatlarni xelq'ara jem'iyetke tepsiliy melum qilishi kérek' dédi. Xewerde éytilishiche, gerche xitay 2007 ‏- yili 1 ‏- ayda, özining bir sün'iy hemrahini alem boshluqida pachaqlaydighanliqidin héchqandaq bir döletni xewerlendürmigen we weqedin kéyinmu buninggha da'ir sanliq melumatlarni élan qilishni ret qilghan bolsimu. (Weli)